1 कुरिन्थियों 2 - सिरमौरी नौवाँ नियमक्रूसो पांदी कै मसीह कै बारै मुंजी सौंदेश 1 ओए रै बिशवाशी भाईयों, हांव तोंवारै इथै ना तौ बातौ कै चतुराए का इस्तैमाल कौरदा ओऊवा औरौ ना ही उतम ज्ञान कै बौताणौ कारिए, पौरौ हांव तोंवारै इथै पौरमेशवर कै भैद कै बारै मुंजी बौताणौ कारिए ओऊवा। 2 जिथुकै मोऐं ऐजौ ठाणै राए थियु, कै हांव यीशु मसीह औरौ तैसकै क्रूसो कै मौत कै अलावा कोसी बै औकै मुदै कै बारै मुंजी ना जाणु। 3 औरौ हांव कमजोरी औरौ डौर कै साथै, औरौ बैजाए काम्बलेबा तोंवारै साथै रौआ। 4 औरौ मैरी शिक्षा औरौ मैरा प्रचार आदमी कै ज्ञान कै चलाकी औरौ शिखाणौ वाल़ै बातौ कै साथै ना आथी, पौरौ पवित्र आत्माए तुऔं ऐक शौकतीशाली तरीकै लैई दिखोऊ कै जू सौंदेश मोऐं तुऔं बौतौऊवा सैजा साचा थिया। 5 ताकि तोंवारा बिशवाश आदमी कै ज्ञान पांदी नी, पौरौ पौरमेशवर कै अनौखी शौकतै पांदी रौंव। पौरमेश्वर का ज्ञान 6 तोबै बै जोबै हांव आत्मिक रुप शै मोजबूत बिशवाशियौं कै बीच मुंजी रोऊं, तोबै हांव ज्ञान कै शब्दो कै साथै बुलू। पौरौ ऐजा ज्ञान संसारिक औरौ इयौं दुनिया कै हाकिमो का ना आथी; जिनका नाश हौणौवाल़ा औसौ। 7 पौरौ आमै जैसी ज्ञान कै बात कौरु, सैजा ज्ञान पौरमेशवर का ज्ञान औसौ जू छिपैयौंदा औसौ। इबी तौड़ी कुणिए बै ऐसी ज्ञान कै ना सौमझौ थिए। इदै आगै कै पौरमेशवरे धोरती बाणै, तैणै आगै दा ही आपणै ज्ञान लैई फोयसला लौए राए थिया कै सै आमु आपणै महिमा दैंदा। 8 इयौं दुनिया कै हाकिमै पौरमेशवर कै योजना खै ना सौमझी, जिथुकै जै सै जाणदै, तौ तेज़ोमय प्रभु खै क्रूसो पांदी नै चौढ़ांदै। 9 पौरौ पवित्र शास्त्र का ऐजाई मतलब औसौ कै जोबै सैजै बौल़ौए, “जू कौलोंई आखो लैई ना दैखी, जू कौलोंई कानो लैई ना शौणै रैई, औरौ जू आदमी कै दिलो दु ना उतरी, सैजौ सौबै पौरमेशवरे तिनु कारिए, जू प्रभु आरी प्यार कौरौ, तैयार कौरे राए।” 10 पौरौ पौरमेशवरे इनु बातौ खै आमु पांदी यानी चोणेयौंदे चैलै पांदी इनु चीज़ौ खै आपणै पवित्र आत्मा कै दवारा प्रकट कौरी; जिथुकै ऐशणौ किछै ना आथी जू पौरमेशवर कै आत्मा खै पौता नै हौली। इथै तौड़ी कै पौरमेशवर कै डुंगै विचारो खै बै सै ठीक शै जाणौ। 11 आदमियों मुंजी कुण कोसी आदमी की बातौ जाणौ, सिरफ आदमी कै आत्मा जू तैसदै औसौ, तैशैखैई सिवाए पौरमेशवर कै आत्मा कै ओका कुणिए बै पौरमेशवर कै विचारो खै ना जाणै सौकौ। 12 आमु दुनिया कै आत्मा नी पौरौ सैजी आत्मा भैटी रौए, जू पौरमेशवर कै ढौबौशी औसौ कै आमै सैजौ सौबै जाणै सौकु, जू पौरमेशवरे आमु दया शै दैय राए। 13 औरौ इथकारिए आमु इनु बातौ खै ओकी लोगौ खै बौतौऊं, तौ आमै इनु शब्दो का इस्तैमाल ना कौरु, जू आदमी कै ज्ञान शै भैटौ, पौरौ आमै तिनु शब्दो का इस्तैमाल कौरु जू पवित्र आत्मा लैई भैटौ, जू आत्मिक ज्ञान लैई आत्मिक बातौ कै सौमझांव। 14 पौरौ शारीरिक आदमी पौरमेशवर कै आत्मा की शिक्षाओं खै ना मानौ, जिथुकै सैजी तैसकै नोज़रो दी मूर्खता की बातौ औसौ, जिथुकै ऐक आदमै पवित्र आत्मा कै शिखाएयौंदी बातौ कै जांच तोबैई कौरे सौकौ, जोबै तैसदै पौरमेशवर कै आत्मा रौंव। 15 सैजै लोग जिनुवै पवित्र आत्मा पाए राए सैजै तिनु चीज़ौ खै सौमझै सौकौ जू पवित्र आत्मा शिखांव। पौरौ जिनु लोगौ कैंई पवित्र आत्मा ना आथी सैजै तिनु लोगौ कै विचारो खै ना सौमझै सौकौ जिनु कैई पवित्र आत्मा औसौ। 16 ऐजौ साचौ औसौ जिथुकै जैशैकै पवित्र शास्त्र दो बौल़ै राए, “कुणिए बै ऐजौ ना जाणै सौकौ कै प्रभु कै मनो दौ का औसौ। कुणिए तैसी शिखाए ना सौकौ।” पौरौ आमै बिशवाशी सौमझुए कै मसीह कै मनो दौ का औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation