1 कुरिन्थियों 8 - सिरमौरी नौवाँ नियमचौढ़ावे कौ खाणौ 1 ऐबै मूर्ति कै सामणै बल़ि कौरेयौंदी चीज़ौ कै बारै मुंजी आमु जाणुए, कै आमु सौबी खै ज्ञान औसौ: ज्ञान घमण्ड पौयदा कौरौ, पौरौ प्यार लैई बौढ़ौतरी हौंव। 2 जै कुणिए सौमझौए कै सै किछै जाणौए, तौ सै इबी तौड़ी ऐजौ ना जाणौ कै कैशैखै जाणणौ चैंई। 3 पौरौ जै कुणिए पौरमेशवर शै प्यार राखौ, तौ पौरमेशवर तैसी आदमी खै जाणौए। 4 तौ तोबै, हांव खाणौ कै बारै मुंजी सवाल का जोवाब दैणा चोऊं। आमै जाणुए कै सिरफ ऐकैई जियुंदी पौरमेशवर औसौ औरौ इयौं दुनिया दी मूर्ति बैजान औसौ। 5-6 पौरौ तोबै बै, स्वर्ग दै औरौ दुनिया पांदी कैई लोगौ खै ईशवर औरौ प्रभु बौल़ौ। पौरौ आमु कारिए ऐकैई पौरमेशवर औसौ औरौ सै अमारा पिता औसौ। तैणै सौबै ठुँ बाणै राए, औरौ आमै तैसकै दवारा जियुंदी औसौ। तैशैखैई, अमारा ऐक प्रभु औसौ औरौ सै यीशु मसीह औसौ। तैसी लैई सौबै ठुँ बौणै रौ थियु औरौ तैसकै दवारा आमै सौब जियुंदी औसौ। 7 पौरौ अमारै किछै बिशवाशी इबी तौड़ी ना जाणौ कै मूर्ति कैंई कुणजै शौकतै ना आथी, जिथुकै सै औगौड़ियौ तिनु मूर्ति कै आगै चौढ़ाएयौंदो खाणौ खांव, सै गौलती शै सुंचौए कै सै इबी बै तिनु मूर्ति कै पूजा दै शामिल औसौ। औरौ सै ऐजौ शोणेयो पौरैशान हौंव कै जै सै मूर्ति कै चौढ़ाएयौंदो खाणौं खांव तौ तिनुऐ पाप कौरे राए। 8 आमु पौरमेशवर कै नेड़िक लौए जाणौ दा खाणौ का कुणजाई काम ना आथी खाणौ लैई ना तौ कुणजाई नुकसान हौंव, औरौ ना कुणजाई फायदा हौंव। 9 पौरौ चौकश रौया, ऐशै नै हौंव, कै तोंवारै ऐजै आज़ादी बिशवाशौ दै कमजोर लोगौ कारिए पापौ कै बौजैह बौणौ। 10 जिथुकै तुऐं जाणौए कै ऐजी मूर्ति सौथीखै पौरमेशवर ना आथी इथकारिए तुऐं मूर्ति कै मन्दिरो दै खाणौ खाए सौकौ। पौरौ जू कुणिए बिशवाश दै कमजोर औसौ जै सै तुऔं तिथै खाणौ खांदै बैई दैखौए, तौ तैसी बै मूर्ति खै चौढ़ाएयौंदो मांस खाणौ का हौंसला भैटौ। भलैई सै जाणौ हौला, कै जै सै ऐशै कौरौ तौ सैजा पाप औसौ। 11 ऐशैखैई तैरै ज्ञान की बौजैह शै जू बिशवाशी भाए बिशवाश दा कमजोर औसौ सै मसीह दा बिशवाश कौरणा बंद कौरे दैंदा, जैसी कारिए यीशु मसीहे आपी कै बलिदान कौरा। 12 जै अमारै ऐसी काम कै कौरणौ शै अमारा साथी बिशवाशी दोषी महसूस कौरौ, तौ आमै तिनकै खिलाफ दै औरौ मसीह कै खिलाफ दै बै पाप कौरे राए। 13 इथकारिए, जै आमै मूर्ति खै चौढ़ाएयौंदो खाणौं खाणौ शै ओकी बिशवाशी कै बिशवाश खै खोए दैणौ कै बौजैह बौणौ, तौ हांव तैशणौ खाणौ कौलोंई ना खांदा जिथलैई हांव ओकी बिशवाशी कै बिशवाश कै खौणौ कै बौजैह बौणु। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation