1 कुरिन्थियों 11 - सिरमौरी नौवाँ नियममुंड खोटणो कै बारै मुंजी सलाह 1 जैशैखै हांव मसीह कै जैशणी चाल चालु, तुऐं बै मैरी जैशणी चाल चालैया। 2 हांव तोंवारै तारीफ कौरु कै तुऐं हर सौमय मुखै याद राखौ औरौ तिनु शिक्षाओं खै मोजबूती शै पालन कौरौ, जैशणी मोऐं तुऔं सौंपै रैई थी। 3 पौरौ हांव चोऊं कै तुऐं सौबै बातौ जाणै पाव कै सौबी मर्दो कौ मुंड मसीह औसौ, औरौ सौबी घोरवाल़ी कौ मुंड तियौंका घोरवाल़ा औसौ, औरौ मसीह कौ मुंड पौरमेशवर औसौ। 4 इथकारिए जै कुणिए मर्द कलीसिया दै प्रार्थना कौरणौ कै सौमय या पौरमेशवर का सौंदेश शुणादै सौमय आपणै मुंडौ खै खौटौ तौ सै मसीह कै महिमा खै खौटौ। 5 पौरौ जू बैटमाणिश नांगी मुंडै कलीसिया दै प्रार्थना औरौ पौरमेशवर का सौंदेश खै बौतांव सै आपणै घोरवाल़ै कै खातिर शर्म कै बात लांव औरौ तियौंखै औरौ ऐक ऐशणी बैटमाणिश कै बीच कुणजाई अंतर ना आथी जियौं शर्मिंदा कौरणौ कारिए तियौंखै खुल़मुंडी बाणै राए। 6 जै बैटमाणिश नांगी मुंडै रौंव, तौ सै आपणै बाल़ बै कौटाए दैंव; जै बैटमाणिशौ कारिए बाल़ कौटाणै या मुंडाणै शर्म कै बात औसौ, तौ तियौं आपणै मुंडो पांदी किछै लाणौ चैंई। 7 मर्दो खै आपणौ मुंड खोटणो ठीक ना आथी, जिथुकै मर्द खै पौरमेशवर कै आकार दा बाणै राए औरौ पौरमेशवर कै महिमा खै दिखांव; ऐशैखैई बैटमाणिश आदमी कै महिमा खै दिखांव। 8 जिथुकै शुरुआत दै जोबै पौरमेशवरे, आगै मर्द औरौ बैटमाणिश कै बाणै राए थिए, तोबै आगला आदमी जैसकौ नांव आदम थियु बैटमाणिशौ पौरैशा ना हौए रैई थी, पौरौ आगली बैटमाणिश जियौंको नांव हावा थियु आदमी पौरैशै आए रौए थी। 9 पौरमेशवर दवारा मर्द बाणै जाणौ कै बौजैह शै ऐशै ना हौए रैई थी कै बैटमाणिश कैंई ऐक साथी हौंव, बल्कि तैणै बैटमाणिश बाणै ताकि मर्द कैंई ऐक साथै हौंव। 10 इयौं बौजैह शै ऐजौ जौरुरी औसौ कै ऐकी बैटमाणिश कै आपणौ मुंड खोटणो चैंई, ताकि स्वर्ग दा पौरमेशवर कै स्वर्गदूतौ खै बै पौता चालै सौकौ कै बैटमाणिश आपणै घोरवाल़ै का कैहणा मानौ। 11 तौ बै बिशवाशियौं मुंजी ना तौ बैटमाणिश मर्द शै औरौ ना मर्द बैटमाणिश शै आज़ाद औसौ। 12 बैशक पौरमेशवरे आगै मर्द शै आगली बैटमाणिश बाणै, पौरौ ऐबै मर्द खै जन्म दैणौ वाल़ी बैटमाणिशौ ही औसौ। दुईनै पौरमेशवर कै ढौबौशै आंव जैणै सौबै ठुँ बाणै राए। 13 हांव चोऊं कै तुऐं आपी ही ऐजौ तय कौरौ कै, का ऐक बैटमाणिश कारिए सभा मुंजी आराधना कौरदै बैई मुंड खोटे बिना पौरमेशवर शै प्रार्थना कौरणै सोही औसौ? 14 का कुदरती तरीकै शै बै तुऐं ना जाणौ? कै जै मर्द लाम्बै बाल़ राखौ, तौ तैसी कारिए शर्म कै बात औसौ। 15 का कुदरती तरीकै शै बै तुऐं ना जाणौ? कै जै बैटमाणिश लाम्बै बाल़ राखौ; तौ तियौं कारिए शोभा कै बात औसौ, जिथुकै बैटमाणिशौ खै कुदरती तरीकै शै लाम्बै बाल दैय राए, तैशैखैई तिनुखै सभा मुंजी आराधना दो आपणौ मुंड खौटयौ राखणौ चैंई। 16 पौरौ जै कुणिए मैरै बात शै सहमत ना आथी, तौ ऐजौ जाणौ कै अमारै औरौ पौरमेशवर कै कलीसियाओं मुंजी आमुकैंई इथुखै छोड़ेयौ ओका कुणजाई भोवार ना आथी। प्रभु भौज कै बारै मुंजी 17 तिनु मुदै कै बारै मुंजी जू मोऐं ऐबै बौल़ै लौ, हांव तोंवारै तारीफ ना कौरे सौकु, जिथुकै तोंवारै कौठै हौणौ शै भोलाए नी, पौरौ नुकसान हौंव। 18 जिथुकै सौबी दै आगलै बात ऐजै औसौ, कै मोऐं ऐजौ शौणै राव, कै जोबै तुऐं कलीसिया दै आराधना कौरणौ कारिए कौठै हौंव, तौ तोंवारै आपी मुंजी ना बौणौ, औरौ मुखै बिशवाश औसौ कै तिनकी बातौ दै किछै तौ सौचाई औसौ। 19 पौरौ निशोंक हौयौ तुऔं मुंजी बंटवारा हौणा चैंई, ताकि तुऔं लोगौ मुंजी जू पौरमेशवर कै चोणेयौंदे औसौ, तिनकी पौछेयाण हौए जांव। 20 जोबै तुऐं ऐकी ठाँव दै अमारै प्रभु यीशु मसीह कै मौत खै याद कौरणौ कारिए कौठै हौंव, तुऐं इयौं बातौ खै लोयो पौरैशान ना आथी, कै तुऔं प्रभु भौज कैशै खाणा चैंई। 21 जिथुकै मुखै बौताए राए, कै तुऔं मुंजीदै किछै ओकी कै साथै बिना बांडै आपणौ खाणा खाणौ दी जल्दबाजी कौरौ। इयौं बौजैह शै किछै भूखै हौटै जांव, जोबै कै औकै लोग नशै दै माचै जांव, ऐशणौ खाणौ पौरमेशवर कै आदर ना दैंव। 22 तुऐं आपणै घोरे खाए औरौ पी सौकौ। तुऐं सोमझो, कै पौरमेशवर कै कलीसिया खास ना आथी, औरौ तुऐं तिनु लोगौ खै शर्मिंदा कौरौ, जू गरीब औसौ। मुखै तुऔं का बौताणौ चैंई? का मुखै तोंवारै तारीफ कौरणै चैंई? हांव ऐशै काम कारिए तोंवारै तारीफ कौरु। 23 जू शिक्षा मोऐं तुऔं दैय राए थै, सैजै शिक्षा सैजी औसौ जू मोऐं प्रभु कैईंदै पाए राए थी; कै जियौं राती प्रभु यीशु पोकड़ाए गौआ तैणै रोटै कौरे, 24 औरौ धन्यवाद कौरेयौ रोटी तौड़ी, औरौ बौल़ौ, “ऐजै रोटी मैरै शोरीर खै दिखांव, जू तोंवारै उध्दार कै खातिर बलिदान कौरे जांदा: मैरी मौत खै याद कौरणौ कै खातिर ऐजौ लगातार ऐशैखैई कौरेया।” 25 ऐशैखैई जोबै तिनुऐ खाए पोऊँ थियु, यीशुए ऐक अंगूरो कै रस लैई भौरेयौंदा छाना कौरा औरौ बौल़ौ, “ऐजा छाना मैरै लोऊ मुंजी नोऐं कौरार औसौ: जौल़ौ कौलोंई पियौं, तौ मैरै याद कै खातिर ऐजौई कौरेया।” 26 हर सौमय जोबै तुऐं ऐजी रोटी खालै औरौ ऐसी छानै पौरैशौ अंगूर का रस पिलै, तौ प्रभु कै मौत खै जांव तौड़ी सै ना आंव, तुऐं प्रचार कौरौ। 27 इथकारिए जू कुणिए बै गलत तरीकै शै प्रभु कै रोटी खांव, या तैसकै छानै पौरैशौ अंगूरो का रस पियौं, सै मसीह कि बैज्जती कौरौ औरौ प्रभु कै शोरीर औरौ तैसकै लोऊ कै खिलाफ दा पाप कौरौ। 28 इथकारिए हर आदमी आपी खै जांचैया कौरौ कै का तैसका आपणा विचार सोही औसौ, औरौ तोबै इयौं रोटी मुंजी दो खांव, औरौ छानै पौरैशौ अंगूर का रस पियौ। 29 जै कुणिए प्रभु कै शोरीर कै साथै आपणै रिशतै खै पौछेयाणै बिना छानै मुंजी दु पियौं औरौ रोटी कै खांव सै इथु खाणौ-पिणौ शै आपी पांदी दण्ड लांव। 30 ऐजै बौजैह औसौ कै तुऔं मुंजीदै कैतरै बीमार औसौ; तुऔं मुंजी कैई लोगौ कै शोरीर कमजोर बै औसौ, औरौ कैई लोग मौरे बै गौवै, जिथुकै ऐजै पौरमेशवर कै सौजा औसौ। 31 इथकारिए आमै आगै आपणै बर्ताव कै जांच कौरु, तौ पौरमेशवर आमु सौजा ना दैन्दा। 32 पौरौ प्रभु अमारा न्याय कौरदा औरौ अमारा सुधार कौरौ ताकि अंत कै दूसै पौरमेशवर आमु दुनिया कै लोगौ साथी दोषी ना ठोहरांव। 33 इथकारिए ओए रै मैरै बिशवाशी भाईयों, जोबै तुऐं प्रभु भोज खाणौ कारिए कौठै हौंव, तौ ऐकी दूजै कै ठोल़या कौरौ औरौ तोबै कौठै हौयौ खाव। 34 जै कुणिए भूखा हौंव, तौ आपणै घोरे शा खायो आंव, ताकि जोबै तुऐं कौठै हौंव, तोबै तुऐं सोही तरीकै शै बर्ताव कौरदै औरौ पौरमेशवर तोंवारा न्याय ना कौरदा औरौ ओकी बातौ खै जोबै हांव आन्दा, तौलौ ही सुलझांदा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation