Yosuwe 8 - NQAARIIT NE ROOG

Teeru fee Ay a jaɓe

¹ O Yaal oxe a laya a Yosuwe yee: «Ba o saɗar dara, too ba o ñak njambaar. Yooni fo xiixire we fop, o songik teeru fee Ay. Ndiiki koy, xam ɓoxot o maad oxe Ay fa xeet um fa teeru um fo o fiisel um fop na xa ƥay of.

² Fat o fi teeru feene fo o maad um ne fi’oona a Yeriko fo o maad um. No jaf lene koy, nu mbaaga o njangal no kalal ke fo xa siir axe nu soƥkaa maaga. Fat a jeg waa ƥengna laqa teeru fee.»

³ Yosuwe a inooxa fo xiixire we fop, ndax ta songik teeru fee Ay. A jila xiixire cuni qarɓeen tadik waa ndefna cambaar ƥor, a hebil a den o yeng,

⁴ a lay a den ee: «Ndetyo ƥeng laqa teeru faa, mbañ o ngoƭin, too mbogoox nuun fop.

⁵ Mi fo xiixire we ndefna fa mi koy, xan i matik teeru faa. Goor we Ay a sutooxiidangaa ndax da ñoxor fa in nen eetaand, xan i ndiy ƈuf.

⁶ Xan a ƭiiriid a in boo yaa da ngoƭkaa teeru fee, yaam kaa laykaa yee kaa i ƈufaa a den nen jaf eetaand le. Maaga, boo i ƈufaa a den,

⁷ fat nu sutoor me nu ƥengna, ngar njang teeru fee, yaam o Yaal oxe Roog nuun xan a ɓoxotin a nuun.

⁸ Nuun waa njangaa teeru fee rek koy, fat nu ndaaɓin ne o Yaal oxe a heblituuna. Keene refu ke simuuma a nuun.»

⁹ Yosuwe a hebla a den da ndet. A ndeta, a ƥeng no mudand naa Ay ndeer um fa Betel. Yosuwe o mat fo we yoqna no xiixire we a mbe’a no saŋe naa.

¹⁰ No feet olaa ƥiiɓ teel, Yosuwe a horooxa xiixire waa. Cinj kaaga, a yoona fo maak we Isra’el, da adooxan xiixire waa, a njagin Ay.

¹¹ Xiixire we ndeeƭna fo ten a ngara boo a njasnoor fa teeru fee, a sip maaga saŋe den no ɓemb-roog o janoon. A yulanq ale kaa rok’u a ndeer den fa Ay.

¹² Yosuwe a jila ngap goor cuni ƥetik soo a hebil a den da ndet, a ƥeng no mudand naa na teeru faa Ay, ndeer um fa Betel.

¹³ No yeng olaaga, yaa xiixire we a sipna saŋe den no ɓemb-roog o janoon ole na teeru fee, soo we ƥeng’ina a mbodit no mudand, Yosuwe a reta ndeer ee ndeer a yulanq alaa.

¹⁴ No nqes naa, ye o maad oxe Ay a ga’na Ii-isra’el we, a ñofa o sutoox teeru faa fo xiixire um fop, ndax ta ñoxorik fa den na mbeel xire laa jasnoorna fo xa saawit axaa Yordaan. And’ee koy ee a jega waa ƥenguuna laqa teeru fee.

¹⁵ Yosuwe fo yoon um a ndalfooxa o ƈuf, a mbi nen waa mbiriɓna, a njagin na koƥ-a-ƥor alaa.

¹⁶ Goor we Ay fop a ngeble o ndaab a den. Neene, Ii-isra’el we a ƭooqlooxa a den boo da ngoƭ teeru fee.

¹⁷ O koor o leng yoq’ee kam Ay. A ndaaba Ii-isra’el we, a nqaƴ teeru faa boo jegatee waa nqoxtuuna.

¹⁸ Maaga, o Yaal oxe a laya a Yosuwe yee: «Letni a salma of ale pokooxoona farna fa Ay, yaam xam ɓoxot teeru feene na xa ƥay of.» Yosuwe a fi’a naaga!

¹⁹ Yaa ta yoɗna o ɓay um rek, Ii-isra’el we ƥeng’ina a ñofa o sutoox, a mbañoox kam teeru faa, a njaɓin soo a ndalfoox o ndaaɓin.

²⁰ Xiixire we Ay a mbiƈaqilooxa soo a ƈook fo suun ole yoɗoortoogna na teeru fee den. Weene njeg’atee sen maa da ƈufna, yaam Ii-isra’el we ƈufoogna a den, a njagin farna fa koƥ-a-ƥor alaa, kaa nomtooxaniid’u a den.

²¹ Ye Yosuwe fo Ii-isra’el we yoon’ina fo ten fop a nga’na yee xiixire we ƥeng’ina a njaɓa teeru faa boo a ndaaɓin, a ndalfooxa o nomtooxaniid goor we Ay soo a nqawaa a den.

²² Xiixire lakas we Isra’el a sutoora na teeru faa, ndax den oo da songik goor we Ay. Neene, goor we Ay kaa ƥiikil’el o saax oo saax boo o leng waag’ee o daɗ. Ii-isra’el we a mbara a den fop boo yoqatee sax oxaa na ñoowaa,

²³ a refangee o maad oxe Ay da ndam’ina, a ƥisin maa Yosuwe.

²⁴ Ye Ii-isra’el we a saŋkitna kam a koƥ-a-ƥor alaa goor we Ay ndaaboogna a den boo o leng yoqatee, a ndalfooxa o ndet na teeru faa, a moocand onqe yoq’ina maaga.

²⁵ Wiin we Ay fop, goor fo rew, a mbare no ñaal naaga, too a ndeeƭa fop oo fop wiin cuni xarɓaxay fo wiin cuni ƭik.

²⁶ A salma le Yosuwe a pokoox’ina mosee o yoor boo neen wiin we Ay fop mbar’eena o moocand a moocande.

²⁷ No jaf leene koy, Ii-isra’el we a njangala cegel ke fo kalal lakas ke da soƥna kam teeru faa ne o Yaal oxe a heblit’uuna a Yosuwe.

²⁸ Yosuwe a raaɓa a Ay, a yaqin bo tee pic, too yaq faaga a maadtu boo xaye.

²⁹ O maad oxe Ay koy, a ndokaan o ƥaak no cok, a lokin no ndaxar, soo ta yoq maaga boo no kirand naa. Farna fo njeeƈ mudu naa Yosuwe a hebla, ndax o dal ole a fudnel. A mbudnaan, a ndeɓin paam ndokand ne na teeru faa, a njuum took um a kac a mayu, too juum laaga xaa maadaa maaga boo xaye.

Kebil ke a njangte took o joong olaa Ebal

³⁰ Maaga, Yosuwe a maxana o Yaal oxe Roog fee Isra’el o sadaxand took o joong olaa Ebal.

³¹ A maxtaan a kac akaa sextaandeena njelem ne Moyiis fee o tag no Yaal oxe a heblit’uuna Ii-isra’el we, too ta bindel no safe le no kebil ke Moyiis. A ƥoxotta taaga o Yaal oxe sadax toxel fo sadax camsa’oor.

³² No mbiñ onqaaga, na kid no Ii-isra’el we fop, Yosuwe a sexa took a ƥil kebil ke Moyiis a bind’ina.

³³ Ii-isra’el we fop, maak we den, aa-adax den, haahate den fo xa kataakoon axe ngenna a ndeer den kaa ngeenoox’u, a ngarit na xa saax xa ƭaq axe no arka ne no ngiɓoor ne no Yaal oxe, a njasnoor fo saasadax we ndefna ndef Leelewi we saq’uuna. A qaaj a leng ale na den kaa mbod’u farna fo o joong ole Garisim, a qaaj a lakas ale a mbod farna fo o joong ole Ebal. Neene mat Moyiis fee o tag no Yaal oxe a heblit’u xeet fee Isra’el a barke’tel.

³⁴ Cinj kaaga, Yosuwe a janga fo o ñuxur o maak kebil ke fop, barke fee fo a salax ake, ne ta bindit’eena deŋ no safe le no kebil ke.

³⁵ No ke Moyiis a heblit’ina fop, yoq’ee teen dara kaa Yosuwe a jangeerna mbaambir mbokatax ne Isra’el fop boo no rew we fo xa teɓandoong axe fo xa kataakoon axe ngenoogna a ndeer den.