1 कुरिन्थियों 10 - सिरमौरी नौवाँ नियमइस्राएल कै इतिहास शै चैतावणी 1 ओए रै बिशवाशी भाईयों, हांव चोऊं कै तुऐं याद राखौ कै जोंगलो दै अमारै पुराणिया कै साथै तिनकै सौमय दो का हौ। पौरमेशवरे तिनु सौबी खै ऐक बादल़ भैजैयो बाट दिखाए जू तिनकै आगै-आगै हांडै रौआ थिया, औरौ तैसी बादल़ै तिनु सौबी कै लाल समुन्द्रो कै पाणी कै बीच शै शुकी जोमीनो पांदी सोएं कौरेयौ नियै। 2 जैशैकै आमै प्रभु यीशु कै चैलै बौणणौ कारिए बपतिस्मा लोऊ, तैशैखैई सैजै सौबै बादल़ौ कै छांव दै थिए औरौ मूसा कै चैलै बौणैयौं लाल समुन्द्र शै होयो हौटै। 3 तिनुऐ सैजी रोटी खैई जू पौरमेशवरे तिनु कारिए स्वर्ग शै दी। 4 तिनु सौबीए सैजौ पाणी पियुं जू पौरमेशवरे तिनु दियु थियु। तिनुऐ ऐकी चट्टान शै निकल़णौ वाल़ै पाणी खै पियुं, औरौ आमै तियौं चट्टान कै तुलना मसीह शै कौरे सौकौ जैणै तिनकै साथै रौयौ तिनु जीवन दिया। 5 पौरौ पौरमेशवर तिनुमुंजी दै बौहितै दा खुशी ना थी, इथकारिए सै रेगिस्थान दै मौरे गौवै। 6 औरौ बैजाए साल पौछौड़ियौ अमारै पुराणिया कै साथै हौएयौंदी ऐजी बातौ आमु कारिए चैतावणी औसौ कै जै आमु तिनकै जैशणी बुराए कौरणौ कै इछा राखु तौ का हौंदौ। 7 औरौ ना ही तुऐं मूर्तिपूजा कौरणौवाल़ै बौणौ, जैशैकै तिनुमुंजी दै किछै लोग थिए, जैशैखै पवित्र शास्त्र बोतांव, कि लोग खाणौ पिणौ कारिए दावत दै बौठै। औरौ तोबै नाचदै औरौ ऐश मौस्ती कौरदै ऊबै बिजै। 8 इथकारिए आमु कै कोसी भान्त कै गौलत काम कौलोंई ना कोरणै चैंई जैशै तिनुमुंजी दै कैतरै आदमीए कौरो औरौ ऐकी दूसौ दै तैईस हजार मौरे गौवै। 9 औरौ ना आमै प्रभु खै पोरखौ, जैशै तिनुमुंजी दै कैतरै कौरौ, औरौ शोंगोऊं कै डंक शै मौरे गौवै। 10 औरौ ना तुऐं कुड़कुड़ाव, जैशैखै तिनुमुंजी दै कैतरै कुड़कुड़ाए, जैसी स्वर्गदूत खै पौरमेशवरे भैजै राए थिया, तैणै तिनुखै मारै दियै थिए। 11 पौरौ ऐजी सौबै बातौ, जू तिनु पांदी पौड़ी, चैतावणी की रीति पांदी थी; औरौ सै आमु चैतावणी दैणौ कारिए लैखै रैई जू इयौं दुनिया कै अंत कै सौमय दै रौए रौवै। 12 इथकारिए जै तिथै कुणिए ऐशणा आदमै औसौ जू बौल़ौए कै पौरमेशवर पांदी तैसका भोरोशा मोजबूत औसौ, तौ तैसी चौकश रौणौ चैंई कै ऐशै नी हौं कै सै धौखै शै बिशवाश शै भटकै जांव औरौ सै पाप कौरौ। 13 पाप कौरणौ की इछाएं आमु सौबी कै धोरे जौरुर आंव पौरौ पौरमेशवर वफादार औसौ सै तुऔं ऐशै पौरखणौ कै छूट ना दैंदा जिंदै लौड़णौ दै तुऐं लायक ना आथी, बल्कि सै तुऔं सैजै शौकतै दैंदा ताकि तुऐं पाप शै बौचणौ दै काबिल रौए सौकौ। मूर्तिपूजा कै खिलाफ चैतावणी 14 ऐशैखैई, ओए रै मैरै प्यारो, मूर्ति पूजा शै दूर भागैया। 15 मोऐं तुऔं लोगौ कै सौमझदार जाणैयौ, ऐजौ बौल़ै लौ: इथकारिए ध्यान शै सुंचौ कै जू हांव बौलदा लागै रौआ कै सैजौ सोही औसौ कै आथी ना। 16 जोबै आमै यीशु मसीह कै मौत खै याद कौरणौ कारिए कौठै हौंव, तौ आमै छानै पौरैशौ अंगूर कौ रस पियौं, जिथकारिए आमै पौरमेशवर खै धन्यवाद दैय राए औरौ आमै तियौं रोटी खै बै खोऊं जू टुकड़ो दै तौड़ै राए। ऐजी ऐक याद औसौ कै आमै मसीह खै लोऊ औरौ शोरीर शै जू आर्शीवाद आंव तियौं साझैदारी दै शामिल होए रै। 17 जिथुकै ऐक रोटी इयौं बातौ कै निशानी औसौ कै आमै जू कैतरै जोणे औसौ मसीह दै ऐक शोरीर औसौ, जिथुकै आमै सौब ऐक रोटै पौरैशौ खोऊं। 18 इस्राएल देश कै लोगौ कै बारै मुंजी सुंचौ, जोबै सौब लोग पौरमेशवर कै चौढ़ाएयौंदो खाणौ खै खांव तौ पौरमेशवर कै पूजा दा हिस्सा लोंव। ऐशैखैई जू लोग मूर्ति खै चौढ़ाएयौंदो खाणौ खांव, सै बै तिनु मूर्ति कै पूजा दा हिस्सा लोंव। 19 मोऐं ऐजौ बौल़ै लौ कै मूर्ति सौथीखै देवता ना आथी, औरौ तिनुखै चौढ़ाएयौंदो बलिदान किछै मतलब ना राखौ। 20 सिरफ ऐजौ, कै जियौं चीज़ कै लोग मूर्ति खै बलिदान कौरौ सै पौरमेशवर कै खातिर नी, पौरौ दुष्टआत्माओं कै खातिर बलिदान कौरौ औरौ हांव ना चोऊं, कै तुऐं दुष्टआत्माओं दै शामिल हौंव। 21 ऐजौ ना हौए सौकौ कै तुऐं प्रभु कै कटौरै मुंजीदै औरौ दुष्टआत्मा कै कटौरै मुंजीदै बै पियौं, ऐशैकै ऐजौ बै ना हौए सौकौ कै तुऐं प्रभु कै मैजौ मुंजीदौ औरौ दुष्टआत्मा कै मैजौ मुंजीदै बै ऐक साथ भागी हौं जू आमु प्रभु कै मौत कै याद दिलांव। 22 जै तुऐं ऐशै कौरौ, तौ तुऐं पाकाई प्रभु खै गुस्सा दियांव। याद राखौ कै तुऐं तैसदै जादा शौकतीशाली ना आथी। मसीही आज़ादी 23 बैशक, आमु किछै बै कौरणौ कै आज़ादी औसौ। पौरौ आमु कारिए सौबै ठुँ आछौ ना आथी, पौरौ सौबै ठुँ कौरणौ कै ऐजी आज़ादी पौरमेशवर दै अमारै बिशवाश खै मोजबूत ना कौरौ। 24 कुणिए आपणै ही भोलाए खै ना सुंचौ पौरौ ओकी कै भोलाए कै बारै मुंजी बै ध्यान दैया। 25 तुऐं बाज़ार दै बिकणौवाल़ी कुणजै बै चीज़ौ खै खाए सौकौ। ऐजौ ना पूछौ कै ऐजौ मूर्ति कारिए राखै राए थियु कै ना, ताकि तोंवारा विवेक तुऔं खै दोषी ना बाणौ। 26 “तुऐं खाए सौकौ जिथुकै पवित्र शास्त्र बौल़ौए, धोरती औरौ तिथमुंजी जू किछै बै औसौए सौबै ठुँ प्रभु कौ ही औसौ।” 27 औरौ जै अबिशवाशियौं मुंजी कुणिए बै तुऔं खै नेवता दैंव, औरौ तुऐं जाणौ चांव, तौ जू किछै तोंवारै सामणै राखै जांव सैजौ ही खाव पोरो ऐजौ ना पूछौ कै ऐजौ मूर्ति कै आगै चौढ़ौऊ या ना, औरौ ऐशै कौरणौ सै तोंवारा जमीर दुखी ना हौंदा। 28-29 पौरौ जै कुणिए तुऔं खै बौल़ौ कै “मूर्ति खै सैजौ खाणौ चौढ़ाए राए थियु,” तौ इथु नी खाया, आपणी अन्तरआत्मा की बौजैह शै नी, पौरौ तैसकै अन्तरआत्मा की बौजैह शै जैणै तुऔं खै ऐजौ बौतौऊ थियु। जिथुकै मैरै आज़ादी खै कोसी ओकी आदमी कै अन्तरआत्मा लैई न्याय ना कौरे जाणा चैंई। 30 जै हांव पौरमेशवर कै धन्यवाद दैयौ मूर्तियों खै चौढ़ाएयौंदो खाणौ दा शामिल होऊं तौ तिथ कारिए मुं पांदी दोष किथु लाए जांव, जिथकारिए मोऐं पौरमेशवर कै प्रति धन्यवाद प्रकट कौरा। 31 आखरी दौ, हांव तुऔं खै ऐजौ बोताणौ चोऊं, कै इथकारिए जै तुऐं चाहै खांव, चाहै पियौं, चाहै जू किछै कौरौ, सौबै ठुँ पौरमेशवर कै महिमा कै खातिर कौरौ। 32-33 हांव आपणी भोलाए कै बारै मुंजी बिना सोंचै, सौबी खै खुश कौरणौ कै कौचिश कौरु, ताकि तिनु बौचाए सौकु। तैशैखैई तुऐं बै ऐशैखै रौव कै ना यहूदी लोगौ ना बैगानै यहूदी लोगौ ना पौरमेशवर कै कलीसिया कारिए कुणजै पौरैशानी या कुणजै ठोकर कि बौजैह बौणौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation