1 कुरिन्थियों 7 - सिरमौरी नौवाँ नियमबैयाव कै बारै मुंजी सवाल 1 ऐबै तिनु सवालो कै बारै मुंजी जू तुऐं आपणै चिट्ठी दै पूछै राए थिए, अमारै खातिर का ऐजौ आछौ हौंदौ कै बैयाव नी कौरु। 2 पौरौ परीक्षा दै पौड़ेयौ गौलत सौमबंध खै राखणा अमारै खातिर बैजाए ही आम या आसान बात औसौ, इथकारिए मैरै ऐजै सलाह औसौ कै, सौबै मर्द बैयाव कौरे पांव औरौ आपणी घोरवाल़ी कै साथै ईमानदार रौंव। 3 ऐजौ जौरुरी औसौ कै घोरवाल़ा आपणै घोरवाल़ी का हक पूरा कौरौ औरौ तैशैखैई घोरवाल़ी बै आपणै घोरवाल़ै का। 4 घोरवाल़ी खै आपणै शोरीरो पांदी औधिकार ना आथी पौरौ तियौंखै घोरवाल़ै का औधिकार औसौ; तैशैखैई घोरवाल़ै खै बै आपणै शोरीरो पांदी औधिकार ना आथी, पौरौ तैसकी घोरवाल़ी का औसौ। 5 तुऐं ऐकी दूजै शै जौई ना रौया; पौरौ सिरफ किछै सौमय तौड़ी आपी मुंजी सलाह कौरेयौ प्रार्थना कौरणौ खै छूट लोणी चैंई, औरौ कुछ सौमय कै बाद तुऐं घोरवाल़ा औरौ घोरवाल़ी कै जैशै औटेयौ ऐक साथै रौया; ऐशै ना हौं कै आपणी इछाओं खै काबू दै नी राखणौ कै बौजैह शै शैतान बुरै जीवन जिणौ कारिए तोंवारै परीक्षा कौरौ। 6 पौरौ हांव जू ऐजौ बुलू सैजै सलाह औसौ ना कै आज्ञा। 7 हांव ऐजौ चोऊं, कै जैशणा हांव बिना बैयाव का औसौ, तैशैखैई सौबै आदमी हौंव, पौरौ हरेक खै पौरमेशवर कै ढौबौशै खास वरदान भैटी रौवै; पौरमेशवर किछै लोगौ खै बैयाव कौरणौ का वरदान दैंव औरौ किछै लोगौ खै बिना बैयाव दै रौणौ का वरदान दैंव। कुंवारै लोगौ कारिए सलाह 8 ऐबै बिना बैयाएयौंदे कारिए औरौ बिधवा कै बारै मुंजी मैरी ऐजी सलाह औसौ, तिनकौ मैरै जैशणौ बिना बैयाव खै रौणौ बैजाए ठीक औसौ। 9 पौरौ जै सै सब्र ना कौरे सौकौ, तौ बैयाव कौरेया, जिथुकै बैयाव कौरणा आपणी इछाओं पांदी औरौ चाहतौ खै राखणौ शै आछौ औसौ। बैयाव वाल़ौ खै सलाह 10 जिनका बैयाव हौए गौआ, तिनुखै हांव नी, यानी प्रभु यीशु आज्ञा दैंव, कै घोरवाल़ी आपणै घोरवाल़ै शै तलाक नी लौया। 11 औरौ तलाक बै हौए जांव, तौ बिना बैयाव कौरेयौ रौया; या आपणै घोरवाल़ै आरी औटेयौ सौमझौता कौरे पाया औरौ ना घोरवाल़ा आपणी घोरवाल़ी शै जौई रौं। 12 पौरौ ऐबै ऐजै प्रभु कै आज्ञा ना आथी पौरौ हांव तिनु बिशवाश कौरणौवाल़ै लोगौ कै बौलणौ चोऊं, जिनकै बैयाव बिशवाश ना कौरणौवाल़ै लोगौ शै हौए गौवै; जै कोसी मसीह भाई कै घोरवाल़ी मसीह पांदी बिशवाश ना कौरौ, औरौ तैसीकै साथै रौणौ चांव, तौ तियौंकै तलाक नी दैया। 13 जै कोसी बिशवाशी बोईणी का घोरवाल़ा बिशवाश ना कौरौ, औरौ सैजा मर्द तियौंखै साथै लगातार रौणौ कै इछा राखौ तौ सै तैसीकै नै छोड़ो। 14 जिथुकै जै तुऐं बिशवाशी घोरवाल़ी औसौ जू अबिशवाशी घोरवाल़ै कै साथै रौंव, तौ तोंवारा घोरवाल़ा बै तोंवारै बिशवाशी हौणौ की बौजैह शै प्रभु का औसौ। औरौ जै तुऐं बिशवाशी मर्द औसौ जू अबिशवाशी घोरवाल़ी कै साथै रौंव, तौ तोंवारै घोरवाल़ी बै तोंवारै बिशवाशी हौणौ कै बौजैह शै प्रभु कि औसौ। जै ऐजौ साचौ ना आथी कै तोंवारै अबिशवाशी घोरवाल़ा या घोरवाल़ी पौरमेशवर कै औसौ, तौ तोंवारै नानड़िया बै पौरमेशवर कै ना हौंदै। पौरौ ऐबै तोंवारै नानड़िया बै प्रभु कै ही औसौ। 15 जै अबिशवाशी घोरवाल़ा या घोरवाल़ी, बिशवाशी घोरवाल़ा या घोरवाल़ी कैईंदा जौई हौणा चांव, तौ तिनु जौई हौणौ दौ। जोबै ऐशै हौं तौ, बिशवाशी तैसी बैयाव कै रिशतै शै आज़ाद औसौ। पौरौ जै हौए सौकौ तौ, आपणै अबिशवाशी घोरवाल़ा या घोरवाल़ी आरी बैयाव कै रिशतै दै बौणैयौंदे रौव, जिथुकै पौरमेशवरे आमु ऐकी दूजै कै साथै शान्तै शै जीवन जिणौ कारिए बौएदै राए। 16 ओए रै बिशवाशी घोरवाल़ी तुऔं याद रौणौ चैंई कै शायद तुंआरी बौजैह शै तोंवारै घोरवाल़ै बै आपणै पाप छोड़ेयौ मसीही बौणै सौकौ। ओए रै बिशवाशी घोरवाल़ै तुऔं बै याद रौणौ चैंई कै शायद तुंआरी बौजैह शै तुंआरी घोरवाल़ी बै आपणै पाप छोड़ेयौ मसीही बौणै सौकौ। पौरमेशवर कै बुलाहट कै हिसाब शै चालौ 17 सौब आदमी खै तियौं दशा दो बौणैयौंदो रौणौ चैंई जू पौरमेशवर खै बौईददै बैई तिनकै थै। औरौ जैशै पौरमेशवरे सौबी खै तैसकै लोग हौणौ कारिए बौएदै राए तैशैखैई सै चालौ: औरौ हांव सौबी कलीसियाओं दो ऐशैखैई ठैहरोऊं। 18 उदारण कारिए जोबै ऐक यहूदी प्रभु यीशु पांदी बिशवाश कौरौ, तौ तैसी आपणै यहूदी हौणौ कै छौड़णौ कै जौरुरत ना आथी। औरौ ऐशैखैई ऐजौ बै कै जै कुणिए आदमै जू बैगानै यहूदी औसौ, औरौ प्रभु पांदी बिशवाश कौरौ, तौ तैसी यहूदी बौणणौ कारिए खतना कौरणौ कै जौरुरत ना आथी। 19 कोसी का खतना हौए रौआ या ना हौए रैई इथलैई कुणजाई फर्क ना पौड़ौ पौरौ पौरमेशवर कै आज्ञाओं खै मानणा बैजाए जौरुरी औसौ। 20 हरेक आदमी कै तियौं दशा दौ बौणैयौंदो रौणौ चैंई जू पौरमेशवर कै बोईददै बैई तिनकै थै। 21 जै कुणिए आदमी सेवक औसौ, औरौ प्रभु पांदी बिशवाश कौरौ, तौ तुऔं इयौं बातौ कौ बुरु नी लागणौ चैंई, भलैई, जै तोंवारा मालिक तुऔं बौतांव कै तुऐं आज़ाद हौए सौकौ, तौ जाए सौकौ। 22 जिथुकै जू गुलाम कै दशा दा तैसी सौमय बौएदै गौआ, जोबै सै गुलाम थिया प्रभुए तैसी पाप कै शौकतै शै आज़ाद कौरे राए औरौ तैशैखैई जू आज़ादी कै दशा दै बौएदै गौवै, सै मसीह कै गुलाम बौणौ। 23 पौरमेशवरे तोंवारै खातिर ऐक बौड़ै कीमत चुकायो तुऔं कै बौचाए राए इथकारिए आदमी कै दास नी बौणैया पौरौ पौरमेशवर कै दास बौणैया। 24 ओए रै बिशवाशी भाईयों, जू कुणिए जियौं दशा दा बौएदै राए, सै तैशैखैई पौरमेशवर कै साथै रौया। कुंवारी औरौ विधवाएं 25 कुवांरियों कै बारै मुंजी मुखै प्रभु कै कुणजै आज्ञा ना भैटी रैई, जिथुकै हांव पौरमेशवर कै दया की बौजैह शै भौरोशैमंद लोगौ मुंजीदा ऐक औसौ, हांव आपणी राय दियु। 26 जिथुकै इनु दूसौ कै दौरान हर जौगैह बिशवाशी कारिए मुशकिल चीज़ौ हौंदी लागै रैई, मैरै जाणियौ कै तोंवारै खातिर ऐशै कौरणौ आछौ औसौ, कै बिना बैयाव कौरणौवाल़ै लोगौ खै हांव ऐजै सलाह दियु कै सै बिना बैयाव कै रौंव। 27 जै तुऐं बैयाव कौरेयौंदे औसौ तौ घोरवाल़ी खै नी छोड़ेया। जै बिना बैयाव कौरेयौंदे औसौ तौ घोरवाल़ी जोणो कै कौचिश नी कौरेया। 28 पौरौ जै तोंवारा बैयाव हौए बै जांव तौ पाप ना आथी; औरौ जै कुंवारी बेयाए जांव तौ कुणजाई पाप ना आथी; भलैई, बैयाएयौंदे लोग इयौं दुनिया दै आपणै जीवन दै दर्दनाक चीज़ौ कै महसूस कौरदै औरौ हांव चोऊं कै तुऐं ऐशणी पौरैशानियौं शै आज़ाद रौंव। 29 ओए रै बिशवाशी भाईयों, हांव ऐजौ बुलू मसीह कै पाछु आणौ दा ऐबै जादा सौमय ना बौचै रैई, इथकारिए तुंआरी घोरवाल़ी औसौ या ना आथी, इथकै बारै मुंजी जादा पौरैशान नी हौया। पौरौ प्रभु कै सेवा कौरणौ कै बारै मुंजी सुंचदै रौया। 30 जू लोग रूऔंऐ या जू लोग खुशी हौंव या जू लोग आपी कारिए चीज़ौ मोलै लोंव तिनु इनु सौबी चीज़ौ कै बारै मुंजी जादा पौरैशान नी हौणौ चैंई। जिथुकै इनु सौबी बातौ कि बौजै शै तुऐं प्रभु कै सेवा कौरणै बैसरै जांदै। 31 औरौ इयौं दुनिया मुंजी जू किछै बै आमुकैंई औसौ, आमु तिथु जादा जौरुरी नी सौमझणौ चैंई जिथुकै इयौं दुनिया दु सौबै ठुँ खत्म हौए जांदो। 32 मैरै इछा औसौ कै तुऐं दुनिया कै जीवन कै बुरी इछाओं शै आज़ाद रौंव, तैसी कारिए, जू बिना बैयाव का मर्द औसौ, सै इयौं बातौ कै फिकर कौरौ, कै पौरमेशवर कै सेवा कैशै कौरु। सै प्रभु खै खुश कौरणौ कि धुन दा रौं। 33 पौरौ बैयाएयौंदे आदमै दुनिया की बातौ कि चिन्ता दै रौंव, कि आपणी घोरवाल़ी खै कैशैखै खुशी राखै सौकौ। 34 औरौ तैसका ध्यान बौंटेयौंदा रौंव। तैशैखैई बिना घोरवाल़ै की औरौ कुंवारी बैटमाणिशौ का ध्यान बै प्रभु कै बारै मुंजी लागैयौंदा रौंव औरौ इथकारिए सै शोरीर औरौ आत्मा दी पवित्र रौणौ कै कौचिश कौरदै रौंव, पौरौ सैजै बैटमाणिश, जू बैयाएयौंदे औसौ, दुनिया कै बारै मुंजी ध्यान राखौ कै सै आपणै घोरवाल़ै खै कैशैखै खुशी राखै सौकौ। 35 ऐजै बात हांव तोंवारै भोलाए कै बुलू, ना कै तुऔं खै फौशाणौ कारिए, यानी इथकारिए कै जैशै ठीक औसौ; तुऐं ऐक मन हौयौ प्रभु कै सेवा दै लागैयौंदे रौव। 36 औरौ जै कुणिए ऐजौ सौमझौ, कै मोऐं आपणी तियौं कुंवारी बाईटी का हक मारै लौआ, जियौं कै उमर ढ़ौलदै लागै रौए, औरौ जौरुरत बै औसौए, तौ जैशै चांव तैशैखै कौरेया, इदा पाप ना आथी, सै तियौं का बैयाव हौणौ दैंव। 37 पौरौ जै तियांरै बापूए आपणै दिमाक दा मोजबूत फोयसला कौरे राए कै तैसकै बैटी कारिए बैयाव ना कौरणा आछौ औसौ, औरौ कोसीए बै तैसी ऐजौ कौरणौ कारिए मोजबूर ना कौरे रैई, तौ सै तैशैखै कौरे सौकौ जू तैणै तय कौरे राए। औरौ इथकारिए तियौं बिना बैयाव कै राखणौ का फोयसला कौरौ, तौ सै पौरमेशवर कै नज़र दा आछा काम कौरौ। 38 तौ जू आपणी कुंवारी बाईटी का बैयाव कौरे दैंव, सै आछौ कौरौ औरौ जू बैयाव ना कौरौ, सै हौजौ बै आछौ कौरौ। 39 जांव तौड़ी कोसी बैटमाणिशौ का घोरवाल़ा जियुंदी रौंव, तांव तौड़ी तियौं तैसकै साथै बैयाएयौंदौ रौणौ चैंई, पौरौ जोबै तियांरा घोरवाल़ा मौरे जांव, तौ जैसी आरी चांव तैसीआरी बैयाव कौरे सौकौ, पौरौ सिरफ तैसीआरी जू प्रभु का चैला औसौ। 40 पौरौ जै सै औटेयौ बैयाव ना कौरौ तौ मैरै विचार दै सै हौजौ बै धन्य औसौ, औरौ मैरी सौमझ दो, मैरै जाणियौए कै जोबै हांव तुऔं ऐजौ बुलू तौ हांव पौरमेशवर कै आत्मा कै दवारा तुऔं सलाह दियु। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation