1 कुरिन्थियों 9 - सिरमौरी नौवाँ नियमचोणेयौंदे चैलै कै उदारण 1 जू किछै हांव कौरणा चोऊं, तिथु कौरणौ कारिए हांव आज़ाद औसौ, हांव चोणेयौंदा चैला औसौ मोऐं अमारै प्रभु यीशु मसीह कै दैखै राए, तुऐं प्रभु कै खातिर कौरेयौंदी मैरी सेवा का नतीजा औसौ। 2 जै औकै लोग ऐजौ ना मानौ कै हांव प्रभु यीशु का चोणेयौंदा चैला औसौ, तौ तुऔं भाईयों खै ऐजौ मानणौ चैंई। जिथुकै हांव सैजाई औसौ जू तोंवारै धोरे सुसमाचार लोयो आए रौआ थिया। प्रभु यीशु दा तोंवारा बिशवाश ऐजौ साबित कौरौ कै हांव सौथी कै तैसका चोणेयौंदा चैला औसौ। 3 जू लोग मैरै चोणेयौंदा चैला हौणौ का औधिकार कि बुराए कौरौ, तिनु कारिए ऐजाई मैरा जोवाब औसौ। 4 मुखै औरौ बरनबास खै, चोणेयौंदे चैलै हौणौ की बौजैह शै औधिकार औसौ कै तुऔं कैईंदै आमु सेवा का काम कौरणौ कारिए धन कि मौदद भैटौ। 5 जिथुकै औकै चोणेयौंदे चैलै औरौ याकूब, यहूदा औरौ पतरस (कैफा) आपणी घोरवाल़ी खै आपणै साथै लौए जांव, जौल़ौ सै यात्रा कौरौ, तौ मुंकैई बै ऐजा औधिकार औसौ। 6 पौरौ मुखै औरौ बरनबास खै बै औकै चोणेयौंदे चैलै कै जैशणा आर्थिक मौदद पाणौ का औधिकार औसौ औरौ आपणै मौदद कौरणौ कारिए काम कौरणौ कै जौरुरत ना आथी। 7 ऐक सैनिक खै कौलोंई बै आपणा खर्चा खुद ना दैणा पौड़ौ। ऐक आदमै जू अंगूरो का बगीचा लांव, सै तिथकै किछै फोल़ खाणौ कै उमीद कौरौ। औरौ ऐक भेड़वाल़ा आपणी भेड़ो कैईंदु दूध पिणौ कै उमीद कौरौ। 8 मोऐं आदमी कै राय कै आधार पांदी ऐजी बातौ ना बौल़ै लैई। 9 जिथुकै मूसा कै कानून दो लैखै राए कै तुऔं ऐकी बौल़दौ कौ मुँह नी बानंणौ चैंई जिथुवे भूसो खै हटाणौ कारिए गेहूँ खै जैंगै लौवै। का तोंवारै ऐशै जाणियौ कै पौरमेशवर सिरफ बौल़दौ कै बारै मुंजी ही चिन्ता कौरौ? ना! बिल्कुल बै नी! 10 ऐजौ खास कौरेयौ आमु कारिए बौल़ौ। हां, आमु कारिए ही लैखै राए, जिथुकै ठीक औसौ, कै ऐकी बागड़ी कै बांणौवाल़ा कियों उमीद लैई बांव, औरौ खोल़ेयाणो दो भूसो शै नाज़ जौई कौरणौवाल़ा फसल का किछै भाग पाणौ कै उमीद जोरुर राखौ। 11 आमै तोंवारै बीच दै आत्मिक बीज़ बौए राए, इथकारिए ऐजै उमीद कौरणै जादा ना आथी, कै तुऐं आमु अमारा रौज का खर्चा दैंव। 12 जिथुकै तुऐं ओकी लोगौ खै पौयसै कि मौदद दैय राए, जिनुवै तुऔं मुंजी प्रचार कौरे राए, निशोंक हौयौ खै बरनबास औरौ हांव इथकै लायक हौजौ बै जादा औसौ। भलैई, आमु मुंजीदै कोसीए बै इयौं बातौ पांदी जोर ना दी कै तुऐं आमु तिनु चीज़ौ कै दौ जू अमारै तुऔं कैईंदी चैंई थी। इथकै बजाय, आमु किछै बै सैहणौ खै तैयार थिए, ताकि आमु मसीह कै बारै मुंजी सुसमाचार पांदी बिशवाश कौरणौ शै कोसी खै बै मुशकिल दै नी पांव। 13 का तुऐं ना जाणौ कै मन्दिरो दा काम कौरणौवाल़ै मर्दो खै मंदिरो पौरैशौ आपणौ खाणौ भैटौ? औरौ, जू लोग बैदी पांदी बल़ि दैंव, तिनुखै बल़ियौं का हिस्सा भैटौ। 14 ऐशैखैई प्रभुए बै तय कौरे राए, कै जू लोग सुसमाचार शुणांव, तिनकै रौज़ी-रोटी तिनु लोगौ शै हौणै चैंई जू सुसमाचार शुणौ। 15 जोबै कै ऐजौ सौथीखै मुखै सोही हौंदौ कै जिनु लोगौ खै मोऐं प्रचार कौरे राए तिनु कैईंदु मांगु, पौरौ मोऐं आपणै काम कारिए मजदूरी ना मांगी। औरौ मोऐं तोंवारै खातिर ऐजौ ना लैखै लैई ताकि तुऐं मुखै दैंव। हांव तुऔं कैईंदु मांगणौ कै बजाय मौरे जांदा जिथुकै जै मुखै तुऔं कैईंदी मजदूरी भैटौ तौ हांव ऐजा दावा ना कौरे पांदा कै मोऐं बिना मजदूरी कै काम कौरा। 