Yosuwe 5 - NQAARIIT NE ROOG

¹ Ye maad we no Aa-amori we fop ñoowoogna no mudand naa Yordaan fo maad we no Kaakanaan we fop ndal’ina na ƥeeraamb alaa no maag ole Mediterane a yegna yee o Yaal oxe kaa xaaj’u poofi ke no xuluɓ ole Yordaan, ndax Ii-isra’el we a nqaañiidin, cer den fop a ƥolooxa, too o leng na den saqatee o laaw olaa ta siiknooritna fo Ii-isra’el we.

Ii-isra’el we a nqucoora Gilgal

² Na jamaane faaga, o Yaal oxe a laya a Yosuwe yee: «Sexni capil a ƥil, ndax o xuc suk nqas ne no Ii-isra’el weeke.»

³ Yosuwe a sexna capil a ƥil soo a xucit Ii-isra’el we no mbiñ onqaa da ne’’atna Ñaang le no xucand ole.

^4-5 Yosuwe a war’a o xuc a den, yaam goor Ii-isra’el we ndimit’eena kam a koƥ-a-ƥor alaa fop cinj a sutax alaa den Misira nquc’aand. Goor we na xeet fee fop sutoor’ina Misira a nqucoox’a, ndaa we mbad’ina o ndet na xire fop kaa nqonit’u na ƭat ale kam a koƥ-a-ƥor alaa.

⁶ Ii-isra’el we a ñaaƴ’a xa kiid qarɓeen nahik kam a koƥ-a-ƥor alaa, boo neen goor we sutoor’ina Misira too a mbad’u o ndet na xire fop a nqonu. Ne da nanaƭaran’ina o ñuxur no Yaal oxe, tax’u ta daaɓoox ee nga’kee saax le ta reg’ina paap ke den fo a taaƥ ee xan a cooxin a in, saax laa fo sis fo suum a ndaxritaa.

⁷ O Yaal oxe a dalna xa ƥiy den na seek den, too weene o mat Yosuwe a xuc’u, yaam nqucoor’ee na ƭat ale.

⁸ Ye goor we na xeet fee fop a nqucooxna, maak fo xa caaƈ, a moofa no saŋe naa boo neen a mbodu den fop.

⁹ Cinj kaaga, o Yaal oxe a laya a Yosuwe yee: «Xaye, watnanaam a nuun gaci fee nu ƥistiid’ina Misira.» Ten taxu o mbiñ onqaaga a xoyeel Gilgal, too gon leene a maadtu boo fa ndiik.

A Colandax a eetaand ale roofandteena kam Kanaan

¹⁰ Ye Ii-isra’el we a ndalna Gilgal, kam xa saawit axaa Yeriko, a ndoofandta maaga Xew fee na colandax ale no kirand ne no ñaal xarɓaxay fo ñaal nahkandeer ne no nqool onqaaga.

¹¹ No feet olaa, a ñaama puuru canja’e fo pep cuɗe kaa da mbi’it’ina xa tim axe no saax le Kanaan.

¹² Ten taxu a cinj ñaal naaga njegoogatee maan. A ndefa no ñaamataa xa tim axe no saax le Kanaan no kaa xotitna no hiid olaaga.

Ii-isra’el we a njaɓa a Yeriko

¹³ Bes, a soƥ Yosuwe a ref paam Yeriko, a yoɗa a kid um, a ga o koor oxaa jasnoorna fo ten, a woos laƥ um. Yosuwe a matiidaan soo a laamtin ee: «Fa in faro ndi fo fañ in?»

¹⁴ O koor oxaa a doonaan ee: «Fariim fo leng! Mi refu o aa-adax oxe no xiixire we no Yaal oxe, too kaam sog o fadiidaa.» Yosuwe a dalfooxa o naag giriƥ-riƥ, a gung a lanq soo a layin ee: «Xar o Yaal es a ñaaƴiidu me mi, mi fee o tag um?»

¹⁵ O aa-adax oxe no xiixire we no Yaal oxe a layaan ee: «Woli xa ñaaƭ of, yaam me o dakaa kaa ted.» Yosuwe a fi’a naaga.