1 कुरिन्थियों 3 - सिरमौरी नौवाँ नियमआदमी कै पौछौड़ियौ चालणौ सोही ना आथी 1 ओए रै बिशवाशी भाईयों, जोबै हांव तोंवारै साथै थिया तोबै हांव तुऔं आरी तैशैखैई बात ना कौरे सौकु थिया जैशैखै हांव आत्मिक लोगौ शै कौरु, मुखै इयौं बातौ लैई तुऔं पौछेयाण कौराणै थै कै तुऐं इयौं दुनिया शै औसौ औरौ तुऐं मसीह जीवन दै नानड़िया औसौ। 2 मोऐं तुऔं खै सिरफ पौरमेशवर कै वचन लैई बुनियादी शिक्षा दैय रैई, ना कै गैहरे सच कि, जिथुकै तैसी सौमय तुऐं ऐजी शिक्षा खै पाणौ औरौ सौमझणौ कारिए तैयार ना थी। 3 जिथुकै ऐबै बै तुऐं इयौं दुनिया कै लोगौ कै जैशणै रौंव। इथकारिए, कै जोबै तुऔं मुंजी ज़लन औरौ झोगड़े औसौ, का ऐजौ साबित ना हौंव कै तुऐं पाप वाल़ी इछा कै काबू दै औसौ? तुऐं दुनिया कै लोगौ कै जैशणै जियौं जू प्रभु कै ना आथी। 4 इथकारिए कै जोबै ऐक बौल़ौ, “हांव पौलुस का औसौ,” औरौ दूजा, “हांव अपुल्लोस का औसौ,” तौ तुऐं दुनिया कै लोगौ कै जैशणै जिंदै लागै रौवै जू प्रभु कै ना आथी? पौरमेशवर कै दासो कै बारै मुंजी 5 तौ तोबै अपुल्लोस कुण औसौ? औरौ पौलुस कुण औसौ? सिरफ सेवक औसौ, जिथकी बौजैह शै तुऐं लोगै मसीह पांदी बिशवाश कौरे राए, आमु मुंजीदै सौबीए सैजाई काम कौरा जू पौरमेशवरे आमु कौरणौ कारिए दैय राए। 6 तुऔं पौरमेशवर का सुसमाचार शुणाणौ वाल़ा हांव आगला आदमी थिया, इथकारिए हांव तैसी आदमी साए औसौ, जैसीए खेतौ दौ बिज़ छिड़कु। तिथकै बाद, अपुल्लोसे तुऔं तोंवारै बिशवाश दै मोजबूत हौणौ कै मौदद कौरे, ठीक तैशैखैई जैशै कुणिए ओका आदमी तिनु पौधे खै पाणी दैंव जू बौढ़दै लागै रौवै। पौरौ पौरमेशवरे तुऔं नौवाँ जीवन दैय राए औरौ तुऔं आत्मिक रुप शै बौढ़णौ खै मौदद कौरे लोए, जैशैखै पौरमेशवर पौधे खै बौढ़ाव। 7 इथकारिए जू पौधे लांव औरौ जू पाणी दैंव तिथका कुणजाई मतलब ना आथी। इकली पौरमेशवर बौड़ा औसौ, जिथुकै सै औसौ जू पौधे कै बौढ़णौ कै बौजैह बौणौ। 8 मोऐं तुऔं सुसमाचार शुणौऊवा औरौ पौरमेशवर कै वचन खै शिखाणा शुरु कौरा औरौ अपुल्लोसे तुऔं पढ़ाणा जारी राखा पौरौ आमु दु का ऐकैई मकसद औसौ। जू पौधे लांव तैसकै धियाड़ी औरौ जू पाणी दैंव तैसकै धियाड़ी ऐक जैशणै औसौ, औरौ इनु दु खै पौरमेशवर इनाम दैंदा जू तिनुऐ कौरे राए। 9 आमै पौरमेशवर कै साथै काम कौरणौवाल़ै औसौ; औरौ तुऐं कुरिन्थुस शहर कै बिशवाशी ऐकी बागड़ी साए औसौ जू पौरमेशवर कै औसौ। औरौ इथकै साथै, हांव तुंआरी तुलना ऐकी घौरौ शै कौरे सौकु जिथुखै पौरमेशवरे बाणै लौ। 10 पौरमेशवरे जू वरदान मुखै दैय राए, तिथका इस्तैमाल कौरदै बैई मोऐं तिथु घौरौ कै नीयुं ऐकी बुध्दिमान राजमिस्तरी साए राखै। औरौ औकै लोगै तियौं नीयुं पांदी काम छैड़ राए, पौरौ सौबी लोगौ खै चौकश रौणौ चैंई कै तिथपांदी कैशै काम छैड़ राए। 