Yeremi 6 - NQAARIIT NE ROOG

O njakad o maak oxe ɓeedaa a Yeerusaleem

¹ O Yaal oxe kaa tee: «Nuun Beebensame we, ƈufyo, sutoox a Yeerusaleem! Njibinyo a luuƥ kam Tekowa, yoɗ o anddiloor took Bet-Hakerem, yaam taamaala a feeñta no ɓemb-roog o janoon, o njakad o maak.

² Siyoŋ fa mosaan fee too a yaawnoox mexe gefiidan tuƈ.

³ Wiin jan xan a njagniid me ten nen gaynaak fo xa siir den, a sip ƭiif den me widuuna fop, oxuu refna a suufnaa na ƥak um.

⁴ Owe mbalalooxaa yee: ‹Mbaajyo i nqire’ik fo ten! Inooxyo, i songkin njoloor o mbuc! Kaa koy, sabab took in, yaam ñaal ne xe faafataa, yook kirand ke a liitooxaa.

⁵ Inooxyo, i songkin kam o yeng ole soo yaq pind mosu ke ten.› »

⁶ Keeke o Yaal oxe Hupna fop a layu: «Mbuuɓyo taxar ke, maxit a den a uum lanq a songir no saŋe ne Yeerusaleem. Teeru fee wareena o xaw oo, yaam ñagadil ƥor ndefu kam fee.

⁷ Ne a cur a balnitaa foofi um, neene a balnitaa kañaan um. Combol fo yaq rek na naneel teen, um gen no ga’aa teen cay xa ƭomel fo kaañax.

⁸ Wo Yeerusaleem, jaɓi maƭooxel, ndik um ɗegoor fa wo o kay, suptong a koƥ-a-ƥor, maa o leng a genateerna.»

Xeet faa mbañna o nan-giloox

⁹ Keeke o Yaal oxe Hupna fop a layu: «Gisaatooxi yoqatin we Isra’el boo ta xet ne ndaxar biiñ ƥoore a gisaatooreel. Saaki na xa par axe, ne o niinir a fi’tan.»

¹⁰ An um layitkaa? Ndi an um raagooxkaa, ndax um nan-gilooxel? Nof ke den kaa sux, mbaagee o nan-giloox muk. Fa lay fee no Yaal oxe kaa ref na den calat, mbugiran.

¹¹ Kaam may muut fo fuux le no Yaal oxe, hatlatinum muk. O Yaal oxe a laya yee: «Ɓaxi fuux le mi boog took xa caaƈ xa tutuuñ axe no ped ke fo took teɓandoong ke fop. Goor fo rew, nogoy fo we ñaamna jamaane den, den fop xan a ƥisel.

¹² Pind den xan a ndaawnel wiin lakas, xa qol den fo rew den fop, yaam xan o ɓay es a dal took no we ngenna no saax le. Mi o Yaal oxe layun.

¹³ Yaam no ke xotitna no xe moƴna o neew boo no xe moƴna o maak na den, fop o njiriiñ a qoox den a mbaaƭaa. No ke xotitna no tuleer oxe boo no saasadax oxe, fop maamaaɓ a ndefu.

¹⁴ Kaa mbaadnitaa kaañax ke na xeet es caaxaan, a layaa yee: ‹Jam a jega, fop a ñaaƴa›, too yaaga fop oo jam jegee.

¹⁵ Ndax a njega o ndicax no cednooxu ke da mbi’na? Sedee teen dara! Njegee kaa da sedna. Too andee gaci. Ten taxu xan a mbog no we ñakna xa ñis den, a mbagiɗ tak, yaa um dalkaa took den.» O Yaal oxe layun.

¹⁶ Keeke o Yaal oxe a layu: «Ngeenooxyo ƭeet me nu nqotaa, laamit a qal ake yaaga. Mbaaƭyo a ƭat a paax ale soo ñaaƴ teen. too xan o laaw nuun a ñootnoox. Kaa koy, nu ndoona yee: ‹I ñaaƴkee teen.›

¹⁷ Dalnanaam a nuun yeeyetax waa maƭooxna a nuun ee: ‹Nan-gilooxyo fangax le na luuƥ ale.› Kaa koy, nu ndoona yee: ‹A ƭat in yongee teen.›

¹⁸ Ten taxu, nuun qeet ke, nan-gilooxyo, andyo a paax ke na dalkaa a den!

¹⁹ Lanq ke, nan-gilooxyo! Mi o mat na ɓisiidkaa took xeet fene taamaala fee a qalaat a paaxeer den a ndimna. Nan-gilooxee fa lay es too ngayee kebil es.

²⁰ Xar soxla’um cuuraay faa inoorna Saba fo xeet fa mbelu tuñ laa hatiidna no saax goƭu? Muumeen ke nu ndoxaa took o sadaxand ole mbeliraam, too sadax ke nuun njemiraam.

²¹ Ten taxu, mi o Yaal oxe, xam doon mbaambir xeet fene a panq. Xan a mbaɓoox teen soo a saŋkoox den fop, paap ke fo xa ƥiy xa koor den, gentand den fo qaariit den.»

O pañ oxe xe inoortiidaa no ɓemb-roog o janoon

²² Keeke o Yaal oxe a layu: «Xeet fey a inoortiidaa no saax laa no ɓemb-roog o janoon, saax maak a ɗistiidaa no cat adna.

²³ Kaa pokoox a qali fo a salma. Kaa ƈaxooxaa soo a ñak yirmande. Fangax le den kaa dititaa nen le no maag ole. Kaa ŋaay pis, a nqodan a ñoq ale, a ndef leng, too wo a inooxanu, wo Siyoŋ fa mosaan fee.»

²⁴ Yaa i ndaawna o nan oleene rek, xa ƥay in a leeƈooxa, naqad a dam a in, i ƭomeel nen o tew oxaa na gaajooxaa.

²⁵ Ba nu sutoox na koƥ ale, too ba nu ndet na ƭat ake, yaam o pañ oxe xaay maaga, a pokoox laƥ, diid le xey muu refna.

²⁶ O Yaal oxe a laya yee: «Nuun xeet es, nderooxyo xa saaku, mbirkiloox kam ndaw. Ñaawooxyo nen oxaa na ñaawooxaa o ƥeem o ngoor o leng kut, ƭomatoox boo nqij, yaam o yaayaq oxe xe garaa a bet a in.»

Njelem naa waagaandeena o xooland

²⁷ O Yaal oxe kaa tee: «Wo Yeremi fee refna saŋe, dalnaaxoong, ndax o ɗeetloox xeet es, ne njelem a ɗeetloorteel. Xan o ɓaal soo horoox a pesoorooƭ den.»

²⁸ Den fop faafañ saƭku a qoox a ndefu, a ñu’aa lakas we, a saƭik koŋ nen xanjar mbaat njelem, a ndef den fop fiifi paaxeer.

²⁹ Uuf ne a wuuɗa tigi, beteex fee a naay yaam fiɗel, ndaa o xoolandaa xaaliis kasaara yoo, yaam ndoƭ ke mbatkee muk.

³⁰ Kaa nqoyeel xaaliis fa sibel, yaam o Yaal oxe kaa sib a den.