Yeremi 9 - NQAARIIT NE ROOG

Xeet faa xa maaƥ a adinna

¹ Ndi an na ci’kaxam na koƥ-a-ƥor alaa o daland no ñaañaaƴ? Yaaga xaƴkoogaam xeet es soo goƭ a den, mi o Yaal oxe, yaam den fop seeseeq a ndefu, a yaj no hoohod.

² O Yaal oxe kaa tee: «Ɗelem den kaa nand nen a qali ŋaayne, ndax da maaɓ doŋ. Ndigil taxee da maadooxaa no saax le, yaam kaa mbi’aa paaxeer took paaxeer too nqalamiraam o and.

³ Fat oxuu refna na nuun a wootoox a xaariit um, too ba nu ngooloox o pog nuun o leng, yaam o pog oxuu refna kaa ƴiƴtaa, soo xaariit fuu refna a yaqaa ƭool.

⁴ Oxuu refna kaa naxaa o kend um, too naagee o layaa ndigil. Kaa merand ɗelem den xa maaƥ, a mbi a mbi paaxeer boo a naang cat.

⁵ Kaa o gen a ndeer naanaxir ƥor, naanaxir doŋ taxu da mbañaam o and.» O Yaal oxe layun.

⁶ Ten taxu keeke o Yaal oxe Hupna fop a layu: «Xam naayin a den nen njelem soo ɗeetloox a den, yaam xar helum o fi’an lakas a xeet es?

⁷ Ɗelem den a kas a baawar oo, naanaxir ƥor a layaa. Kaa salanaa o kend den jam, too yaaga fop oo mbog a ƭaapanun no xeeñ den.

⁸ Ndax xawkiim a den yaam keene, soo rabdinoox took xeet fa nandu neene?» O Yaal oxe layun.

Jamaane fee na xa lool axe fo ƭomatax ke

⁹ Xam jibin xa lool fo xa iin took xa coong axe, ɗomatooxaa na xa suufand axe na koƥ-a-ƥor ale, yaam kaa ndoxel fop, too o leng reefatee teen. O ñuxur ole na xa siir axe nantataand teen, tiiƭ ke nen cegel ke a ƈufa, fop a sooƴ.»

¹⁰ O Yaal oxe kaa tee: «Xam fi a Yeerusaleem juum kefatin, ngenand na xa ƥox-a-koƥ axe, soo fi teeru ke Yudaa a koƥ-a-ƥor, maa o leng a genateerna.»

¹¹ Oxum o kiin jegu yiif, ndax ta and kene? O Yaal oxe a feeñlangaan o ten, fat a tekit ke taxna saax le a fes a pec, a doxel nen a koƥ-a-ƥor, maa o leng a reefateerna?

¹² O Yaal oxe a layahina yee: «Ke garna fo keene refu yee kaa mbaas ke jangnuuma a den, a mbañ o nan-giloox soo a mbañ o ndeef ke layooguuma a den.

¹³ Kaa nqox no saƭik xoox ole den fo na Baaliin, ne daan den a aqatinit’uuna a den.»

¹⁴ Ten taxu o Yaal oxe Roog fee Isra’el Hupna fop a lay ee: «Xam ñaamnoor xeet feene qaaɗu, soo yernoor a den foofi laa jegna ndoxar.

¹⁵ Xam pasar a den a ndeer qeet kaa da and’eerna, den oo daan den oo, soo hebil da ndaabtel laƥ boo yaa um moocandkaa a den.»

¹⁶ Keeke o Yaal oxe Hupna fop a layu: «Nqalaatyo a paax ke layuuma! Nqoyyo rew we na ƭomatooxaa, da ngar! Nqoyniidyo rew waane’u we!»

¹⁷ Fat a ñof o ƭomatooxan a in, ndax a kid in a nqaar fo xa kooniit, xa poombooñ in a yuuraa foofi!

¹⁸ Yaam o ñuxur ƭomatax a nannoorta Siyoŋ ee: «Cey, i ngefe tuƈ! I njega gaci fa ƭomu, yaam i mbara o nqaƴ saax le, kenand ke in a mbaytel.»

¹⁹ Nuun rew we, nan-gilooxyo boog fa lay fee no Yaal oxe, mbet nof nuun no ke ta layaa! Aqatinyo xa ƥiy xa tew axe nuun a ƭomatax, oxuu refna a jangin o tew o kend um ƭomatax nene:

²⁰ «Fa nqon fee a ŋaaytiida na xa palangteer axe in, a rok kam pind mosu ke in, a saŋkaa xa teɓandoong axe no ped ke fo mbes ke no paayo ke.»

²¹ O Yaal oxe kaa tee: «Wo Yeremi, yegnitahini fa lay feeke: Xa tal axe no wiin we xan a luuñaa nen suqi faa picteena na xa qol axe, nen xa yaƥ axaa o saasaxad a xaƴna a cinj um, too o leng gisee a den.»

O and o Yaal oxe refu o and ndigil

²² O Yaal oxe kaa tee: «Baa o yaal-o-and oxe a fakoorit o and um! Baa jambaar fee a fakoorit njambaar um! Baa o yaal halal oxe a fakoorit halal um!

²³ Kaa koy, fat oxe bugna o fakoox, a fakoorit kene: O jeg-yiif fo o andaam, yaam mi refu o Yaal oxe na fesoortaa o paaxel, a ƭat fo o cofel took lanq ke. Keene soom felaxam.» O Yaal oxe layun.

A maƭax took no we nqucooxna no cer

²⁴ O Yaal oxe kaa tee: «Ñaal key a ngaraa kaa um dalkaa took we nqucooxna no cer,

²⁵ ndefna Miimisira we, Yuuyudaa we, Ee-edoom we, Aa-amon we, Moomowaab we fo we ngenna na koƥ-a-ƥor ale, na nduusaa took fee na xa ƭek axe den. Qeet keene fop fo Ii-isra’el we fa qoox den nqucooxee na qeeñ den.»