Yeremi 52 - NQAARIIT NE ROOG

Nebukadnesaar a dama a Sedekiya

¹ Sedekiya a jeg’a xa kiid qarɓeen ƭik fo o hiid o leng, ye ta sogna refaa o maad. A maadooxa xa kiid xarɓaxay fo o hiid o leng kam Yeerusaleem. Ya um Hamutal a ne’’e, a ref o ƥiy Yeremi fee gen’ina Libna.

² Sedekiya a fi’a deŋ kaa faaxeerna na kid no Yaal oxe nen a Yoyakim.

³ Keene a xewa, yaam ne o Yaal oxe a fuuxanna a Yeerusaleem fa Yudaa boo a deɓ a den maa goƭuuna. Sedekiya a siiknoora fo o maad oxe Babilon.

⁴ Maaga, no hiid o ɓetuu nahkandeer ole no maat Sedekiya, no ñaal xarɓaxayandeer ne no nqool xarɓaxayandeer onqe, Nebukadnesaar fee o maad oxe Babilon a garana a Yeerusaleem, ten fo xiixire um fop. A sipa saŋe den mbaambir teeru fee soo a mbi a uum lanq a songir me widuuna fop.

⁵ Teeru fee a wid’e o kurul-keƥ boo no hiid xarɓaxay fo hiid o lengandeer ole no maat Sedekiya.

⁶ No ñaal ɓetuu nahkandeer ne no nqool o nahkandeer onqe, ye biim le a ɗomna na teeru fee boo wiin we njegatee kaa da ñaamna,

⁷ o gur a sexe no saŋe ne na teeru fee. Xiixire we fop a ƈufa, a sutoox teeru fee no yeng ole, a ndeef na ƭat ale no ndokand ne refna ndeer saŋe ƭik ke paam a ƭing ale no maad oxe, a soƥ Kaakalde we a mbid teeru fee o kurul-keƥ. Ƴuuƴuf we a nqota a ƭat ale jaginna no xuluɓ olaa Yordaan.

⁸ Kaa koy, xiixire we no Kaakalde we a ndaaba o maad Sedekiya, a ndaawtin na xa saawit axaa Yeriko, soo xiixire we ten fop a pasaroox maa goƭuuna.

⁹ Kaakalde we a ndama a Sedekiya, a ƥisin maa no maad oxe Babilon reeƭna Ribla, no saax laa Hamat, soo oxeene a hate’in.

¹⁰ O maad oxe Babilon a xirisnoora xa ƥiy xa koor axe Sedekiya na kid faap den. A xirisnoora itam kelfa ke Yudaa fop maaga Ribla.

¹¹ Cinj kaaga, a yulna a kid ake Sedekiya, a feñtin ceen xanjar, a ɓisin Babilon soo a wegin kaso boo neene ta xonu.

Nebusaradan a fadatina yaq fee Yeerusaleem

¹² No hiid xarɓaxay fo hiid o ɓetuu nahkandeer ole no maat Nebukadnesaar fee o maad oxe Babilon, no ñaal xarɓaxayandeer ne no nqool o ƥetkandeer onqe, Nebusaradan fee adooxan’ina yeeyetax we no maad oxe Babilon, a gara Yeerusaleem.

¹³ A doxa Mbind ne no Yaal oxe fo mbind no maad ne fo pind ke Yeerusaleem boo no pind ke no wiin maak we fop.

¹⁴ Xiixire we no Kaakalde we yoon’ina fo o aa-adax oxe no yeeyetax we a maafa saŋe ke mbid’ina a Yeerusaleem fop.

¹⁵ Nebusaradan fee adooxan’ina yeeyetax we a ɓisa gilaa saax took o hup doole we maad’ina o ngenaa na teeru fee, ta jeg na den a qaaj no we moƴ’ina o ndool na xeet fee fo we ƥoxotoox’ina no maad oxe Babilon fo we yoq’ina no baane ke.

¹⁶ Kaa koy, Nebusaradan fee adooxan’ina yeeytax we a xaƴ’a leng-leng no we moƴ’ina o ndool no saax le nen ɗiiɗing taxar biiñ fo xooxoox.

¹⁷ Kaakalde we a nduguña a toodook xanjar ake no Mbind ne no Yaal oxe fo tiƈoor ke fo o waaŋaan xanjar o maak ole reeƭna kam Mbind ne no Yaal oxe, soo a ƥis xanjar faa fop Babilon.

¹⁸ A njanga fo ngaleera ne, xa ƥang axe, capil ke, a tokol a biisir ake, a tokol a lakas ake fo ƥaxañ xanjar ke fop njiriiñooroogeena na paɗax ale.

¹⁹ O aa-adax oxe no yeeyetax we a janga itam xa toon axe, fo njaq ne, a tokol a biisir ake, fo ngaleera ne, a pagal ake na xa lampa xe, a tokol a lakas ake fo xa bool axe, fop ke fi’it’eena wurus mbaat xaaliis.

²⁰ A toodook a ƭak ake, o waaŋaan o maak ole fo qoox xarɓaxay fo qoox ƭik xanjar ke mbaxoox’uuna fo tiƈoor ke o maad Salomo a fi’an’ina Mbind ne no Yaal oxe, ƥaxañ xanjar keene fop o meɗel den and’aand.

²¹ Geel le na toodook a leng ale a reeƭa xa noonoong xarɓaxay fo xa noonoong ɓetaa tadaq, soo wurmbal um a fi xa noonoong xarɓaxay fo xa noonoong xa ƭaq. O waaƥ a fi’’u, soo o tinqel um a fi o yaajel qol nahik.

²² A jeg’a took fee xoox xanjar laa geel um a reeƭna xa noonoong xa ƥetaq. Me widna xoox le a jeg’a mbiic fo xa goronaad, fop a ref xanjar. Neene a refit’u itam na toodook a ƭikandeer ale fo xa goronaad um.

²³ A jeg’a xa goronaad teemeed axaa mbid’ina mbiic ne, soo xa goronaad qarɓeen ɓetuu nahik fo xa goronaad ɓetaa fo leng na den a lipaa.

²⁴ O aa-adax oxe no yeeyetax we a dama a Seraya fee o saasadax o maak oxe fa Sefaniya fee o saasadax oxe reefanuuna fo yeeyetax daduk we no ndokand ne no Mbind ne no Yaal oxe.

²⁵ A damta kam teeru fee itam jawdiin faa adooxan’ina xiixire we, goor ɓetuu ɗik waa mbog’ina no andir ne no maad oxe too a soƥ’el kam teeru fee, o piibind oxe no xe kelfa’’ina xiixire we, gadin’eena a pindax ale na xeet fee no saax le fo goor qarɓeen ɓetuu fa leng na xeet fee no saax le ndeeƭna kam teeru fee.

²⁶ Nebusaradan fee adooxan’ina yeeyetax we a xota a den, a ɓis a den Ribla maa no maad oxe Babilon.

²⁷ O maad oxe Babilon a xawnoora a den soo a warnoorit a den Ribla no saax laa Hamat. Neene, xeet fee Yudaa a ƥise gilaa saax took o hup doole maa goƭna mbaafaap den.

²⁸ Neeke we Nebukadnesaar a ɓis’ina gilaa saax took o hup doole na xeet fee a mbod’u: No hiid o ɓetuu ɗikandeer ole no maat um, Yuuyudaa cuni tadik fo qarɓeen ƭik fo daduk.

²⁹ No hiid xarɓaxay fo hiid o ɓetuu dadkandeer ole no maat um, a damtiida Yeerusaleem wiin teemeed ɓetuu tadik fo qarɓeen tadik fo ɗik.

³⁰ No hiid qarɓeen ƭik fo hiid o dadkandeer ole no maat Nebukadnesaar, Nebusaradan fee adooxan’ina yeeyetax we a damiida Yuuyudaa teemeed ɓetuu ƭik fo qarɓeen nahik fo ɓetuk, soo fop oo fop a ref wiin cuni nahik fo wiin teemeed ɓetuu fa leng.

O maad oxe Babilon a wuusa a Yoyakin

³¹ No hiid qarɓeen tadik fo hiid o ɓetuu ɗikandeer ole no mbaƭ ne Yoyakin fee o maad Yudaa, no ñaal qarɓeen ƭik fo ñaal ƥetkandeer ne no nqool xarɓaxay fo nqool o ƭikandeer onqe, Ewil-Merodak fee o maad oxe Babilon, no hiid o feraand ole no maat um, a yirma a Yoyakin fee o maad Yudaa soo a sutnin na kaso faa.

³² A laya fo ten fo o paaxel soo a cooxin a seek alaa hupna a seek ake no maad lakas we ndeeƭna fo ten Babilon.

³³ A suptanaan toki kaso ke ten, soo Yoyakin a fogataa fo ten o roon kili, no ñoow o ñis um fop.

³⁴ Mbeet oo mbeet, Yoyakin a daawtooga no maad oxe Babilon ñoowir um no ñoow o ñis um fop, boo neen a xonu.