16 जै हांव सुसमाचार शुणौऊं, तोबै बै मुंआगो किछै ना आथी, जिथकै बारै मुंजी, हांव घमण्ड कौरे सौकु; जिथुकै ऐजै तौ मुखै सौंपैयौंदे जिम्मेदारी औसौ; औरौ जै हांव सुसमाचार ना शुणौऊं, तौ मुं पांदी लानत औसौ। 17 जै हांव ऐजा काम आपणी मर्जी शै कौरु तौ मुखै इनाम भैटदा। पौरौ जै पौरमेशवरे मुखै ऐजै जिम्मेदारी दैय राए, तौ हांव इनाम कि का उम्मीद कौर सौकु? हांव कोसी बै इनाम कै उम्मीद ना कौर सौकु। 18 तौ का औसौ मैरा इनाम? ऐजाई कै यीशु मसीह का सुसमाचार का प्रचार मुफ्त दा कौरदा रोऊं, ऐजै मैरै तनखा औसौ, मुं कारिए ऐजौ जौरुरी औसौ कै हांव बिना तनखा कै सुसमाचार शुणौऊं, भलैई मुखै आपणा खर्चा मांगणौ का हक औसौ। सौबी की सेवा 19 इथका मतलब ऐजा औसौ कै हांव लोगौ कै बातौ खै मानणौ कारिए मजबूर ना आथी, सिरफ इथकारिए कै सै मैरा खोर्चा उठांव, तोबै बै हांव हर कोसी का दास बौणै गौआ ताकि हांव तिनुखै मसीह दै लाए सौकु। 20 यानी, जोबै हांव यहूदी लोगौ कै साथै औसौ, तौ हांव तिनु मसीह दै लाणौ कारिए ऐक यहूदी कै जैशणा रोऊं थिया। जोबै हांव तिनु लोगौ कै साथै थिया जू यहूदी लोगौ कै कानून का पालन कौरौ, तौ हांव बै तैसी मूसा कै कानून कै हिसाब शै रोऊं थिया। भलैई, मुखै मूसा कै कानून का पालन कौरणौ कै जौरुरत ना आथी, मोऐं ऐशै इथकारिए कौरे राए ताकि हांव मूसा कै कानून मानणोवाल़ै लोगौ खै मसीह दै लाए सौकु। 21 तैशैखैई, जोबै हांव बैगानै यहूदी लोगौ कै साथै काम कौरु, तौ तैशैखै रोऊं जैशै सै रौंव, ताकि तिनु जीती सौकु। पौरौ मुखै पौता औसौ कै हांव पौरमेशवर कै कानून कै बगैर ना रौए सौकु थिया, जिथुकै हांव मसीह कै कानून कै हिसाब शै औसौ। 22 जोबै हांव तिनु लोगौ कै साथै रोऊं, जिनका बिशवाश कमजोर औसौ, तौ हांव तिनकै जैशणा बर्ताव कौरु, ताकि हांव तिनुखै मसीह कै पौछौड़ियौ चालणौ दै मौदद कौरे सौकु। औरौ सौबी आदमी कारिए सौबै ठुँ बौणै गौआ, कै कोसी ना कोसी तरीकै शै किछै लोगौ का उध्दार कौराए सौकु। 23 औरौ हांव सौबै ठुँ मसीह कै बारै मुंजी सुसमाचार प्रचार कौरणौ कारिए कौरु, कै मुखै सुसमाचार दा वादा कौरेयौंदे आर्शीवाद का हिस्सा भैटी सौकौ। मसीही दौड़ 24 जैशैकै सौब लोग दौड़ दै दोऊड़ो तौ औसौ, पौरौ इनाम ऐकैई आदमी नियौ। तुऐं तैशैखै दोऊड़ो, कै तुऐं जीतौ। 25 जू लोग दौड़ दा हिस्सा लोणा चांव, सै आगै भ्यास कौरौ औरौ आपणी अभिलाषाओं दै ना डुबौ, पौरौ धीरज राखौ सै जीतणौ औरौ आदर पाणौ कारिए ऐशै कौरौ तिनका आदर फूलो लैई बौणैयौंदे माल़ा शै हौंव जू जादा सौमय तौड़ी ना रौंव पौरौ आमै जू मसीह यीशु दा भोरोशा कौरु, आदर औरौ आशीष पांदै जू सौदा तौड़ी बौणैयौंदे रौंदी। 26 जैशै ऐक दोऊड़नो वाल़ा दौड़ कै दशा दा बौणेयौंदा रौंव या ऐक मुकैबाज़ आपणै मुक्को खै विरोधी कै शोरीर पांदी मारौए, तैशैखैई हांव आपणै जीवन कै मसीह कै काबू दा जीऊं। 27 हांव आपणै शोरीरो खै भ्यास दा लांऊ औरौ बुरी इछाओं कै काबू दी राखु, कोदी ऐशै नै हौंव कै हांव जू ओकी कै सुसमाचार का प्रचार कौरु, औरौ आपी इनाम ना पोऊँ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation