Yosuwe 1 - NQAARIIT NE ROOG

Yosuwe a rondanda a Moyiis

¹ A cinj ye Moyiis fee o tag no Yaal oxe a xonna, o Yaal oxe a laya a Yosuwe fee o ƥiy Nun reeƭna o tiidimle Moyiis ee:

² «Moyiis fee o tag es a xona. Ndiiki koy, wo fa xeet fee Isra’el fop, inooxyo, njoot o xuluɓ ole Yordaan, ndax nu ndok no saax le ci’uuma a nuun.

³ O mbiñ onquu xa caf nuun a ndakna, xam ci’in a nuun, ne layit’anuuma a Moyiis.

⁴ O fiisel ole nuun xan a xotit na koƥ-a-ƥor ale no ɓemb-roog o ñamaak boo Libaŋ no ɓemb-roog o janoon, a xotit no xuluɓ o maak olaa Ofrat no batand, a xaañ saax le no Heeheet we, a gar boo no maag olaa Mediterane no mudand.

⁵ No ñoow o ñis of fop o leng waagkirang o xox, yaam mexey fa wo ne refit’uuma fa Moyiis. Xaƴkiroong muk too deɓkiroong.

⁶ Saƭakinooxi too saq njambaar, yaam wo o mat na xaajrandkaa xeet fene saax le daaɓooxuuma fo daan den ee xam ci’in a den.

⁷ Kaa rek, saƭakinooxi too saq njambaar tigi, reef a paax kebil ke o tag es Moyiis a bindanoonga fop, fañ o ɗap na ñamaak mbaat na janoon, ndax o fadin kuu hebooxoona.

⁸ Fat o gen no de’ooxaa fa lay fee no safe le no kebil ke, ɓaalan taa kam of ñaal fo yeng, ndax o reef a paax ke bindeena teen fop. Neene o fadnitkaa kuu hebooxoona, soo fop of a ñaaƴ.

⁹ Ba o weec ee mi layong ee saƭakinooxi too saq njambaar. Ba o saɗar boog too ba o diid, yaam mi o Yaal oxe Roog of mexey fa wo muu o retaa.»

Yosuwe a waaja a coot ale Yordaan

¹⁰ Yosuwe a hebla aa-adax we na xeet fee

¹¹ da mbid kam saŋe ne fop, a lay xeet fee yee: «Yaxandooxanyo a ñaaƈ ale ñaamel, yaam ndeer mene fo ñaal tadik xan nu njoot o xuluɓ ole Yordaan, njaɓik saax le o Yaal oxe Roog nuun a ci’na a nuun nu njegkin.»

¹² Yosuwe a laya we na carind ale Ruben fo we na le Gaad fa genwal fee na le Manaase yee:

¹³ «Mbetandooxyo ke Moyiis fee o tag no Yaal oxe a maƭoox’ina a nuun, ye ta layna yee: ‹O Yaal oxe Roog nuun xan a ci a nuun a ñootnax no fiisel ole ta ci’na a nuun no batand ne Yordaan.›

¹⁴ Rew we nuun fo xa ƥiy axe nuun fo cegel ke nuun a mbaaga o yoq no mbiñ onqene Moyiis a ɓisiidna a nuun. Kaa koy, nuun goor we mbaagna o ndet na xire fop, mbapooxanyo a ñoq, njoot a Yordaan soo adooxan fog nuun. Fat nu ndimle’aa a den,

¹⁵ boo yaa o Yaal oxe Roog nuun a ci’kaa a den a ñootnax ne ta ci’tuuna a nuun, da ndef no lanq ke ndefna lam den kam saax le o Yaal oxe Roog den a ci’na a den. Cinj kaaga, xan nu mbaag o nomtooxiid meeke no batand ne Yordaan, ndal no saax le Moyiis fee o tag no Yaal oxe a lasna a nuun.»

¹⁶ A ndoona a Yosuwe yee: «Xan i mbi ke hebloona a in fop, too xan i ndet muu luloona a in.

¹⁷ Xan i nananong ne i nananit’ina a Moyiis no fop. A woora kañ ee xan o Yaal oxe Roog of a ref fa wo ne ta refit’ina fa Moyiis.

¹⁸ Oxuu nananeerna fa lay of, a fañ o reef fop ke o hebilkan, fat a warel. Wo daal, saƭakinooxi rek too saq njambaar.»