1 कुरिन्थियों 13 - सिरमौरी नौवाँ नियम

प्यार सौबिदी आछै बाट

¹ जै हांव आदमी औरौ स्‍वर्गदूतौ कै भाषाओं दै बातौ कौरु पौरौ जै हांव लोगौ शै प्यार ना राखु, तौ मैरा भाषण दैणा कुणजाई मतलब ना राखौ। जैशै बासणौ कै बौज़णौ कै आवाज़ कुणजाई मतलब ना दैंव।

² औरौ जै हांव पौरमेशवर कै सौंदेश कै बौताए सौकु, औरौ सौब भेदो औरौ सौबै भान्त कै ज्ञान खै सौमझु, औरौ मैरा बिशवाश ऐशणा मोजबूत हौं कै सिरफ मैरै वचन बोल़णौ शै ही पाहाड़ आपणै जौगैह पौरैशा औखड़े जांव पौरौ हांव लोगौ आरी प्यार ना राखु तौ हांव किछै बै ना आथी।

³ औरौ जै हांव आपणै सारै जायदात कंगालो खै दैय दियु, औरौ इथै तौड़ी कै जै हांव लोगौ कै आपणा शोरीर फूंकणौ कै दैय दियु, औरौ लोगौ आरी प्यार ना राखु तौ मुखै किछै बै फायदा ना हौंदा।

⁴ जू लोग ओकीआरी प्यार कौरौ, सैजै सब्र औरौ दया कै साथै काम कौरौ, तिनु ज़लन ना हौंव, सैजै आपणै बारै मुंजी घमण्‍ड ना कौरौ औरौ ना तिनु गर्व हौंव।

⁵ सै ओकी कै साथै गौलत बर्ताव औरौ अनादर ना दिखांव, सै सिरफ खुद कै खुश कौरणौ कै बारै मुंजी ना सुंचौ, सै तावल़ै गुस्से ना हौंव औरौ तिनु तिनकै खिलाफ कौरेयौंदी बुरी बातौ याद ना रौंव।

⁶ जोबै लोग गौलत कामौ खै कौरौ तौ सै खुशी ना हौंव, पौरौ जोबै लोग सोही औरौ साची काम कौरौ तौ सै खुशी हौंव।

⁷ सै सौबै ठुँ सैय पांव, प्यार आमु हर हालत दै बिशवाश राखणौ कारिए काबिल बाणौ, प्यार आमु पौरमेशवर दै आपणै आशा बाणैयौंदे राखणौ दै मौदद कौरौ, ऐजौ पौरैशानी औरौ पीड़ो कै सौमय सब्र राखणा शिखांव।

⁸ सैजा सौमय आन्दा जोबै लोग पौरमेशवर कै सौंदेश का प्रचार ना कौरदै, या कैई भाषा ना बौलदै, औरौ पौरमेशवर कै बारै मुंजी खास ज्ञान कै तोबै जौरुरत ना हौंदै, पौरौ प्यार सौदा बौणेयौंदा रौंदा।

⁹ अमारै ज्ञान वरदान औरौ हौणै वाल़ी बातौ कै काबलियत अधूरी औसौ;

¹⁰ पौरौ जौल़ौ सैजा जू पूरी तरह शै सिध्द औसौ आला, तोलो सैजौ सौबै, जू अधूरू औसौ, मिटै जांदो।

¹¹ ऐजौ आदमी कै बौढ़ौतरी कै जैशणौ औसौ। जोबै हांव ऐक नानड़िया थिया, औरौ नानड़िया कै जैशणी बातौ कौरु औरौ सुंचौ थिया, औरौ सवाल कौरु थिया। पौरौ जोबै आमै बौड़ै हुवे तौ आमै बैतुकै तरीकै बंद कौरे दियै।

¹² आमै ऐसी जीवन दै सौबै ठुँ पूरी तरह शै ना सौमझौ। ऐजौ कोसी चीज़ कै शीशै दौ धुंधल़ो दैखणौ जैशणौ औसौ, पौरौ जोबै आमै स्वर्गो दै जोऊंबे, तौ आमै सौबै ठुँ सोही तरीकै शै सौमझदै। जिथुकै आमै पौरमेशवर खै आमणै सामणै दैखदै। इबी मैरा ज्ञान अधूरा औसौ। सिरफ आणौवाल़ै सौमय दा ही हांव पौरमेशवर खै पूरी तरह सै जाणै पांदा, जैशै पौरमेशवर आमु कै पूरी तरह सै जाणौए।

¹³ इथकारिए, ऐबै, इनु ती भान्त कै कामौ खै आमु कौरणा चैंई: पौरमेशवर पांदी बिशवाश कौरौ, पौरमेशवर कै वादै पांदी आशा राखौ, औरौ ओकीआरी प्यार कौरौ। पौरौ इनु ती बातो मुंजी दी, ओकीआरी प्यार कौरणा ही सौबिदी बौड़ी बात औसौ।