Yeremi 50 - NQAARIIT NE ROOGNjom ne Babilon fo a bat ale Isra’el 1 Fa lay fee o Yaal oxe a layna na Babilon, no saax le no Kaakalde we, a reefandin no tuleer Yeremi: 2 «Yegnityo a ndeer qeet ke, lambin, sip a laay a anddiloor, kaam ee lambinyo, mbañ o ƭasin dara, lay ee: Babilon a jaɓe, Bel a naag ɓot a sed, Merodak a diidlandel! Nitaal roog ke Babilon a seda ɓot, pangool ke ten a ndiidlandel. 3 Xeet a inooxantaan no ɓemb-roog o janoon too xan a supit saax le ten a pec. O leng genkatee teen, wiin we fo cegel ke a nduux a koƥ. 4 Na pe akaaga fo na jamaane faaga, Ii-isra’el we fo Yuuyudaa we xan a nomtooxandooriid. Mi o Yaal oxe layun. Xan a ñaaƴaa a loolaa, a mbaaƭaa o Yaal oxe Roog den. 5 Xan a laamtaa a ƭat ale jofna Siyoŋ, a ngeleer a kid den farna fo maaga: ‹Ngaryo, i ndamoox no Yaal oxe no ngiɓoor naa na refkaa boo faw, too i mbeeckiran muk.› 6 Xeet es kaa ndeeƭu o siir paal mo’u. Gaynaak den kaa mo’andoogu a den, a njoqooynoornaa a den na xa coong axe. Kaa mbirlooxoogu ndeer xa coong axe fo a ñaang ake, a mbeecit ngetand den. 7 Fop we nqetoogna fa den, a listooga a den, too fañ we den kaa layoogu yee: ‹I mbi’ee pariƴ leng, yaam kaa tooñ o Yaal oxe, ngenand ne no cofel ole, o Yaal oxe refna yaakaar no daan den.› 8 Ƈufyo sutoox a Babilon, inoox no saax le no Kaakalde we! Qustooryo nen a suk pambe kaa adooxanna ged. 9 Nga’angyo, xam init no saax le no ɓemb-roog o janoon a yaj a pokate no qeet maak, ɓakandiid a den took Babilon. Xan a mbogooxanin, a njaɓin. A kas ake den kaa nand fo ake no qir o say oxaa gatkeerna o ƥor muk. 10 Saax le no Kaakalde we xan a gefel, fop we na mbalitkan xan a ndeyƭoox. Mi o Yaal oxe layun. 11 Nuun we nguyitna xeet es, a bug oo nu mbelakinoox too ndef no ɗaay, ndaaploox nen fi laa na duutaa bele, ŋexel nen naar-koor, 12 ndaa xan ya nuun a sed ɓot, oxe rimna a nuun xan a seeƈaar, a refat oxe falakna na saax ake. A koƥ-a-ƥor a refkataa, lanq beeru koroŋ fo o tan.» 13 Fuux le no Yaal oxe xan a tax genkataand, a wootat ne te fodeena fop. Fop we na ndeefkaa paam Babilon xan a njaaxiɗ, a mbuuƴanaa yaq fee daluuna. 14 Nuun xaaxaƴ a qali we fop, mbogooxanyo xire me widna a Babilon. Nqaƴyo took um, ba nu ngend a kas ake, yaam a tooña o Yaal oxe. 15 Njibinyo o saax oo saax o wuuq xire took um! Babilon a ɓoxotooxa! Taax-took ke ten a ngaakooxa, tabax ke ten a njiƭtoox, yaam ndabdinax no Yaal oxe yoo. Ndabdinooxyo took um, mbi’in ke ta fi’na lakas we. 16 Moocandyo kam Babilon oxe na duufaa fo xe na pokooxaa a ñand ale yaa fo a saxad ale. Mbaambir laƥ mbaawar ne, fat oxuu refna a geleeroox farna fa xeet um, o kiin oo kiin a ƴuf farna fo saax um. 17 Isra’el kaa reeƭu mbaal mo’u, cogoy ke a ndaxan. O maad oxe Asuur eetun o lisit, soo oxe falakna o duguñaa xa kiiƈ um a ref Nebukadnesaar fee o maad oxe Babilon. 18 Ten taxu keeke o Yaal oxe Roog fee Isra’el Hupna fop a layu: «Xam xaw o maad oxe Babilon fo saax um ne xawtuuma o maad oxe Asuur. 19 Cinj kaaga, xam nomtiid a Isra’el no ngenand um, ta suufaa took Karmel fo kam Basan, a giñ tem took o joong ole Efrayim fo kam Galaad. 20 Mi o Yaal oxe kaam ee: Na pe akaaga fo na jamaane faaga, xan njofaƭar ne Isra’el a waaƭeel muu refna, ndaa doonkaand a ngid, bakaad fee Yudaa a naaɓeel, ndaa ga’kaand sen. Yaam xam waasan we um xaƴkaa da ñoow. 21 Songyo saax le Meratayim, ndal took we ngenna Pekod! Moocandyo a den, saŋik a den boo ba o leng a yoq! Mi o Yaal oxe layun. Mbadinyo ke hebluuma a nuun fop! 22 Xa buuq xire xe njibaa kam saax le, too o njakad onqe a magna. 23 Ndi nam o leede le na adna fa muum a ɓolte, a duguñel? Ndi nam Babilon a gefte tuƈ, a refat o njaaxɗataand a ndeer qeet ke? 24 Wo Babilon, ɗaapanaaxoong mbog, o yen teen, too foogino. Ye ga’ee’oona teen rek, naagee nuus, yaam kaa o maafir fa mi o Yaal oxe.» 25 O Yaal oxe a weta ngeekand um, a suudit teen ƥonax ke ta laltitkaa fuux ɗomu le ten. O Yaal oxe na refkaa boo faw Hupna fop xan a fadin calel um kam saax le no Kaakalde we. 26 Inooryo muu refna, ngar took Babilon, mbaƭit tap ke ten, mbi’in a kusax, ngefin tuƈ. Baa dara a yoqat teen. 27 Mbaryo wiin maak we ten fop, ƥis a den no warand olaa! Sabab took den, yaam bes den a fadiida, waxtu fee da ngadooxkaa a pi den. 28 Nan-gilooxyo! Xa buuq axe no ƴuuƴuf we, axe no we ndaɗitna no saax le Babilon, owe yegnitaa kam Siyoŋ ee: «O Yaal oxe Roog in a rabdinooxa, a rabdinooxana yaq fee no Mbind ne ten.» 29 Nqoyanyo a Babilon xaaxaƴ a qali we, fop we ndefna ɗana! Ndalyo me widuuna, ba o leng a daɗ. Ndabdeenoo a pi um, mbi’in deŋ ne ta fi’na lakas we! Kaa lalit o felnax um paam o Yaal oxe, paam o Tedu xe Isra’el. 30 Ten taxu o Yaal oxe kaa tee: «Mbes ke ten xan a yen no paayo ke ten, xiixire we ten fop a saŋkel a koom. 31 Xam damir fa wo, o pelnooxu xe refoona, yaam bes of a fadiida, waxtu fee o gadooxkaa a pi of a gar. Mi o Yaal oxe na refkaa boo faw Hupna fop layun. 32 O pelnooxu xe xan a tolof, a yen, too o leng inatinkiran. Xam heƥand fiɗel no teeru ke ten, ta raaɓ ke widuuna fop.» 33 Keeke o Yaal oxe Hupna fop a layu: «Ii-isra’el we fo Yuuyudaa we a ñagadilandoore. Fop we ƥis’ina a den gilaa saax took o hup doole a maada o ndamaa a den, a mbañ o nqaƴ a den. 34 Kaa koy, mi o baawat den, jegaam katil, mi fee gon es a refna o Yaal oxe Hupna fop. Xam farit a den, ndax um ci saax le o yaadax, soo jaaxland we ngenna Babilon.» Ke o Yaal oxe a yuuɓanna a Babilon 35 O Yaal oxe kaa tee: «Fat laƥ ne a dal took no Kaakalde we, took no we ngenna Babilon fo kelfa ke ten fo yaal-o-and we ten. 36 Fat laƥ ne a dal took duleer maamaaɓ we, da ndefat yoqit. Fat laƥ ne a dal took a salma-koor ake ten, cer den a leeƈoox. 37 Fat laƥ ne a dal took pis ke ten fo a sareet-xire ke ten, took no xos no wiin wuu ndefna a ndeer um, da nand fo rew. Fat laƥ ne a dal took kalal ke ten, da njaɓel. 38 Fat o feñ a yen took poofi ke ten, da ŋiis, yaam saax nitaal roog cakalaaru a refu, da sayaa no pooƴ keene. 39 Ten taxu paafal ke fo xa ƥox-a-koƥ axe xan a korolooxaa teen, soo a ba ake a ngenin. O mbindeef o leng genkatee teen, jegkatee wiin na xa taan boo na xa tanaraat. 40 Ne ta refit’ina na Sodoom fa Gomoor fo teeru ke mbid’ina a den, Roog a gef’ina tuƈ, o leng genkatee kam Babilon. O mbindeef o leng dalkatee teen. O Yaal oxe layun. 41 Xeet fey a inoortiidaa no ɓemb-roog o janoon, saax maak fo maad mayu a ƭistiidaa no cat adna. 42 Kaa pokoox a qali fo a salma, a ƈaxooxaa soo a ñak yirmande. Fangax le den kaa dititaa nen no maag ole. Kaa ŋaay pis, a nqodan a ñoq ale, a ndef leng, too wo a inooxanu, wo Babilon. 43 O maad oxe Babilon oxaa daawaa o nan oleene rek, xa ƥay um owaa leeƈooxaa, naqad a damin, ta ɗomeel nen o tew oxaa na gaajooxaa. 44 Ga’angi, nen njogoy naa na sutoortiidaa no joc ole Yordaan, a jagin na xa suufand xa quƥu sap axaa, neene ndeer ñaf fo ƭeet xam rax Kaakalde we no saax le, dalin teen oxe um jilkaa. Ndi an nandu fa mi? An saɗu xeloor fa mi? O aa-adax oxum na xoxkaa mbaambir es?» 45 Ten taxu, nan-gilooxyo ke o Yaal oxe a yuuɓanna a Babilon, ƭaap ke ta fofanna saax le no Kaakalde we. A woora yee xan a ƭooqel nen cegel boo no we moƴna o neew, xa suufand axe den a mbiitnel mbaambir den. 46 Fangax le na caɓ ale Babilon xan a tax lanq ke a yo’noox, xa buuq a nannoox a ndeer qeet ke. |
Copyright © 2015-2023 by Eglise luthérienne du Sénégal
Eglise luthérienne du Sénégal