1 कुरिन्थियों 1 - सिरमौरी नौवाँ नियमस्वागत 1 मोऐं पौलुसे ऐजै चिट्ठी लैखै लौए। मुखै पौरमेशवर कै इछा शै प्रभु यीशु मसीह का ऐक चोणेयौंदा चैला हौणौ कारिए बौएदै राए। हांव इथै साथी बिशवाशी भाई सोस्थिनेस कै साथै औसौ। 2 मोऐं ऐजै चिट्ठी कुरिन्थुस शहर दै प्रभु कै कलीसिया कै लैखै लौए, जिनुखै पौरमेशवर आपणै लोगौ कै रुपो दै यीशु मसीह कै साथै एकजुट कौरे राए, तैणै तुऔं आपणै पवित्र लोग हौणौ कारिए बौएदै राए; जैशै तैणै तिनु सौबी लोगौ कै चोणे राए जू अमारै प्रभु यीशु मसीह कै सेवा कौरौ जिथुकै सै आमु सौबिका प्रभु औसौ। 3 अमारै पिता पौरमेशवर औरौ प्रभु यीशु मसीह कै ढौबौशै तुऔं अनुग्रह औरौ शान्तै भैटदै रौंव। पौलुस पौरमेशवर का धन्यवाद कौरौ 4 हांव तोंवारै बारै मुंजी आपणै पौरमेशवर का धन्यवाद सौदा कौरदा रोऊं, इथकारिए कै पौरमेशवरे मसीह यीशु कै साथै एकजुट हौयौ खै आमुखै बैजाए आछी आशीषै दैय रैई। 5 जिथुकै आमुखै कैई तरह की आशीषै भैटी रैई, औरौ जोबै कै आमु मसीह कै साथै एकजुट औसौ पौरमेशवरे आमुखै आपणै वचन बौलणौ औरौ सौमझणौ कारिए सौबी भान्त कै खासियत दैय राए। 6 ऐशैखैई पौरमेशवरे आमुखै ऐजौ साबित कौरे राए कै मसीह कै बारै मुंजी जू सौंदेश आमै तुऔं कै बोताया सै साचा औसौ। 7 औरौ इयौं बौजैह शै, पवित्र आत्माए आमुखै सैजै सौबै वरदान दैय राए जिथकै आमु जौरुरत औसौ, जौबेकै आमै उम्मीद कै साथै अमारै प्रभु यीशु मसीह कै पाछु आणौ कै ठोल़नाए कौरे लौए। 8 पौरमेशवर तुऔं आखरी तौड़ी बिशवाश दै मोजबूत राखदा, ताकि जौल़ौ अमारा प्रभु यीशु मसीह औटेयौ पाछु आन्दा, तोलो तुऐं बैकसूर पाए जांव। 9 पौरमेशवरे आपणै बैटै, प्रभु यीशु मसीह कै साथै आमु एकजुट हौणौ कारिए चोणे राए, औरौ सै बिशवाश लायक औरौ वादै का पाका औसौ। इथकारिए तुऐं ऐजौ निशोंक हौयौ जाणै सौकौ कै सै तोंवारै खातिर आपणा वादा पूरा कौरदा। कुरिन्थुस शहर कै कलीसिया दै रौलै 10 ओए रै बिशवाशी भाईयों, अमारै प्रभु यीशु मसीह कै औधिकार शै, हांव तुऔंआरी ऐशै कौरणौ कै बिन्ती कौरु, कै तुऔं सौबी खै ऐकी दुजैआरी सहमत हौणौ चैंई। औरौ तुऔं मुंजी झोगड़ा नी होणा चैंई पौरौ तुऔं ऐक जैशणी सोंच राखैयौ औरौ ऐकैई मकसद राखैयौ ऐकी दूजै कै साथै मिल-जोलैयौ रौणौ चैंई। 11 जिथुकै ओए रै मैरै बिशवाशी भाईयों, खलोए कै परिवार कै लोगै मुखै तोंवारै बारै मुंजी बौताए राए, कै तुऔं मुंजी झोगड़े हौए रौवै। 12 मैरै बौलणौ का मतलब ऐजा औसौ, कै तुऔं मुंजीदै कुणिए तौ आपी खै बौल़ौए, “हांव पौलुस का चैला औसौ,” कुणिए बौल़ौ “हांव अपुल्लोस का चैला औसौ,” तौ कुणिए बौल़ौ “हांव पतरस (कैफा) का चैला, या हांव मसीह का चैला औसौ।” 13 ऐजै बात आछै ना आथी, जिथुकै मसीह गुटो दा बौंटेयौंदा ना आथी। शायद तुऐं गौलती सै ऐजौ सुंचौए कै हांव पौलुस तुऔं आज़ाद कौरवाणौ कारिए क्रूसो पांदी चौढ़ा थिया औरौ शायद तुऐं गौलती शै ऐजौ बै सोंचै लौ कै तुऔं इथकारिए बपतिस्मा दैय राए ताकि तुऐं मैरै चैलै बौणै सौकौ। 14 हांव पौरमेशवर का धन्यवाद कौरु, कै इनु दौ भाईयों कै छोड़ेयौ कै यानी कै क्रिस्पुस औरौ गयुस खै मोऐं तुऔं कोसी कै बै बपतिस्मा ना दी। 15 तोबै कुणिए ऐजौ ना बौल़ै सौकौ कै तुऐं मैरै चैलै कै रुप दा बपतिस्मा लौआ। 16 ऐबै मुखै याद औसौ कै मोऐं स्तिफनास कै परिवार खै बै बपतिस्मा दैय राए; इनुखै छोड़ेयौ, हांव ना जाणु कै मोऐं ओकी कोसी खै बपतिस्मा दिया। 17 जिथुकै मसीहे मुखै बपतिस्मा दैणौ खै नी, पौरौ सुसमाचार शुणाणौ खै भैजै राए, औरौ जोबै हांव लोगौ खै पौरमेशवर का सौंदेश शुणौऊं, तौ हांव आदमी कै चलाक विचारो का इस्तैमाल ना कौरु, ना लोगौ खै मोनोऊ कै जू किछै हांव बुलू तिथपांदी बिशवाश कौरौ। जै ऐशैखै कौरदा, तौ लोग सिरफ इथकारिए बिशवाश कौरदै कै मोऐं बौड़ै चालाकी लैई बातो कौरी पोरौ तोबै क्रूसो पांदी मौरणौ वाल़ै मसीह का सौंदेश लोगौ कै जीवन दा शौकतीशाली तरीकै शै काम ना कौरदा। मसीह कै शौकतै औरौ पौरमेशवर का ज्ञान 18 जोबै लोग ऐजा सौंदेश शुणौए कै मसीह क्रूसो पांदी मौरे गौआ, तौ तिनुमुंजी दै किछै सुंचौए कै ऐजा सौंदेश बकवास औसौ। ऐशैखै सुंचणौ वाल़ै लोग सैजै औसौ जू नरक कै ढौबौ जांदै लागै रौवै। पौरौ अमारै खातिर जू तैसी सौंदेश पांदी बिशवाश कौरौ, अमारा बौचाया जाणा पौरमेशवर कै अनौखी शौकतै का सबूत औसौ। 19 जिथुकै पौरमेशवरे पवित्र शास्त्र दौ बौल़ै राए, “कै हांव दिखांदा कै लोगौ कै विचार जिनुखै ऐसी दुनिया कै लोग सुंचौए, सै सौथीखै मूर्ख विचार औसौ या बुध्दिमानी कै औसौ। हांव साबित कौरदा कै सैजै लोग बिल्कुल बै बुध्दिमान ना आथी।” 20 तौ तोबै बुध्दिमान आदमी औरौ यहूदी शास्त्री कै दशा का औसौ औरौ जू ऐक माहिर वाद-विवाद औसौ जू इयौं दुनिया पांदी हौंव? जिथुकै पौरमेशवरे आगैई दिखाए राए कै तिनकै संसारिक बुध्दि कै कुणजै कीमत ना आथी। 21 जिथुकै पौरमेशवरे आपणी बुध्दि लैई दैखै राए थियु कै आदमी कै ज्ञान कै हिसाब शै दुनिया तैसी कौलोंई ना जाणै पांदै, इथकारिए तैणै बिशवाश कौरणौवाल़ै खै बौचाणौ कारिए ऐसी सुसमाचार कै प्रचार का इस्तैमाल कौरे राए, पौरौ किछै लोग इथु मूर्ख मानौ। 22 ऐजौ यहूदी लोगौ कै बैकार लागौ जिथुकै सै ऐजौ साबित कौरणौ कारिए स्वर्ग शै ऐक निशान चांव कै ऐजौ साचौ औसौ औरौ बैगानै यहूदी लोगौ कारिए बै औसौ जू आदमी का ज्ञान चांव। 23 पौरौ आमु तौ उपदैश दियु कै मसीह कै अमारै पापौ शै छुड़ाणो कारिए क्रूसो पांदी मौरणौ जू यहूदी लोगौ कारिए ढैस कै बौजैह, औरौ बैगानै यहूदी लोगौ कारिए मूर्खता औसौ। 24 पौरौ जिनुखै पौरमेशवरे बौएदै राए का यहूदी, का बैगानै यहूदी, ऐजाई मसीह पौरमेशवर कै शौकतै औरौ पौरमेशवर का ज्ञान औसौ। 25 जिथुकै पौरमेशवर कै मूर्खता आदमी कै ज्ञान शै जादा ज्ञानवान औसौ, औरौ पौरमेशवर कै कमजोरी आदमी कै शौकतै शै जादा ताकतवर औसौ। सिरफ प्रभु पांदी घमण्ड 26 ओए रै बिशवाशी भाईयों, पौरमेशवरे आमुखै आपणै बैटै, अमारै प्रभु यीशु मसीह कै साथै एकजुट हौणौ कारिए चोणे राए, आदमी कै नज़रीयै शै आमु मुंजीदै कुणिए बै बुध्दिमान औरौ शौकतीशाली औरौ राजा या नेताओं औरौ खास पुराणिया मुंजीदै ना थी। 27 ज्ञानवालों खै बैज्जित कौरणौ कारिए पौरमेशवरे तिनुखै चुणै, जू दुनिया कै नज़र दै मूर्ख औसौ औरौ शौकतीशालियौ कै बैज्जित कौरणौ कारिए तिनुखै, जू दुनिया कै नज़र दै कमजोर औसौ। 28 पौरमेशवरे तिनुखै चुणै, जू दुनिया कै नज़र दै नीच औसौ, बैकार औसौ औरौ जू कुछ बै ना आथी ताकि ऐजै लोग तिनु लोगौ कै बैकार कौरे दैंव, जू दुनिया दै खास सौमझै जांव। 29 पौरमेशवरे ऐशै इथकारिए कौरौ ताकि कुणिए बै प्राणी पौरमेशवर कै सामणै घमण्ड नै कौरे सौकौ। 30 पौरौ पौरमेशवरे तुऔं मसीह यीशु कै साथै एकजुट कौरे राए, औरौ मसीह कै दवारा सै आमु आपणा ज्ञान दैंव। पौरमेशवर बै आमु तैसकै नज़र दै धरमी बाणौ। मसीह कै दवारा आमु पवित्र बाणै जांव औरौ सै आमु पापौ शै आज़ाद कौरौ। 31 मसीह अमारा सौबै ठुँ औसौ, जैशैकै पवित्र शास्त्र बौल़ौए, “जू घमण्ड कौरौ सै इयौं बातौ पांदी घमण्ड कौरौ जू प्रभुए कौरे राए।” |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation