1 कुरिन्थियों 5 - सिरमौरी नौवाँ नियमकलीसिया दै गौलत काम 1 मोऐं लोगौ खै बुरी औरौ बैजाए शर्मनाक बातौ कै बौलदै बैई शौणै राए जू तुऔं लोगौ कै बीच मुंजी हौंदी लागै रैई, कै कलीसिया दै तुऔं मुंजीदै किछै लोग गौलत सौमबंध दै औसौ, जू अबिशवाशियौं मुंजी बै ना हौंव सैजौ ऐजौ औसौ कै, ऐक आदमै तैसकै सौतेल़ी माँ कै साथै गौलत सौमबंध राखौ। 2 औरौ तुऔं कै इथकै बारै मुंजी बैजाए दुख लैई भोरै जाणौ चैंई थियु तुऔं तैसी ऐजी चैतावणी दैणी चैंई कै जांव तौड़ी सै पश्चाताप ना कौरे पांव, तांव तौड़ी सै कलीसिया दै ना आए सौकौ पौरौ इथकै बजाय, घमण्ड महसूस कौरौ। 3 जौबेकै हांव तुऔं कैईंदा दूर औसौ, पौरौ मैरै विचार तोंवारै साथै औसौ भलैई हांव तिथै ना आथी, पौरौ मैरै मनो दै ऐशै औसौ कै मोऐं सौथीखै तियौं जौगैह पांदी बुरा काम कौरणौवाल़ै कै खिलाफ फोयसला कौरे लौआ जू तैणै कौरे लौआ। 4 ऐजौ सैजौ औसौ जू तुऔं कौरणौ जौरुरी औसौ। बिशवाशियौं कै जैशणै कौठै हौए जांव, ऐजौ जाणैयौ कै तुऔं कैई सौथीखै अमारै प्रभु यीशु मसीह का औधिकार औसौ औरौ ऐजौ ऐशैखै औसौ कै हांव बै तैसी जौगैह पांदी मौजूद औसौ। औरौ तोबै बै प्रभु यीशु कै औधिकार कै दवारा, 5 सैजा आदमी जैणै पापवाल़ा बर्ताव कौरे लौआ, तैसी कलीसिया पौरैशा निकाल़ै दैणा ऐशै औसौ जैशै तैसी शैतान कै अधीन दा पाछु भैजणा, ताकि ऐजी आशा कौरे जांव कै सै आपणै पाप शै पश्चाताप कौरदा। जै सै ऐशै कौरौ, तोबै सै सौथीखै तैसी दूसै बौचाए जांदा जौल़ौ प्रभु न्याय कौरदा। 6 तोंवारा घमण्डी हौणा आछा ना आथी; का तुऐं ना जाणौ, कै दैणिक खमीर पूरै बाटैयौंदो आटै मुंजी फोयलै जांव, तैशैखैई, जै ऐकी आदमी कै पाप कौरदै रौणौ कारिए छोड़े दीं, तौ तावल़ो ही सौबी लोगौ मुंजी सैजौ पाप फोयलैयौ सौब लोग सैजौई पाप कौरदै लागदै। 7 तुऐं पाप कै पुराणै खमीर कै हटाए दैंव, यानी ऐसी गौलत सौमबंध राखणै वाल़ै आदमी शै बौल़ौ कै सै तोंवारै संगति दा शामिल ना हौए सौकौ। तोबै तुऐं बिना पापौ कै ऐक नौवें औरौ शुध्द रिशतै दै ऐकी दूजै कै साथी जुड़णौ वाल़ै बिशवाशियौं कै ऐक शुध्द मंडली हौए जांदै, सौथी कै तुऐं पौरमेशवर कै पवित्र लोग औसौ। जिथुकै मसीह अमारा फसह का मेम्ना आमु आपणै पापौ शै छुड़ाणो कारिए बलिदान हौआ। 8 इथकारिए हांव बुलू, कै आमु सौदा पौरमेशवर कै पवित्र लोगौ खै जैशणौ रौणौ चैंई। आमु बुरै तरीको शै नी जीणु चैंई इथकै बजाय, आमु पौरमेशवर कै आज्ञाओं का पालन कौरणा चैंई औरौ कुणजैई बै बुरै औरौ दुष्टता कै काम नी कौरणै चैंई, यानी आमु सौदा ईमानदार औरौ भरोसेमंद रौणौ चैंई। अनैतिकता कारिए न्याय 9 मोऐं तुऔं कै आगै ऐक चिट्ठी लैखै राए थै कै, गौलत सौमबंध राखणौवाल़ै कै संगति नी कौरेया। 10 ऐजौ नी, कै तुऐं इयौं दुनिया कै गौलत सौमबंध राखणौवाल़ै शै या लालची शै, या धौखा दैणौवाल़ै शै, या मूर्तिपूजा वाल़ौ शै बिल्कुल बै संगति ना कौरौ; जिथुकै ऐशै कौरणौ शै तौ तुऔंखै दुनिया ही छोड़णी पौड़दी। 11 मैरा बौलणौ का मतलब ऐजा औसौ; कै जै आपी खै ऐक बिशवाशी ऐजौ बौल़ौ कै सै मसीह पांदी बिशवाश कौरौ, औरौ सै गौलत सौमबंध राखणौ वाल़ा, या लालची, या मूर्तिपूजा, या गाल़ी दैणौवाल़ा, या पियक्कड़, या अन्धेर कौरणौवाल़ा हौंव, तौ तैसकै साथै संगति नी राखैया; बल्कि ऐशणै आदमी कै साथै खाणौ बै नै खाया। 12 जिथुकै जू लोग बिशवाशी ना आथी तिनकै नेंदैया कौरणा मैरै जुमैवारै ना आथी, पौरौ निशोंक हौयौ तुऔं तिनु लोगौ खै सौजा दैणी चैंई जू तोंवारै कलीसिया कै लोग औसौ। 13 पौरौ जू लोग बिशवाशी ना आथी तिनका न्याय पौरमेशवर कौरदा; पौरौ जैशै पवित्र आत्मा बौल़ौए सैजा दुष्ट आदमी तोंवारै मंडली का हिस्सा ना हौए सौकौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation