Yosuwe 16 - NQAARIIT NE ROOG

O fiisel ole Efrayim fo ole Manaase

¹ Na pexey mbanjang ne, xa taan axe Yoseef a lase o fiisel olaa o ŋat ole no ɓemb-roog o ñamaak te no batand a inoorna Yordaan paam Yeriko, a sag na ƈufnand alaa na teeru faa, a inoor maaga, a xaañ a koƥ-a-ƥor alaa soo a waaƭik o jegel olaa na xa coong axaa Betel.

² A inoora Betel, a sag farna fa Luus, a reef Atarot maa Aa-arki waa a ngenna.

³ Cinj kaaga, a fudooxiida farna fo mudand, a gar no jegel olaa no Yaayaflet waa, a xaañ a Bet-Horon fee a lanq fa Geseer soo a saltik no maag ole Mediterane.

⁴ Xa taan axe Yoseef ndefna ndef a carind ale Manaase fo ale Efrayim a lasra o fiisel oleene a ndeer den.

⁵ O ŋat ole na las ale a qaw ake na carind ale Efrayim a ndaaw’ina no fiisel ole no batand oxe inoor’a Atrot-Adaar boo Bet-Horon fee took,

⁶ a saltik no maag olaa Mediterane. O ŋat ole no ɓemb-roog o janoon oxe day’a Mikmetat, a puloor maaga, a sag no batand boo Taanat-Silo, a xaañin, a suur a waaƭik a Yanowah.

⁷ A inoora Yanowah, a fudooxiid Atarot fa Naara, a lernoox a Yeriko soo a saltik Yordaan.

⁸ No mudand naa Mikmetat, o ŋat ole a inoora Tapuwa boo na ƈufnand alaa Qaana soo a reefanin boo a saltik no maag ole Mediterane. Keene refu o fiisel ole laseena a qaw ake na carind ale Efrayim.

⁹ A ɓaatan’e itam teeru leng-leng kaa mbogna no fiisel ole na carind ale Manaase fo caate ke da mbaxooxna.

¹⁰ Ee-efrayim we koy, ndax’ee Kaakanaan we ngenoogna Geseer. Boo fa ndiik, weene owe ñoowaa a ndeer no Ee-efrayim we seroogna a den calel leng-leng.