Yeremi 7 - NQAARIIT NE ROOG

A koolax a booreer

¹ O Yaal oxe a daawna a Yeremi fa lay um na xa ƭelem axene:

² «Geenooki na carind ale no Mbind ne no Yaal oxe soo falaloox maaga yee: ‹Nuun Yuuyudaa we fop na ndoktaa na carind akene, ndax nu mbaɗoox o Yaal oxe, nan-gilooxyo ke o Yaal oxe a layna!

³ Keeke o Yaal oxe Roog fee Isra’el Hupna fop a layu: Ñaaƴityo too mbi ne warna, yaaga xam xaƴ a nuun nu ngen no saax lene.

⁴ Ba nu ngooloox fa lay fa maamaaɓ fene: Mene Mbind ne no Yaal oxe a refu, Mbind ne no Yaal oxe, Mbind ne no Yaal oxe o mat oo.

⁵ Nu ñaaƴtangaa tigi too mbi ne warna, ngate’it o cofel ndeer o kiin fo o kend um,

⁶ mbañ o toroxand o gataakoon ole, o waan ole mbaat o ñaaw oxe, mbañ o ƥax no mbiñ onqene fo’oy no xe fi’eerna cageer soo mbañ o ngiɓoor fo roog can, ndik nu qic taamaala took nuun,

⁷ yaaga, xam xaƴ a nuun nu ngen mene, kam saax le ci’uuma daan nuun yaaga boo fa ndiik fo boo kili.

⁸ Kaa koy, kaa nu ngooloox fa lay fa maamaaɓ faa ɗaxeerna dara.

⁹ Mee ndax kaa nu nguuɗaa, mbaraa, seeqaa, ndaaɓooxaa na xa maaƥ, ndoxanaa a Baal cuuraay, ngiɓoor fo roog can kaa nu andeerna ñaal o yeng a jalan.

¹⁰ Cinj kaaga, nu ngar mbaambir es, kam Mbind nene kesaneema, ndamtin ee: ‹In wey no woor!› ndax nu maad o mbi’aa cednooxu keene.

¹¹ Ndax kaa nu mbi Mbind nene kesaneema ngol no guuɗ? Keene ga’um mi fa xoox es. Mi o Yaal oxe layun.

¹² Ndetyo boog no mbiñ o tedu nqaa jeg’uuma kam Silo, me ngenand es ne a reeƭna yaaga, too nga kaa fi’anuuma yaam a pi a paaxeer ake Isra’el fee xeet es.

¹³ Ndiiki koy, mi o Yaal oxe, mexe layaa a nuun ee nu mbi’a a pi akeene fop. Roog fuu feedna um lay fa nuun, too nu nan-gilooxee, um xoy a nuun boo naag cat, too nu njaaɓee.

¹⁴ Ten taxu, Mbind nene kesaneema too nu ngoolooxin, o mbiñ onqeene ci’uuma a nuun, nuun fo daan nuun, xam fi’in ne fi’uuma a Silo.

¹⁵ Xam deɓ a nuun maa goƭaxama ne deɓtuuma fog we nuun fop, we mbaqaqoorna na carind ale Efrayim.»

A qeƭ alaa Roog a nan-gilooxkeerna

¹⁶ «Wo Yeremi, ba o xeɗan xeet fene. Ba o loolooxan mbaat o xeɗooxan a den. Ba o ƴufginoox paam es, yaam nan-gilooxkiroong.

¹⁷ Ndax kaa ga’iro ke da mbi’aa kam teeru ke Yudaa fo no ped ke Yeerusaleem?

¹⁸ Xa teɓandoong axe kaa ndaxanaa, paap ke a ngeƥandaa fiɗel le, soo rew we a nqiiwaa, ndax da mbi’an a Lingeer fee na asamaan xa kaf. Kaa njuuranaa roog can ke biiñ, ndax da mbuuxnooraam.

¹⁹ Kaa koy, mi o Yaal oxe kaam laamtaa: Ndax mi a mbuuxnooraa? A qoox den kañ a mbi’aa, too gaci den a qicaa.»

²⁰ Ten taxu keeke o Yaal oxe na refkaa boo faw a layu: «Fuux es fo say es owe mbiltooxaa no mbiñ onqene, took no wiin we fo muumeen ke, took taxar ke na koƥ ale fo ke lanq ke a mbatna. Xan a kaƥaa too ñufkee.»

Xeet faa nan-gilooxeerna a Roog den

²¹ Keeke o Yaal oxe Roog fee Isra’el Hupna fop a layu: «Ƥaatyo sadax toxel ke nuun no sadax lakas ke nuun soo ñaam a tegeƴ ake den.

²² Yaam layiim daan nuun dara too hebliim a den tus no kaa farna no sadax toxel ke fo sadax lakas ke, ye suttuuma a den no saax laa Misira.

²³ Kaa kañ keeke heblum a den: Nan-gilooxyo o ñuxur es, too xam ref Roog nuun, nu ndef xeet es. Ñaaƴyo na ƭat ake simuuma a nuun fop, ndax nu ƭaay.

²⁴ Kaa koy, nan-gilooxee, ndungee nof den, ndaa kaa ndeefaa a qalaat a qoox den soo a nqox no saƭik xoox o faaxeer ole den. Ƭeetiraam, ndaa kaa mbesaam ndiiñ.

²⁵ No kaa xotitna no ñaal naa daan nuun a sutoorna no saax laa Misira, a gar fa xaye, kaam lultiidoogu a nuun duleer we dag es, roog fuu feedna um luliid a den.

²⁶ Kaa koy, nu nan-gilooxiraam, nu ndungee nof nuun. Kaa nu saƭik a qoox, moƴ o yedin daan nuun.

²⁷ Wo Yeremi, o layangaa a den keene fop, nan-gilooxkirang, o xoyangaa a den, njaaɓkirang.

²⁸ Maaga, fat o lay a den ee: Nuun ndefu xeet fee nan-gilooxeerna o ñuxur no Yaal oxe Roog den, soo a mbañ a maƭax um. Ngor kaa xon faq me nuun, a mo mir na xa ton nuun.»

A yulanq ale na bar ale

²⁹ Nuun xeet fee Yudaa, nduusyo a biil a ciig ake nuun na laltaa a ƥoxotax nuun no Yaal oxe, ndeɓ a den! Yoɗyo a kim a ƭomatax took xa coong axe naangna halit, yaam o Yaal oxe kaa sib too a deɓ suk ne mbuuxnooruuna.

³⁰ O Yaal oxe kaa tee: «Wiin we Yudaa a mbi’a kaa faaxeerna na kid es. Kaa ƥek nitaal roog cakalaaru ke den kam Mbind ne kesaneema, ndax da nqoolaƭarandin.

³¹ A maxa a ñaang a sadaxand ake Tofet na yulanq alaa Ben-Hinom, ndax da ndoxaa xa ƥiy xa koor axe fo xa tew axe den nen sadax, ta ref kaa heblit’eeruuma too mos’inum o xalaat sax.»

³² Ten taxu o Yaal oxe a laya yee: «Ñaal key a ngaraa kaa o leng a layitkateerna a Tofet mbaat a yulanq ale Ben-Hinom, ndaa xan a xoyateel a yulanq ale na bar ale. Xon we xan a ngasateel Tofet, yaam o gasand jegkatee sen.

³³ Xa tal axe na xeet feene xan a ndef ñaamel tiiƭ ke fo ƥaaɓaan ke no lanq ke, too o leng fiiqilkee a den.

³⁴ Xam ñuf kam teeru ke Yudaa fo no ped ke Yeerusaleem xa ƈeel axe fo xa soroxole xe, o ñuxur no kor-no-kulook oxe fo ole no kulook oxe, yaam saax le xan a raad.»