Yowel 1 - NQAARIIT NE ROOG

¹ Keeke refu fa lay fee o Yaal oxe a daawinna a Yowel fee o ƥiy Petu’el:

A ñipax ale no tooroog ke fo o feñ ole

² Nuun maak we, nan-gilooxaamoo! Nuun fop we ngenna no saax le Yudaa, ndungyo nof nuun! Ndax keeke a mosa xew no ñoow nuun mbaat no ñoow no daan nuun?

³ Fat nu mbetandooxin xa ƥiy nuun, da mbetandooxin xa ƥiy den, soo xa ƥiy den a mbetandookin suk ne na ndeefankaa a den.

⁴ Ke kusax ke a nqaƴna, soƈ ke a ñaamaan, ke soƈ ke a nqaƴna, xa benq axe a ƥuusaan, ke xa benq axe a nqaƴna, tooroog ke a nduudnaan.

⁵ Nuun waaway we, yokooxyo too lool! Nuun yeeyer we na biiñ fee, ƭomatooxyo, yaam o ngoon onqe na xa tim biiñ axe fadkatee na xa ton nuun.

⁶ Xeet a inooxana saax es, a njeg doole bo, too mbaagaand o lim. A ñiiñ ake den kaa nandtaa a ñiin njogoy, a kaaɓaaɓ ake a saq a paƥ njogoy ƥasil.

⁷ A mbiitna a ƭing taxar biiñ ale mi boo ta fes a pec, tun ke mi, da yaq a den pic. Kaa ŋereñ a den, a mbereƴ a den, boo a nqaƴat meen xa car xa tan xa ƥor.

⁸ Ɗomatooxi nen o njaaƈ o ndoog onqaa derooxna o saaku, yaam ne o fes um a xonna.

⁹ Sadax tuufe-duufe ƥisiidataand no Mbind ne no Yaal oxe, sadax biiñ ne’aand. Ten taxu saasadax we a naqadiloox, den we na njalanaa o Yaal oxe.

¹⁰ Xa qol axe kaa mbiitnel, lanq ke a naqadiloox, yaam bele jegatee, o ngoon onqe na xa tim biiñ axe ga’ataand, diwliin ne’aand.

¹¹ Xooxoox we a njaqa, yaal a ƭing taxar biiñ ake a ƭomatooxaa, yaam ne bele fee fa lorso fee a ñakeena, saxade le na xa qol axe a yaqoox.

¹² Taxar biiñ ke a mbeera, tun ke a leeƥ, taxar goronaad ke fo tandarma ke fo taxar pom ke itam neen. Taxar tiirim ke fop kaa naang ŋayam, o ɗaay oluu refna a ñuf ɗuƭ a ndeer no wiin we.

A simit ale no koor ne fo a ƈufginax o Yaal oxe

¹³ Nuun saasadax we, nderooxyo xa saaku too naqadiloox! Nuun we saqna calel ke no sadaxand ole, ƭomatooxyo! Ngaryo mbe fo xa saaku xe, nuun we na njalanaa a Roog es, yaam sadax tuufe-duufe fa sadax biiñ ƥisiidataand no Mbind ne na Roog nuun.

¹⁴ Simityo koor, nqoyit o xet o tedu. Mbokatyo maak we fo we ngenna no saax le fop kam Mbind ne no Yaal oxe Roog nuun soo ƈufginooxin.

Ñaal ne no fuux le no Yaal oxe

¹⁵ Cey, ndaw ñaal o njom’andaand! Ñaal ne no Yaal oxe a matiida, a ref yaq faa hatiidna no Cegu katil oxe.

¹⁶ Ñaamel ke a njaɓe na kid in, o ɗaay fo o mbelakinax a suudel no Mbind ne na Roog in.

¹⁷ Ax ke kaa mbeer kam xa yas axe, tap ke a naang tak, saq ke a yaqoox, yaam bele ga’ataand.

¹⁸ Nan-gilooxyo ne muumeen ke a iintaa! Xa siir axe kaa njoqooyooxaa o mbiñ fo mbiñ, yaam njegatee xa suufand. A ked ake sax kaa nqonaa.

A qeƭ ale no tuleer oxe

¹⁹ O Yaal oxe, wo um ƴufginooxaa, yaam fiɗel le a raaɓa xa suufand axe no tan ole, ƈulfaan a dox taxar ke na koƥ ale.

²⁰ Muumeen-a-koƥ ke sax kaa ngeleeroox farna fa wo, yaam a ƈufnand foofi ke kaa naang koroŋ, fiɗel a raaɓ xa suufand axe no tan ole.