1 कुरिन्थियों 14 - सिरमौरी नौवाँ नियमअन्य भाषा औरौ भविष्यवाणी 1 इथकारिए प्यार का स्वभाव राखदै बैई आत्मिक वरदानो कै बौड़ै इछा कौरदै रौव खास कौरेयौ पौरमेशवर कै बातौ बौताणौवाल़ै कै वरदान कै। 2 जिथुकै सैजा जू ओकी भाषा दै विचार प्रकट कौरौ, आदमी शै नी, पौरौ पौरमेशवर आरी बातौ कौरौ, सौचाई तौ ऐजै औसौ कै कुणिए बै शुणणौ वाल़ा तैसकै भाषा ना सौमझौ जिथुकै सै पवित्र आत्मा कै शौकतै कै दवारा छिपैयौंदी बातौ खै बौल़ौ। 3 पौरौ जू हौणौवाल़ी बातौ कौरौ, सै बिशवाशियौं खै बिशवाश दै मोजबूत कौरणौ, हौंसला बौढ़ाणौ औरौ तसल्ली दैणौ दै मौदद कौरौ। 4 पौरौ जू ओकी भाषा दी बातौ कौरौ, सै सिरफ आपणैई बिशवाश खै मोजबूत कौरौ पौरौ जू पौरमेशवर कै बातौ बौतांव, सै कलीसिया कै बिशवाश खै मोजबूत कौरौ। 5 हांव चोऊं कै तुऔं मुंजी हरेक खै ओकी भाषाओं दी बात कौरणौ कै काबलियत भैटौ पौरौ इथकै बजाय आछौ ऐजौ हौंदौ कै तुऔं हौणौवाल़ी बातौ कै कौरणौ कै काबलियत भैटौ; जिथुकै सै जू हौणौवाल़ी बातौ कौरौ, तिनु औकै भाषा बौलणोवाल़ै शै आछै औसौ, जिथुकै औकै भाषा का अनुवाद कौरणौ पांदी ही कलीसिया कै बोढ़ोतरी होए सौकौ। जौई-जौई भाषा का मतलब बोताया जाणा चैंई 6 इथकारिए ओए रै बिशवाशी भाईयों जै हांव तोंवारै धोरे आऐबा औकै भाषा दी बातौ कौरु, तौ मुं कैईंदा तुऔं का फायदा औसौ? पौरौ जै हांव तुऔं कारिए पेयाशो या किछै खास ज्ञान लियोऊ या हौणौवाल़ी बातौ या शिक्षा दियु, सै तुऔं कारिए फायदैमंद हौन्दी। 7 ऐशैखैई जोबै तुऐं बाँशुड़ी औरौ वीणा जैशै गाजै-बाजै बौजांव, जै तुऐं धुन ठीक शै ना बोजांव तोबै औकै कैशैकै पौयछाणदै कै सै बाँशुड़ी औसौ या वीणा? कोसी कै पौता ना चालदा कै सै का धुन बोजांव। 8 लौड़ाई दै जै तुरही की आवाज़ साफ ना शुणियों, तौ सैनिक लौड़ाई लोड़नो कारिए तैयार ना हौए सौकौ। 9 ऐशैखैई, जोबै तुऐं ऐशणै शब्द बौल़ौ जिनुखै लोग सौमझै ना सौकौ, तौ सैजौ हावा आरी पौल़णौ जैशणौ औसौ औरौ जू तुऐं बौल़ै लौ तिथकै कुणजै कीमत ना हौंदै। 10 इयौं धोरती पांदी बौहितै सारी जौई-जौई भाषा औसौ, औरौ हर भाषा का मतलब औसौ। 11 पौरौ जै आमै तियौं भाषा कै ना सौमझु, जू ओकीए बौल़ै लोए, तौ ऐजौ ऐशै हौन्दौ मानौ सै आमु कारिए विदेशी जैशणै औसौ, औरौ आमै तिनु कारिए विदेशी जैशणै हौन्दै। 12 इथकारिए जिथुकै ऐजै तोंवारै इछा औसौ, कै तुऔं कै पवित्र आत्मा दवारा दैय जाणौवाल़ै काबलियत कै दैय जांव, इथकारिए जू तुऐं मांगोए ऐजौ ऐशै हौणौ चैंई जिथलैई तुऐं सौबी बिशवाशी कै बिशवाश खै मोजबूत कौरे सौकौ। वरदानो कै धुन दै रौव, औरौ ऐशणै कौचिश कौरौ कै तोंवारै वरदानो कै बोढ़ोतरी शै कलीसिया कै बोढ़ोतरी बै हौं। 13 इयौं बौजैह शै जू जौई-जौई भाषा पांव, तौ सै प्रार्थना कौरौ, कै जू सै बौल़ौ तिथका मतलब खुद सौमझाए पांव। 14 इथकारिए जोबै हांव जौई-जौई भाषा दै प्रार्थना कौरु तौ मैरै अन्तरआत्मा प्रार्थना कौरौ, पौरौ मैरी बुध्दि काम कौरणा बंद कौरे दैंव, 15 इयौं बौजैह शै, हांव पवित्र आत्मा लैई प्रार्थना कौरणा चोऊं, पौरौ हांव ऐजौ बै चोऊं कै औकै लोग ऐजौ सौमझौ कै मोऐं का कौरे लो। औरौ जोबै हांव गौऊं, तौ हांव चोऊं कै मैरौ गाणौ पवित्र आत्मा कै ढौबौशौ हौंव, पौरौ ऐजौ बै जौरुरी औसौ कै मोऐं जू गाए लो सै ओकी कै बै सौमझ मै आंव। 16 मान पाव कै कुणिए सीधा साधा आदमै तोंवारै आराधना दा आए रौआ, जोबै तुऐं आपणै आत्मा लैई पौरमेशवर कै स्तुति कौरे लौए। जै सै तोंवारै बातौ कै ना सौमझौ, तौ तोंवारै पौरमेशवर खै धन्यवाद दैणौ कै बाद, तैसी कैशै पौता चालदा कै आमीन कोलो बौलणौ जिथुकै सै ना सोमझो कै तुऐं का लो बुली। 17 पौरमेशवर कै खातिर तोंवारा धन्यवाद अनौखा या बैजाए बढ़िया हौए सौकौ पौरौ इथलैई ओकी खै आपणै बिशवाश दै मोजबूती ना भैटदी। 18 हांव आपणै पौरमेशवर का धन्यवाद कौरु, कै हांव तुऔं सौबी कै तुलना दौ सौबी दौ जादा बिस्ती तौड़ी जौई-जौई भाषा दो बुलू। 19 कलीसिया दो मुं कारिए आछौ औसौ कै तिथै पाँच शब्द ही बुलू जू सौमझै जाए सौकौ औरौ शिखाणौ या ओकी खै सलाह दियु, बजाय मैरै शब्दो कै बौल हज़ारो हौंव पौरौ सौमझै ना जाए सौकौ। जौई-जौई भाषा अबिशवाशी कारिए निशान 20 ओए रै बिशवाशी भाईयों, इनु मामलै कै बारै मुंजी ऐक नानड़िया कै जैशणौ सुंचणौ बंद कौरौ। नानड़िया कै जैशणै निर्दोष हौया औरौ जौल़ौ ऐशणै बुराई कै बात आंव, तोलो ऐशणै मामलै खै सौमझाणौ दै सौमझदार बौणैया। 21 पवित्र शास्त्र दो लैखै राए कै प्रभु बौल़ौ, “हांव अजीब औरौ जौई भाषा बौलणौ वाल़ै विदेशी या पराए लोगौ कै जरिए, आपणै लोगौआरी बातौ कौरदा, तौ बै सै मैरौ ना शुणदै।” 22 इथकारिए जौई-जौई भाषाओं दी बातौ कौरणी बिशवाशियौं कारिए ना आथी, पौरौ अबिशवाशियौं कै खातिर निशान का रुप औसौ, पौरौ पौरमेशवर कै हौणौवाल़ी बातौ कौरणा अबिशवाशियौं कारिए नी पौरौ मसीह कै बिशवाशियौं कै खातिर ऐक निशानी औसौ। 23 जै सारै कलीसिया कौठै हौंव, औरौ हरेक आदमी जौई-जौई भाषा दै बातौ कौरदै लागौ औरौ तैसी सौमय तिथै ऐशणै आदमी जाया कौरौ, जू ऐजी भाषाए ना सौमझौ या अबिशवाशी औसौ, तौ सै जौरुर सुंचदै कै तुऐं पागल औसौ। 24 पौरौ जै सौबवे पौरमेशवर का सौंदेश बौतांदै लागौ औरौ अबिशवाशी औरौ आम आदमी भीतरै आए जांव, तौ तिनु ऐहसास हौंदा कै सै पापी औसौ, औरौ तुऐं जू बौल़ै लो, तिथकी बौजैह शै सै आपणै तरीकै बौदल़णा चांदै। 25 सै जू शुणौए तिथकी बौजैह शै सै सौमझै जांदा कै पौरमेशवर तैसकै बुरै सोंच कै बारै मुंजी का सौंचै लौ, औरौ तैसी ऐहसास हौंदा कै सै पापी औसौ औरौ सै पाप कौरणा छोड़े दैंदा। औरौ तोबै सै घुंडू पांदी आयौ पौरमेशवर कै आराधना कौरदा औरौ मानै पांदा, कै सौथीखै पौरमेशवर तोंवारै बीच मुंजी औसौ। आराधना दा अनुशासन 26 इथकारिए ओए रै बिशवाशी भाईयों, शुणौ कै कामौ खै कैशै कौरणै चैंई? जोबै तुऐं आराधना कौरणौ कारिए कौठै हौंव तौ तुऔं मुंजीदै कुणिए तौ गीत गाओ, कुणिए उपदैश दौ, कुणिए प्रभु कै दवारा दैययौंदे वचन कै प्रकट कौरौ, कुणिए जौई-जौई भाषा दी बातौ कौरेयौ तिथका मतलब सोमझाव। तुऐं जू किछै कौरौ सैजौ कलीसिया कै तरककी कारिए हौंव। 27 जिथै तौड़ी जौई-जौई भाषा दी बातौ कौरणौ का सवाल औसौ, जादा शै जादा दो या तीन आदमी ही ऐक-ऐक कौरेयौ बौल़ौ, औरौ जौरुर कुणिए तिनु भाषाओं का मतलब बौताणौ वाल़ा हौणा चैंई। 28 पौरौ जै मतलब बौताणौ वाल़ा ना हौंव, तौ जौई-जौई भाषा बौलणोवाल़ा कलीसिया दा चुपी रौंव, औरौ तिनकी बातौ तिनकै औरौ पौरमेशवर कै बीच रौंव। 29 पौरमेशवर कै बातौ बौताणौवाल़ै मुंजीदै दो या तीन बौल़ौ, औरौ ओकी कै जांच कौरणौ दैव कै का बौल़ै राए ऐजौ दैखणौ कारिए कै, ऐजौ पवित्र शास्त्र कै हिसाब शै औसौए कै ना आथी। 30 पौरौ जै सभा दै बौठैयौंदे ओकी आदमी खै पौरमेशवर शै कुणजाई सौंदेश भैटौ तौ जैणै बौल़ै लौ तैसी रुकणौ चैंई औरौ ओकी आदमी खै बौलणौ का मौका दैणा चैंई। 31 तुऐं सौब हौणौवाल़ी बातौ कौरे सौकौ, पौरौ ऐक कै बाद ऐक, ताकि सौब शिखौ औरौ हौंसला बौढ़ौ। 32 औरौ तुऐं जू हौणौवाल़ी बातौ औरौ पौरमेशवर कै वचनो खै बौल़ौ, सै आपणी आत्मा खै काबू कौरौ: सै आपणी इछा कै हिसाब शै बौलणौ या ना बौलणौ दा लायक हौं। 33 पौरमेशवर गड़बड़ी का नी, पौरौ शान्तै का पौरमेशवर औसौ। ऐजाई नियम पौरमेशवर कै लोगौ कै सौबै कलीसियाओं दा पालन हौणा चैंई। 34 कै कलीसियाओं दी बैटमाणिशौ चुपी रौंव, तिनुखै तिथै बात कौरणौ कै आज्ञा ना आथी, जू कि मूसा कै कानून कै हिसाब शै सोही औसौ कै सै अधीन बौणेयौंदी रौंव। 35 औरौ जै सै किछै औकौ शिखणु चांव या पूछताछ कौरणै या सवाल पूछणा चांव, तौ तिनु कलीसियाओं दौ नी पूछणु चैंई पौरौ घोरे आपणै घोरवाल़ै कैईंदु पूछणु चैंई। 36 ऐशै किथु औसौ कै तुऔं कुरिन्थुस कलीसिया कै लोगौ मुंजीदै किछै लोग आगलै बौतायौंदे इनु कानूनो का पालन ना कौरणा चांव? तोंवारै का जाणियौ कै तुऐं पोयलै आदमी औसौ जू पौरमेशवर कै वचन खै बांटणौ या दैणौवाल़ै औसौ? या ऐजौ सिरफ तुऔं कै ही दैय राए थियु? बिल्कुल नी। 37 जै कुणिए आदमी आपी खै पौरमेशवर कै बातौ बौताणौवाल़ा या ऐशणा आदमै सौमझौ जैसी पवित्र आत्माए वरदान दैय राए, तौ सै ऐजौ जाणै पाव कै मोऐं जू किछै तुऔं लैखै लौ, सैजी प्रभु की आज्ञाए औसौ। 38 पौरौ जै सै मैरै शब्दो पांदी बिशवाश ना कौरौ, तौ तिनु पांदी बिशवाश नी कौरेया। 39 इथकारिए ओए रै बिशवाशी भाईयों, पौरमेशवर कै हौणौवाल़ी बातौ कै वरदान कै इछा कौरदै रौंव, जौई-जौई भाषा बौलणौ शै मना ना कौरौ। 40 जू किछै बै तुऐं कलीसिया दौ कौरौ, सै प्यार शै औरौ बारी-बारी शै कौरेया। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation