Yeremi 5 - NQAARIIT NE ROOG

Jegee o cofu leng kam Yeerusaleem

¹ O Yaal oxe kaa tee: «Mbidyo ped ke Yeerusaleem, ƭeet a paax, ngoroox, mbaaƭ no paayo ke ten. Nu nga’angaa teen o leng kut oxaa na fi’aa cofu, a jeemaa o gore, xam waasan a Yeerusaleem.»

² A ndaaɓooxangaa yee: «Mexe gaañtan o Yaal oxe na ñoowaa!» a taaƥax den xa maaƥ xa ƥor oo.

³ O Yaal oxe, ndax refee yee a kid of ngor rek a mbaaƭaa? Xawaa a den, ndaa ɗaxee a den dara. Saŋkaa a den, ndaa kaa mbañ a maƭax ale. Kaa njikooxaa o saƭik xoox, a mbañ o nomtooxiid me wo.

⁴ Maaga, layaam ee: «Wiin heesu soom a ndefu, a mbi’aa ƥooɓodaxir, yaam andee a ƭat ale no Yaal oxe, ke Roog den a simitna.

⁵ Xam xot boog farna fo wiin maak we, lay fa den, yaam den o mat a anda a ƭat no Yaal oxe, ke Roog den a simitna.» Kaa koy, den itam, a ƥola kadoor ke, a ƭeg a cengir ake.

⁶ Ten taxu xan njogoy a suqtoor no suungaan le, a song a den, a teeteem ale no tan ole a fand a den, o ƴaxal ole a ɓeedaa paam teeru ke den soo a listaa fop we na sutooraa teen, yaam siiknoor ke den kaa moƴaa moƴ o may, too ngore’aƭar den o leng andee ne ta fodna.

⁷ O Yaal oxe kaa tee: «Wo Yeerusaleem, xar na taxkaa um waasanong? Xa ƥeef a mbaasaxam pelek soo a ndaaɓoortaa roog tefee ndigil ke. Ci’’aam a den fop ke da soxla’na, ndaa yaqanee da seeqaa, a kitkitnaa me na caga le.

⁸ Kaa ndef naar-koor kiñu kaa ngalde’na, oxuu refna a ŋexelanaa o tew no kend um.

⁹ Ndax xawkiim wiin weene soo rabdinoox took xeet fa nandu neene? Mi o Yaal oxe layun.

¹⁰ Ŋaayyo saŋe ke ten, yaq a ƭing taxar biiñ ale mi, ndaa ba nu ngefin tuƈ. Mbaridyo xa par axe ten, jegeeruuma, mi o Yaal oxe.

¹¹ Yaam mbind Isra’el fo mbind Yudaa a ngodaxam tigi.» O Yaal oxe layun.

Ke o waas o Yaal oxe a rimaa

¹² Xeet fee no Yaal oxe a nqaña o Yaal oxe, a ndamtin ee: «Roog jegee! Taamaala dalkee a in, too i nga’kee xire mbaat biim.

¹³ Duleer we ten nqeñ doŋ a ndefu, Roog layee fa den. Yaasam ke da yegnitaa a sagoox took den!»

¹⁴ Ten taxu keeke o Yaal oxe Roog fee Hupna fop a layu: «Feek keene nu layaa, fa lay es fee um ɓekaa no don of, wo Yeremi, xan a refat fiɗel, soo xeet fene a ndef xa cuuƭ axaa fiɗel leene a raaɓkaa.

¹⁵ Nuun xeet fee Isra’el, xam ɓisiid took nuun xeet faa inoortiidna koƭu. Xeet faa waagaandeena tig oo, a reeƭu yaa fa yaaga, too nu nanee lak den, nu andee ke da layaa. Mi o Yaal oxe layun.

¹⁶ A tungaar ake den kaa nandtaa a mboy a betooxu, too den fop a salma-koor a ndefu.

¹⁷ Xan a ñaam saxade le nuun fo ñaamel nuun, a saŋik xa ƥiy xa koor axe nuun fo xa ƥiy xa tew axe nuun, a salax xa siir nuun fo a ked nuun, a mbiitin a ƭing taxar biiñ ake nuun fo tun ke nuun. Xan laƥ den a ndaadin teeru cegu saŋe ke nuun, nu ngoolooxna.

¹⁸ Kaa koy, na pe akaaga sax, saŋikkiim a nuun fop. Mi o Yaal oxe layun.

¹⁹ Yaa o laamitkeel ee: ‹Ndi xar taxu o Yaal oxe Roog in a doon a in kene fop?› wo Yeremi, fat o doon a den ee: ‹Ne nu mbaastaxama soo mbaɗooxaa roog can kam saax nuun, neene nu ndagooritkaa genar no saax laa refeerna le nuun.› »

Sañ-sañ fee Roog jaɓaand

²⁰ O Yaal oxe kaa tee: «Yeginyo mbind Yakoob kene, lambin kam Yudaa, lay ee:

²¹ Nan-gilooxyo kene, nuun xeet fa ƥodaxu too a ñak-yiif. Nu njega a kid, ndaa nu mbaagee a ka, njeg nof, ndaa nu mbaagee o nan.

²² Ndax kaa nu saɗarkiraam? Mi o Yaal oxe layun. Ndax nu sendkee mbaambir es? Mi fiisanu o maag ole me ta warna o day, o hakand olaa ta jolkeerna boo muk! A yag-ee-yag ake ten kaa njiqtooxaa, ndaa mbaagiran o ƈaktoox, a ndititaa, ndaa mbaagiran o njol.

²³ Kaa koy, xeet fene kaa naɗoox too a ƥoow. Kaa mbesaam a cinj soo a nduux a koƥ.

²⁴ Layee taa kam den ee: ‹Fat i saɗar o Yaal oxe Roog in, ten oxe na ci’taa a teƥ na waxtu um, ta ref na sarandam fo no seek o deɓ, soo a kesan a in a pe ake na saxad ale.›

²⁵ Tooñ ke nuun o mat nootu keene fop, pakaad ke nuun a nqañ a nuun paax keene.

²⁶ A jega kam xeet es wiin soxodu. Kaa nandtaa foofog waa ngooknooxna a ƥeng. Kaa ƭaap pog, ndax da ndam wiin we.

²⁷ Pind ke den kaa may muut fo kaa hatna no laɓari, nen kees naa mayna muut fo tiiƭ. Ten taxu da njegat doole fa halal,

²⁸ a magin, a naag naluƈ. Kaa ngupal na pi a paaxeer. Naangee o ƥoxottaa ɓur, ɓur le no waan ole, too kaa texeyaa. A ƭat den yongee na wargal no ndool onqe.

²⁹ Ndax xawkiim wiin weene soo rabdinoox took xeet fa nandu neene? Mi o Yaal oxe layun.

³⁰ Tig saɗarnooxu too a sednoox a mbi’e kam saax lene.

³¹ Duleer we kaa yegnitaa xa maaƥ xa ƥor, saasadax we a ƈufanaa ke faaxna na den soom, soo xeet es a yoon no keene. Ndi xar nu mbi’kaa, yaa keene a faafkaa?»