Yosuwe 10 - NQAARIIT NE ROOG

A ñoq a maak ale paam Gibe’on

¹ Adoni-Sedek fee o maad Yeerusaleem a yega yee Yosuwe a jaɓa teeru fee Ay, a gefin tuƈ soo a fi’in, ten fo o maad um ne ta fi’’ina teeru fee Yeriko fo o maad um. A yega itam ee Giigibe’on we kaa njamsa’oor’u fo Ii-isra’el we soo a ñoowataa a ndeer den.

² Maaga, a diida ƭomu, yaam Gibe’on teeru fa maak a reeƭu, nen teeru ke no maad we. Ten moƴ’u o magin a Ay sax, too xiixire say ɓor a saq’u.

³ Keene tax’u Adoni-Sedek a hebil duleer maa Hohaam fee o maad Hebron, maa Piram fee o maad Yarmut, maa Yafiya fee o maad Lakiis fo maa Debir fee o maad Eglon, ndax ta xeɗ a den ee:

⁴ «Ngaryo ndimle’aam, ndax i nqaw a Gibe’on, yaam kaa jamsa’oor fa Yosuwe fo Ii-isra’el we.»

⁵ Neene mat maad ɓetuk we no Aa-amori we ndefna o maad oxe Yeerusaleem, oxe Hebron, oxe Yarmut, oxe Lakiis fo xe Eglon a mbokatoortu, a yoon fo a yaj den fop soo a ngar, a sip saŋe den mbaambir teeru fee Gibe’on, ndax da songin.

⁶ Maaga, Giigibe’on we a lulta no saŋe naa Gilgal, ndax da lay a Yosuwe yee: «Ba o xaƴ a in, in we dag of, ndaa ñofi gar, ƴufig a in too wat a in, yaam maad we no Aa-amori we fop ngenna na xa coong axaa kaa mbokatooran a in.»

⁷ Yosuwe a inoora Gilgal, a yoon fo cambaar ke ten fo xiixire lakas we ten fop.

⁸ O Yaal oxe a laya a Yosuwe yee: «Ba o saɗar a den, yaam xam ɓoxot a den na xa ƥay of. O leng na den xoxkirang.»

⁹ A cinj ye Yosuwe fo yoon um a inoorna Gilgal, a ñaaƴ o yeng ole fop, kaa mbadiid rek, a mbet Aa-amori we, a yen took den.

¹⁰ O Yaal oxe kaa firɓand’u a den mbaambir Ii-isra’el we. Ii-isra’el we a nqawa a den a qaw a ƭomu paam Gibe’on, a ndaabtaa a den na ƭat ale jofna Bet-Horon, a mbaraa a den boo Aseka fa Makeda.

¹¹ Ye da ƈufaa Ii-isra’el we boo a mbadiid na pudnand alaa Bet-Horon, o Yaal oxe a deɓtiida na asamaan a kalam a ƥuuɓu a maak, da yenaa took den boo Aseka, a mbaraa a den. We a kalam ake a mbar’ina moƴ’u o may we Ii-isra’el we a mbarit’ina laƥ.

Njeeƈ ne a geenooxa, o nqool onqe yee tek

¹² No ñaal naa o Yaal oxe a ɓoxotna Aa-amori we na xa ƥay no Ii-isra’el we, Yosuwe kaa xeɗ’u o Yaal oxe too a lay mbaambir no Ii-isra’el we yee: «Njeeƈ ne, geenooxi o yooroox a Gibe’on, wo o nqool onqe, o naag tek, yooroox a yulanq ale Ayalon.»

¹³ Njeeƈ ne a naaga jiŋ o mbiñ o leng, o nqool onqe a geenoox boo neen xeet fee a ndabdinooxu took no fañ den. Keene a binde kam «Safe le no cofu xe». Njeeƈ ne a geenooxa ndeer ee ndeer asamaan fee, a fañ o mudik boo ngap ñaal muum.

¹⁴ Ñaal nandu naaga naa o Yaal oxe a jaɓitna a qeƭ no kiin neene mos’ee o jeg, too yaaga boo fa ndiik jegatee. O Yaal oxe fa xoox um koy ñoxoran’u Ii-isra’el we.

¹⁵ Cinj kaaga, Yosuwe fo Ii-isra’el lakas we fop a nomtooxa no saŋe naa Gilgal.

Yosuwe a wara maad ɓetuk we no Aa-amori we

¹⁶ Maad ɓetuk we no Aa-amori we a ndalfooxa o ƈuf, a ƭas kam luf naa refna Makeda.

¹⁷ Yosuwe a yegne yee maad ɓetuk we owaay ƭasa kam luf naa refna Makeda.

¹⁸ Yosuwe a laya yee: «Mberengyo a ƥil a maak, mbegit a den ndokand ne no luf naa soo sim goor da yetooxaa a den.

¹⁹ Nuun lakas we o mat, ba nu ngeenoox, ndaa ndaabyo fañ nuun, mbaraa wuu nu ndaawna na den. Ba nu nqaƴ a den da ndok no teeru ke den, yaam o Yaal oxe Roog nuun a ɓoxota a den na xa ƥay nuun.»

²⁰ Yosuwe fo Ii-isra’el we a nqawa Aa-amori we a qaw a ƭomu. Leng-leng na den soom ƥostoox’u na bar alaaga soo a ndaɗik no teeru cegu saŋe ke den.

²¹ Cinj kaaga, Ii-isra’el we fop a nomtooxiida me Yosuwe no saŋe naa da sip’ina Makeda, too ñiiñax ñaaƴ’ee o leng na den. O leng koy saɗ’atee o room a den o ñuxur.

²² Cinj kaaga, Yosuwe a hebla, ndax ndokand ne no luf ne a wetel, soo maad ɓetuk we no Aa-amori we a sutel, a ƥisiidel mbaambir um.

²³ Ke ta heblitna a fi’e, soo ta ɓisiidel o maad oxe Yeerusaleem, oxe Hebron, oxe Yarmut, oxe Lakiis fo xe Eglon.

²⁴ Ye da sutna maad weene boo a ƥisiid a den mbaambir Yosuwe, Yosuwe a xoya goor we Isra’el fop soo a lay aa-adax we no xiixire we yoon’ina fo ten ee: «Matiidyo, nu ndak maad weeke no nqooj.» Waaga a ndalfooxa o matiid soo a ndak a den no nqooj.

²⁵ Yosuwe a laya aa-adax no xiixire we yoon’ina fo ten ee: «Ba nu saɗar, too ba nu ndiid, ndaa saƭakinooxyo, saq njambaar, yaam neeke o Yaal oxe a fi’kaa fañ we nu ñoxoritkaa fop.»

²⁶ Cinj kaaga, Yosuwe a wara maad ɓetuk waa, a lok a den no taxar ƥetik boo no kirand naa.

²⁷ Farna fo njeeƈ mudu naa Yosuwe a hebla da mbudnel no taxar ke. A mbudna a den, a ndeɓ a den kam luf naa da ƭas’ina soo a njuum no ndokand naa no luf naa a ƥil a maak akaa na maadaa maaga boo xaye.

Yosuwe a jaɓa o ɓemb-roog o ñamaak ole no saax le

²⁸ No ñaal leng kut ne Yosuwe a jaɓa teeru fee Makeda, a gefin tuƈ soo a warit o maad um fo we ngenna teen fop laƥ. Xaƴ’ee o leng ta daɗ too a fi’a o maad oxe Makeda ne ta fi’’ina o maad oxe Yeriko.

²⁹ Yosuwe fo Ii-isra’el we fop a inoora Makeda, a ndet na teeru faa Libna soo a songin.

³⁰ O Yaal oxe a ɓoxota itam teeru fee Libna fo o maad um na xa ƥay no Ii-isra’el we, soo da yaqin pic, a mbarit we ngenna teen fop laƥ. Yosuwe xaƴ’ee o leng ta daɗ too a fi’a o maad oxaa ne ta fi’’ina o maad oxe Yeriko.

³¹ Yosuwe fo Ii-isra’el we fop a inoora Libna, a ngar boo a njasnoor fa teeru fee Lakiis, a sip maaga saŋe den. Cinj kaaga, a songaan.

³² O Yaal oxe a ɓoxota a Lakiis na xa ƥay no Ii-isra’el we. No ñaal ƭikandeer naa na ñoq ale a njaɓaan, a yaqin pic soo a mbarit we ngenna teen fop laƥ. A mbi’aan ne da mbi’’ina a Libna.

³³ Maaga, Horam fee o maad Geseer a ƴufgiida a Lakiis, ndaa Yosuwe a xawaan, ten fo xiixire um, too xaƴee o leng ta daɗ.

³⁴ Yosuwe fo Ii-isra’el we fop a inoora Lakiis, a ngar boo a njasnoor fa teeru fee Eglon, a sip maaga saŋe den. Cinj kaaga, a songaan.

³⁵ A njaɓaan no ñaal leng kut ne, a ngefin tuƈ soo a mbarit we ngenna teen fop laƥ. Yosuwe a fi’aan ne ta fi’’ina a Lakiis.

³⁶ Yosuwe fo Ii-isra’el we fop a inoora Eglon, a ŋaay na teeru faa Hebron soo a songin.

³⁷ A njaɓa teeru faa, a ngefin tuƈ, ten fo teeru lakas ke ta waxoox’ina fop soo a mbarit o maad oxaa fo we ngenoogna teen fop laƥ, ne da mbi’it’uuna Eglon. Yosuwe xaƴ’ee o leng ta daɗ, ndaa a gefa teeru kaa fop soo a saŋik we ngenoogna a den.

³⁸ Yosuwe fo Ii-isra’el we fop a saktooxiida, a mbaasooxan teeru faa Debir soo a songin.

³⁹ A njaɓa a Debir fo teeru lakas ke ta waxoox’ina fop, a ngef a den tuƈ soo a mbarit o maad oxaa fo we ngenna a den fop laƥ, too nqaƴ’ee o leng ta daɗ. Yosuwe a fi’a a Debir fo o maad um ne ta fi’’ina a Hebron fo ne ta fi’’ina a Libna fo o maad um.

⁴⁰ Yosuwe a jaɓa saax laa fop. A xawa maad we no jegel ole na xa coong axe, we no jegel ole no ɓemb-roog o ñamaak, we no jegel ole na yulanq ake mbarna no mudand fo we no jegel ole na pudnand ake mbarna no batand. Xaƴoogee o leng ta daɗ, ndaa kaa waroogu oxuu na haaƭaa ne o Yaal oxe Roog fee Isra’el a heblit’uuna o ten.

⁴¹ Yosuwe a jaɓa saax le fop ke xotitna Kades-Barneya, a jof Gaasa no ɓemb-roog o ñamaak, a reef Goseen boo Gibe’on, no ɓemb-roog o janoon.

⁴² A xawa maad weene, a jaɓ a saax ake den na inax a leng kut ale ta inooxanna a den, yaam o Yaal oxe Roog fee Isra’el ñoxoranoogu Ii-isra’el we.

⁴³ Cinj kaaga, Yosuwe fo Ii-isra’el we fop a nomtooxiida no saŋe naa Gilgal.