1 कुरिन्थियों 15 - सिरमौरी नौवाँ नियम

यीशु का सुसमाचार

¹ ओए रै बिशवाशी भाईयों, हांव तुऔं सैजाई सुसमाचार याद दियोऊं, जू आगै शुणाए राए, जू तुऐं अपनाए राए थिया, औरौ जिथमुंजी तुऐं भोरोशा कौरणा जारी राखा।

² जै तुऐं तैसी सुसमाचार पांदी बिशवाश कौरणा जारी राखौ जिथका मोऐं तुऔं मुंजी प्रचार कौरा, तौ पौरमेशवर तुऔं बौचांदाए। नही तौ तोंवारा बिशवाश कौरणा बैकार हौंदा।

³ मोऐं सैजा सौबिदा खास सौंदेश बौतौऊवा जू मुखै प्रभु यीशु शा भैटी रौआ थिया। सैजा सौंदेश ऐजा औसौ, पवित्र शास्त्र कै हिसाब शै अमारै पापौ कै खातिर मसीहे प्राण कै दैय राए।

⁴ सै धोरती दा दफनाए गौआ; पवित्र शास्त्र कै हिसाब शै तिजै दूसै सै मौरेयौंदे मुंजीदा जियुंदी हौआ।

⁵ औरौ आगै पतरस (कैफा) खै तोबै बारौ चैलै खै ऐक साथै दैखिया।

⁶ तोबै पाँच सौ शै जादा चैलै खै ऐक साथै दैखिया, जिनु मुंजीदै बौहितै सारै इबी तौड़ी जियुंदी औसौ, पौरौ किछै मौरे गौवै।

⁷ तोबै याकूब कै दैखिया तोबै सौबै चोणेयौंदे चैलै खै दैखिया।

⁸ औरौ सौबी कै बाद मैरै बै दैखिया, जू मानौ ऐक ऐशणै नानड़िया कै जैशणा औसौ जैसकै पौयदा हौणा का मीहना नै थी।

⁹ जिथुकै हांव चोणेयौंदे चैलो मुंजीदा सौबिदा कम खास औसौ, सौथी कै चोणेयौंदा चैला बोल़णो कै लायक बै ना आथी, जिथुकै मोऐं पौरमेशवर कै कलीसिया दै बिशवाशियौं खै सोताए राए थिए।

¹⁰ इथकारिए हांव पौरमेशवर कै अनुग्रह लैई चोणेयौंदा चैला औसौ। औरौ तैसकै अनुग्रहे शै मैरै जीवन दा बोड़ा बदलाव आया। मोऐं औकै कोसी बै चोणेयौंदे चैलै शै बौढ़ेयौ मैहनत बै कौरे, तौ बै ऐजौ मैरै ढौबौशौ ना आथी पौरौ पौरमेशवर कै अनुग्रह मुखै तैसका काम कौरणौ दै मौदद कौरे।

¹¹ इथकारिए चाहै हांव होऊं, चाहै औकै चोणेयौंदे चैलै हौंव, आमै सौबीए मसीह कै बारै मुंजी ऐकैई सौंदेश का प्रचार कौरा, औरौ इथी पांदी तुऐं बिशवाश बै कौरा।

अमारै मौरेयौंदे मुंजीदु जियुंदी हौणौ

¹² इथकारिए ऐबै हांव तुऔं कैईंदु ऐजौ पूछणु चोऊं: जिथुकै आमै सौबीए तुऔं मुंजी ऐजाई प्रचार कौरे राए कै जोबै मसीह मौरे गौआ तौ पौरमेशवरे तैसी औटेयौ मौरेयौंदे मुंजीदा जियुंदी कौरे दिया।

¹³ जोबै मौरेयौंदे का औटेयौ मौरेयौंदे मुंजीदा जियुंदी हौणा ही ना आथी, तोबै मसीह बै जियुंदी ना हौए रैई।

¹⁴ औरौ जै मसीह खै मौरेयौंदे मुंजीदा ना बिजाल़ै रैई, तौ जैसी सुसमाचार का आमु प्रचार कौरु तौ इथका औरौ मसीह दै तोंवारै बिशवाश का कुणजाई मतलब ना आथी।

¹⁵ जै मौरेयौंदे कै जियुंदी ना कौरौ, तौ आमुए ऐजौ बौलेयौ पौरमेशवर कै बारै मुंजी तुऔं कैंई झूठु बौल़ै राए कै तैणै मसीह खै जियुंदी कौरे राए थिया, जोबै कै सौथीखै तैणै ऐशै ना कौरी।

¹⁶ हांव औटेयौ बुलू, जै कुणिए बै मौरेयौंदे मुंजीदै जियुंदी ना हौंव, तौ औटेयौ मसीह खै बै जियुंदी ना कौरे रैई।

¹⁷ औरौ जै मसीह जियुंदी ना हौए रैई, तौ मसीह दै तोंवारै बिशवाश का कुणजाई मतलब ना आथी; औरौ तुऐं ऐबै बै आपणै पापौ दै जिंदै लागै रौवै।

¹⁸ जै मसीह मौरेयौंदे मुंजीदा ऊबा ना बिज़ रैई, तौ जू बिशवाशी मौरे गौवै, तिनु बौचाए ना रैई, बल्कि सै नाश हौए गौवै, औरौ सै सौदा कारिए पौरमेशवर शै जौई हौए गौवै।

¹⁹ जै मसीह दी अमारै आशा सिरफ ऐसी जीवन कै खातिर औसौ, तौ आमु पांदी दुनिया दा ओकी लोगौ कै मुकाबलै जादा तरस हौणा चैंई।

²⁰ पौरौ सौचाई ऐजी औसौ कै पौरमेशवरे सौथीखै मसीह खै मौरेयौंदे मुंजीदा जियुंदी कौरा, इयौं आशा लैई सै तिनु लोगौ कै बै जियुंदी कौरदा जू मौरे गौवै।

²¹ तौ तुऐं दैखौ, कै जैशै ऐक मर्द आदम कै दवारा इयौं दुनिया दी मौत आए गौए, औरौ ऐबै मौरेयौंदे मुंजीदै जियुंदी पाछु आणौ बै ऐक औकै मर्द यानी मसीह कै दवारा शुरु हौए गौ।

²² ऐक आदमै यानी आदम कै पाप की बौजैह शै सारै मानव जाति कै मौरणौ पौड़ौ। तैशैखैई ऐक आदमी यानी यीशु मसीहे जू कौरौ तिथकी बौजैह शै, सौबै मौरेयौंदे खै औटेयौ जियुंदी कौरदै।

²³ पौरौ हरेक आदमी बारी-बारी शै जियुंदी हौंदा: मसीह पौयला आदमी थिया जैसी जियुंदी कौरा तोबै जौल़ौ मसीह पाछु आन्दा तौ सैजै सौब जू तैसकै करीब रौंव मसीह दै तिनु औटेयौ जियुंदी कौरदै।

²⁴ तोबै, जोबै मसीह पौरमेशवर का विरोध कौरणौवाल़ी सारी बुरी शौकतै का नाश कौरे दैंदा, तिथकै बाद दुनिया का अंत हौए जांदा। तोबै मसीह आपणै पिता पौरमेशवर खै आपणा राज्य सौंपै दैंदा कि सै सोबी पांदी पूरी तरह शै राज कौरौ।

²⁵ जिथुकै मसीह खै राजा कै रुप दा तांव तौड़ी शासन कौरणा पौड़दा, जांव तौड़ी कै पौरमेशवर तैसकै सारै बौईरी खै पूरी तरह शै हराए नै दैंव।

²⁶ सौबी कै अंत दा मौत का नाश हौला, जिथु मौत सौबी कि दुशमन औसौ।

²⁷ जोबै पवित्र शास्त्र बौल़ौ कै पौरमेशवर सौबै ठुँ तैसकी शौकतै कै अधीन कौरे दैंदा तौ इथमुंजी पौरमेशवर शामिल ना आथी जिथुकै ऐजा पौरमेशवर ही थिया जैणै सौबै ठुँ मसीह कै शौकतै कै अधीन कौरे राए थियु।

²⁸ जोबै सौब ठुँ पौरमेशवर कै बैटै कै औधिकार कै अधीन हौए जालो, तौ बैटा खुद खै पूरी तरह शै पौरमेशवर कै औधिकार कै अधीन कौरे दैंदा, जैणै तैसी सैजा औधिकार दैय राए। तोबै सिरफ पौरमेशवर ही प्रभु औसौ जू सौब ठुँ औरौ सौबिदा काम कौरौ।

²⁹ जै मौरेयौंदे खै जियुंदै ना कौरलै, तौ सैजै लोग का कौरदै जू लोग निशान कै तौर पांदी मौरेयौंदे कारिए बपतिस्मा लोंव? पौरौ इथलैई तिनु कुणजाई फायदा ना हौंदा। जै मौरेयौंदे सौथी कै औटेयौ जियुंदै ना हौंदै, तौ सै तिनकै तिनु भोवारो खै किथु मानौ?

³⁰ जिथै तौड़ी अमारै बात औसौ, जै मौरेयौंदे खै जियुंदी ना कौरे रैई, तौ आमुए खुद खै खतरै दै पाणौ कै मूर्खता कौरे राए।

³¹ ओए रै बिशवाशी भाईयों, हांव हर दूस मारै जाणौ कै खतरै दा औसौ। ऐजौ साचौ औसौ कै मुखै तुऔं पांदी गर्व औसौ कै तुऐं अमारै प्रभु यीशु मसीह कै साथै एकजुट औसौ।

³² इथै इफिसुस शहर दै, मैरै बौईरी खतरनाक जानवरो कै जैशणै औसौ, जू मुखै नुकसान पोऊंचाणा चांव। मोऐं ऐबै बै ऐजौ सौबै किथु सौय लौ, जै मैरा इनाम इयौं दुनिया दा ही औसौ। जै ऐजौ साचौ हौंदौ कै मुखै आखरी दूसौ दा औटेयौ जियुंदी ना कौरे जांदा, तौ आछौ हौंदौ कै हांव मौज़ै कौरदा, जैशैकै ऐजै कहावत औसौ, “आव आमु खोऊं पियुं जिथुकै शायद दोतियो आमु मौरे जांदै औरौ सैजा अमारा अंत हौंदा।”

³³ जू लोग ऐशणी बातौ कौरौ तिनकै दवारा मूर्ख ना बौणौ बुरी संगति आछै चरित्र खै बिगाड़ै दैंव।

³⁴ होशो दै आव औरौ पाप कौरणा छोड़े दैव, ऐजौ मोऐं तुऔं खै बैज्जित कौरणौ कारिए ही बौल़ै लौ, जिथुकै तुऔं मुंजीदा कोसी का पौरमेशवर कै साथै सोही रिशता ना आथी।

आमु कैशणा शोरीर भैटदा?

³⁵ औरौ जै, उदारण कारिए कुणिए पूछौ कै पौरमेशवर मौरेयौंदे खै कैशै जियुंदी कौरदा, या तिनका शोरीर कैशणा हौंदा।

³⁶ ओए रै मंदबुध्‍दि, जू किछै तुऐं बौंए, तौ पौधा बौणणौ दै आगै बीज़ मौरे जांव।

³⁷ जू किछै बै तू बौंए, चाहै गियुँ हौंव या किछै औकौ, ऐजौ सिरफ ऐक बीज़ औसौ। तौ तुऐं आगै दै ही जामैयौंदा पौधा ना लान्दै।

³⁸ पौरमेशवर पौधे खै सैजाई रुप दैंव जू सै तैसकै खातिर चांव। हर भान्त का बीज़ आपणै ही रुपो दा बौढ़ौ।

³⁹ औरौ दुनिया दै सौबै लोग कैई-कैई भान्त कै जिंदै प्राणीयों कै शोरीर ऐक जैशणै ना आथी। आदमी कै शोरीर जानवर कै शोरीर कै जैशणै ना आथी। चुड़कुल़ै कै शोरीर बै माछी कै शोरीर शै जौई औसौ।

⁴⁰ इथकारिए गौयण दी चीज़ौ, जैशै सुरज, चांद औरौ तारै, सैजै धोरती पांदी कै चीज़ौ कै जैशणै ना आथी: गौयणै कै चीज़ौ का तैज जौई हौंव औरौ धोरती कै चीज़ौ का तैज जौई हौंव।

⁴¹ सुरज कौ पेयाशो औकौ भान्त कौ हौंव, चांद कौ औकौ भान्त कौ औरौ तारै कौ औकौ भान्त कौ औरौ हरेक तारै कौ पेयाशो औकी तारै कै पेयाशै शै जौई हौंव।

⁴² तौ ऐशैखैई मौरेयौंदे लोगौ कै औटेयौ मौरेयौंदे मुंजीदा जियुंदी हौणौ हौंदौ। जैसी शोरीर खै सै दफनांव, सैजाई ऐशणा शोरीर औसौ जू शोड़े जांव, पौरौ जोबै ऐजा शोरीर औटेयौ जियुंदी हौला तौ ऐजा ऐक ऐशणा शोरीर हौंदा जू शोड़े ना सौकौ।

⁴³ जोबै आमै मौरे जोऊं, तौ अमारा शोरीर बैकार औरौ कमजोर हौए जांव। पौरौ जै सै जीवन दै पाछु आंव, तौ सै सुन्दर औरौ मोजबूत हौए जांव।

⁴⁴ जोबै शोरीर खै दबाया जांव, तौ ऐजा ऐक कुदरती शोरीर औसौ; पौरौ जोबै सै औटेयौ जियुंदी हौंव, तौ आत्मिक शोरीर हौंदा। जै ऐक कुदरती शोरीर औसौ तौ आत्मिक शोरीर बै औसौ।

⁴⁵ पवित्र शास्त्र दो ऐजौ बै लैख राए कै, “इयौं धरती पांदी आगला आदमै,, जियुंदी प्राणी बौणा” औरौ आखिर का आदमी, जू कै मसीह औसौ, ऐजा सैजाई औसौ जू सौदा कै जिन्दगी दैंव।

⁴⁶ आगै मांस औरौ लोऊ वाल़ा शोरीर पोएदा ओऊवा, तोबै सैजा शोरीर जिनु पौरमेशवर कै आत्मा कै दवारा जीवन दैय राए।

⁴⁷ आगला आदमी जू आदम थिया, धोरती पौरैशा यानी माटी लैई बौणेयौंदा थिया। मसीह जू कै दूजा आदमी औसौ, स्वर्ग पौरैशा ओऊवा।

⁴⁸ आदम कै पीढ़ी बै माटी लैई बौणैयौंदे औसौ, जैशै सै थिया। पौरौ सैजै लोग जू स्वर्ग कै आदमी यीशु मसीह का पालन कौरौ, सैजै तैसकै जैशणै औसौ।

⁴⁹ औरौ जैशैखै पौरमेशवरे आमुखै तैशणा शोरीर दैय राए जैशै धोरती कै आगलै आदमी का थिया, तैशैखैई आमु बिशवाशियौं कैंई मसीह कै जैशणा शोरीर हौंदा, जू ऐबै स्वर्ग दा औसौ।

⁵⁰ ओए रै बिशवाशी भाईयों, इयौं धोरती पांदी अमारै शोरीर मांस औरौ लोऊ लैई बौणै रौवै; आमु स्वर्ग दै पौरमेशवर कै राज्य दै आपणै ऐसी शोरीर कै साथै ना रौए पांदै जू मौरे सौकौ, जिथुकै तिथै कुणजै मौत ना आथी।

⁵¹ शुणौ! हांव तुऔं पांदी ऐक भैद प्रकट कौरु: आमै सौबै सोतै ना जांदै पौरौ आमु सौबी का रुप बौदलै जांदा।

⁵² ऐजौ एकदम हौंदौ, ऐतरो तावल़ो जैतरी तावल़ी कुणिए आखी झौपकौ। जोबै आखरी तुरही बौजाए जांदी तौ जू लोग मौरे गौवै सैजै सौदा कै जिन्दगी जिणौ कारिए औटेयौ जियुंदी हौंदै औरौ आमै जू जियुंदी औसौ, अमारै शोरीर बौदलै जांदै।

^53-54 जोबै अमारा ऐजा शोरीर जू आसानी शै मौरे जांव औरौ शोड़े जांव, “तैसी ऐक ऐशणै शोरीर दो बौदल़णौ चैंई जू ना कौलोंई मौरौ औरौ ना कौलोंई शौड़ौ।

⁵⁵ ऐशैखैई, पवित्र शास्त्र दौ जू लैखै राव, सैजौ पूरु हौंदौ। ओए रै मौत! कुकै औसौ तैरी जीत? औरौ ओए रै मौत! कुकै औसौ तैरा डंक?”

⁵⁶ जिथुकै पाप ऐशणा डंक औसौ जिथका नतीजा मौत हौं, औरौ मूसा कै कानून पापौ कै बौढ़णौ कारिए शौकतै दैंव।

⁵⁷ पौरौ पौरमेशवर का धन्यवाद हौंव, जू अमारै प्रभु यीशु मसीहे अमारै खातिर कौरे राए तिथकै दवारा पौरमेशवरे आमु पाप औरौ मौत पांदी जीत दैय राए।

⁵⁸ इथकारिए ओए रै बिशवाशी भाईयों, प्रभु कै खातिर आपणै बिशवाश दै मोजबूत रौव। औरौ प्रभु कै खातिर जू काम तुऐं कौरौए तिथमुंजी आपी कै कुरबान कौरौ। जिथुकै तुऐं जाणौए, कै तोंवारै मैहनत बैकार ना आथी।