Yosuwe 6 - NQAARIIT NE ROOG

¹ Teeru fee Yeriko kaa weg’el boo yee gik yaam Ii-isra’el we. O leng waag’ee o sutoox, too o leng waag’ee o rokiid.

² O Yaal oxe a laya a Yosuwe yee: «Refee ga’aano! Ndiiki koy, xam ɓoxot a Yeriko na xa ƥay of, ten fo o maad um fo cambaar ke ndefna teen fop.

³ Nuun xiixire we fop, fat nu mbidaa teeru fee jaf leng no ñaal nuu refna boo ñaal ɓetuu fa leng.

⁴ Fat saasadax ɓetuu ɗik a saq a luuƥ ɓetaa ƭaq akaa mbi’teena xa can suk mbaal, a adooxan arka ne. No ñaal ɓetuu ƭikandeer naa fat nu mbid teeru fee a caf ɓetaa ƭaq, soo saasadax we a njibin a luuƥ ake.

⁵ A njibnangaa a luuƥ ake boo nu nan fangax le den rek, fat fop a njibin xa buuq xire. Maaga, xan saŋe ne na teeru fee a jiƭtoox, soo oxuu refna na nuun a waag o rokit me ta jasnoorkaa.»

⁶ Yosuwe fee o ƥiy Nun a xoya saasadax we, a lay a den ee: «Nqotyo arka ne no ngiɓoor ne, soo saasadax ɓetuu ɗik a nqot a luuƥ ɓetaa ƭaq akaa mbi’teena xa can suk mbaal, a adooxan arka ne no Yaal oxe.»

⁷ Cinj kaaga, a laya xiixire waa yee: «Nqotyo a ƭat, mbid teeru fee. No we mbapooxanna a ñoq, fat a jeg a yaj alaa adooxanna arka ne no Yaal oxe.»

⁸ Fop a fi’te ne Yosuwe a layit’uuna. Saasadax ɓetuu ɗik we saq’ina a luuƥ ɓetaa ƭaq ake mbaambir no Yaal oxe a nqota a ƭat, a ndef no luuƥaa, soo arka ne no ngiɓoor ne no Yaal oxe a reefan a den.

⁹ A jeg’a a yaj no xiixire waa adooxan’ina saasadax we luuƥoogna fo a yaj alaa falakan’ina arka ne, da ñaaƴaa no fangax le na luuƥ ake.

¹⁰ Yosuwe kaa hebil’u xiixire waa yee: «Ba nu njibin xa buuq xire, ba nu yoɗ xa ñuxur nuun, too ba nu lay dara boo no ñaal naa um laykaa a nuun ee: ‹Njibinyo xa buuq xire.› Maaga, fat nu njibin a den.»

¹¹ A mbidna arka ne no Yaal oxe teeru faa jaf leng soo a nomtoox maa da ndal’ina, a mbe maaga.

¹² No feet olaa, Yosuwe a yokooxa ƥiiɓ teel, soo saasadax we a nqot arka ne no Yaal oxe.

¹³ Saasadax ɓetuu ɗik we saq’ina a luuƥ ake a ndefahina no ñaaƴaa luuƥaa, a adooxan arka ne no Yaal oxe. A jeg’a a yaj no xiixire waa adooxan’ina a den fo a yaj alaa falakan’ina arka ne no Yaal oxe, da ñaaƴaa no fangax le na luuƥ ake.

¹⁴ No ñaal ƭikandeer neene itam a mbida teeru faa jaf leng, cinj kaaga da nomtoox maa da ndal’ina. A mbi’a leng kut keene boo ñaal ɓetuu fa leng.

¹⁵ No ñaal ɓetuu ƭikandeer naa, a inooxa no mbuyukuun naa, a mbi o xod ole da mbi’oogna soo a mbid teeru fee a caf ɓetaa ƭaq. Kaa koy, no ñaal naaga soom a mbid’u teeru faa boo a caf ɓetaa ƭaq.

¹⁶ A cinj jaf ɓetuu ɗikandeer laa, saasadax we a njibna a luuƥ, soo Yosuwe a lay xiixire we yee: «Njibinyo xa buuq xire, yaam o Yaal oxe a ci’a a nuun teeru fee!

¹⁷ Fat teeru fee fo ke refna teen fop a yaqel no gon no Yaal oxe. Rahab, a caga le doŋ na mucilkeel fo we na ndefkaa fo ten no mbind um fop, yaam ten ɗasin’u hoohorax we i lul’ina.

¹⁸ Kaa koy, ba nu njang dara no ke wareena o yaq, yaam ndik nu or taamaala fa yaq kam saŋe ne no Ii-isra’el we.

¹⁹ Xaaliis fee fop fa wurus fee fo ke fi’teena xanjar mbaat njelem fat a kesanel o Yaal oxe soo a ƥekel na halal fee ten.»

²⁰ A luuƥ ake a njibne, too yaa xiixire waa a nanuuna rek, a ndalfooxa o njibin xa buuq xire. Ndak fo ndak, saŋe naa Yeriko a jiƭtooxa, Ii-isra’el we a ndok kam teeru faa, oxuu refna na den a reefit me ta jasnoor’ina soo da njaɓin.

²¹ A moocanda we na teeru faa fop, goor fo rew, maak fo xa caaƈ. A mbara sax qoox ke, paal ke, pambe ke fo xa paam axe.

²² Yosuwe kaa lay’u goor ɗik waa ngorooxiid’ina saax le yee: «Ndetyo no mbind Rahab, a caga le, nu sutiidin, ten fo ƥasil um fop ne nu ndaaɓoorit’uuna fo ten.»

²³ Hoohorax weene a ndeta, a sut a Rahab, faap um, ya um, maag um, xa teɓ um fo fog um lakas fop, a ƥis a den no mbiñ o mbooru tafil saŋe ne no Ii-isra’el we.

²⁴ A ndaaɓa teeru faa fo ke reeƭna teen fop, bo ta yoqaa xaaliis fee fa wurus fee fo ke fi’it’eena xanjar mbaat njelem, kesan’eena halal fee no Mbind ne no Yaal oxe.

²⁵ Yosuwe a wuusa a Rahab fee a caga le fo ƥasil faap um fo fog um lakas we fop, yaam Rahab kaa ɗasin’u duleer we Yosuwe a hebil’ina da ngorook teeru fee Yeriko. A ndeer no Ii-isra’el we a maadu o ngenaa boo xaye.

²⁶ Na jamaane faaga, Yosuwe a salooxa yee: «Yaasam o Yaal oxe a halak o kiin oxe na jeemkaa o maxatin teeru fee Yeriko. Bo ta gasaa fer le, fat a ñak a taaw fa ngoor um, a ñak mbat-fo-ɗeen um, yaa ta wadaa begax ke.»

²⁷ O Yaal oxe a reeƭa fa Yosuwe fee gon um a joot’atna kam saax laa fop.