11 कोसी खै बै तुऔं बौचाणौ का नौवाँ तरीका ना शिखणा चैंई। बौचाए जाणौ का एकमात्र रास्ता यीशु मसीह ही औसौ, जू मोऐं आगै ही तुऔं बौताए राए थिया: पौरमेशवर आमु यीशु मसीह कै जरिए शै बौचांव। 12 जै मसीह सेवक सोही शिक्षा शिखांव जू पौरमेशवरे तिनु दैय रैई, तौ सै तैसी घोर बाणणौवाल़ै कै जैशणै औसौ जू सूनु, चांदी या कीमती पाथरो जैशणै आछै गुणो वाल़ै सामान का इस्तैमाल कौरेयौ नीयुं कै बाणौ। पौरौ जै सै झूठै शिक्षा शिखांव, तौ सै तैसी घोर बाणणौवाल़ै कै जैशणै हौंव, जू लाकड़ी, घास औरौ पराल जैशणी खराब गुणो वाल़ै सामान का इस्तैमाल कौरौ। 13 पौरौ न्याय कै दूसै जोबै मसीह औटेयौ पाछु आन्दा, तौ आग सौबी आदमी कै कामौ कै गुणो कै दिखांदी। जै कोसी आदमी कै कामौ कै कुणजै कीमत औसौ तौ सैजौ आग दिखांदी। 14 जै कोसी सेवके नीयुं पांदी जू काम कौरे राए, सैजा काम बोणेयोंदा रौंव, तौ सै मौजदूरी पांदा। 15 जोबै मसीह बौल़ौए कै ऐक सेवके जू कौरे राए सैजौ ठीक ना आथी, तौ मसीह तैसी आदमी कै इनाम ना दैंदा। हालांकि, सै तियौं सौदा कै जिन्दगी खै ना खौंदा जू पौरमेशवरे तैसी दैय राए। 16 हकीकत दो तुऐं जाणौए कै तुऐं खुद ही पौरमेशवर का मन्दिर औसौ, औरौ पौरमेशवर का आत्मा तुऔं दा वास कौरौ। 17 जू कुणिए बै पौरमेशवर कै लोगौ कै एकता कै नाश कौरौ, पौरमेशवर बै तैसी नाश कौरदा, जिथुकै तुऐं पौरमेशवर कै पवित्र मन्दिर औसौ। सांसारिक ज्ञान शै बौचौ 18 जै तुऔं मुंजीदै कुणिए बै इयौं दुनिया कै लोगौ कै राय दै सौमझदार औसौ, तौ तुऔं इयौं दुनिया कै लोगौ कै राय मुंजी आपी खै मूर्ख बाणणा पौड़दा, ताकि आमु पौरमेशवर कै राय दै सोही मायनै दै सौमझदार बौणै सौकु। 19 जिथुकै इयौं दुनिया कै लोगौ कै सोंच चलाक औसौ। जैशै पवित्र शास्त्र दो लैखै राए, “पौरमेशवर बुध्दिमान लोगौ कै चतुराए का इस्तैमाल तिनु पाकड़णो कारिए ऐक जाल कै रुपो दा कौरौ। 20 पवित्र शास्त्र बै बौल़ौए, प्रभु ज्ञानियों कै विचारो खै जाणौए, कै सै बैकार औसौ।” 21 इथकारिए ऐक कोसी बै अगुवे का पालन कौरणौ कै बारै मुंजी घमण्ड कौरणा बंद कौरौ, जिथुकै पौरमेशवरे सौबै ठुँ तोंवारै भोलाए कारिए दैय राए। 22 इथकारिए हांव पौलुस, औरौ अपुल्लोस, औरौ पतरस (कैफा) का औसौ इयौं दुनिया कै चीज़ौ, चाहै तुऐं जियुंदी रौंव, या मौरे जांव, का इबी का सौमय, का आणौवाल़ा सौमय, जिथुकै पौरमेशवरे सौबै ठुँ तोंवारै भोलाए कारिए दैय राए। 23 औरौ तुऐं मसीह कै औधिकार कै अधीन औसौ, औरौ मसीह पौरमेशवर कै औधिकार कै अधीन औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation