Yeremi 49 - NQAARIIT NE ROOG

Aa-amon we

¹ Ke yegniteena no Aa-amon we. Keeke o Yaal oxe a layu: «Ndax kaa Isra’el jegee xa ƥiy xa koor, ndax jegee jeg o lam? Xar taxu Milkom a lam o fiisel ole Gaad soo xeet um a ngen teeru ke ten?»

² Ten taxu o Yaal oxe a lay ee: «Ñaal key a ngaraa, kaa um nannoorkaa o wuuq xire took Raba, teeru fa maak fee no Aa-amon we. Xan a refat juum kefatin, fiɗel a raaɓ teeru ke ta waxooxna. Maaga, Isra’el xan a jaɓatin ke ta jeg’ina. Mi o Yaal oxe layun.

³ Wo Hesebon, ɗomatooxi, yaam teeru fee Ay a tase! Nuun mboƥ ndoog ne Raba, mbuuqyo, nderoox xa saaku, iinaa, njoqooyooxaa, lernooxaa tabax ke, yaam Milkom xan a ɓisel gilaa saax took o hup doole, ten fo saasadax um fo gelwaar um.

⁴ Wo Raba, o ndoog o nanaƭaru nqe, xar taxu o xaaƴooraa a yulanq ake wo, ke da neqna fop oo. Kaa o hooloox kalal ke wo, damtin ee: ‹An saɗaxam o songiid?› »

⁵ O Yaal oxe na refkaa boo faw Hupna fop kaa tee: «Ga’angi, xam hebliid took of diid, ta inoortiid me widoonga fop. Xan nu ndaxel, oxuu refna a sag mbaambir um, too jegkee o leng oxaa fokatna ƴuuƴuf we.

⁶ Kaa koy, cinj kaaga, xam nomtiid Aa-amon we ƥiseena gilaa saax took o hup doole.» O Yaal oxe layun.

Edoom

⁷ Ke yegniteena na Edoom. Keeke o Yaal oxe Hupna fop a layu: «Ndax kaa o and jegatee kam Temaan? Ndax kaa xa as axe a ñuf no yaal-o-and we ten, ndax o and den kaa nuk?

⁸ Nuun we ngenna Dedaan, ƈufyo, nquruloox, laqoox kam ee kam luf ke! Yaam mexe ɓisiidaa o njakad took xa taan axe Esawu, waxtu fee da ngadooxkaa a pi den a fada.

⁹ Boo niinir a ngarna me nuun, nqaƴkee kisaatooxel leng. Boo guuɗ a ngarna no yeng ole, xan a yaq boo a ndeyƭoox.

¹⁰ Yaam mi, xam huyit xa taan axe Esawu, weejil xa lunq axe den. Mbaagkatee o ƭas. A qaw ale Esawu xan a mooc. Jegkatee o pog mbaat o kentand oxaa na laykaa yee:

¹¹ ‹Nqaƴanaamoo xa baan axe nuun, mi na ñoowinkaa a den, too fat ñaaw we nuun a ngoolooxaam.› »

¹² Keeke o Yaal oxe a layu: «Nga’angyo, we mbar’eerna o yer no feeƭ ole yipna fuux le mi, xan a yer teen, soo wo Edoom o mat o bug o ref teen jaambuur! Ha’aa, refkiro teen jaambuur kañ, waraa o yer teen.

¹³ Mi o Yaal oxe mexe daaɓoortan a xoox es ee Bosra, teeru fa maak fee wo, xan a wootat, a niwaƭarel, a fes a pec, a saloorteel. Teeru ke ta waxooxna fop itam, xan a mbes a pec boo faw.»

¹⁴ Daawaam o nan olaa inoortiidna no Yaal oxe, o kiin a lule a ndeer qeet ke yee: «Mbokatooryo, ngar took Edoom! Inooxanyo a ñoq ale!»

¹⁵ Keeke o Yaal oxe a layu a Edoom: «Ga’angi, neewandaaxoong a ndeer qeet ke, fi o sibel a ndeer no wiin we.

¹⁶ Diid le o oraa fo a magnandax ale wo kaa mo’andang, wo fee genna kam luf ke na ƥil ake, fod no jul ole na ñaang ake. O sip’angaa ndaang of took-ee-took sax nen a canjiik, xam maaftiidong maaga. Mi o Yaal oxe layun.

¹⁷ Edoom xan a wootat, fop we na ndeefkaa paam um xan a njaaxiɗ, a mbuuƴanaa yaq fee daluuna.

¹⁸ Nen a Sodoom fa Gomoor fo teeru ke mbidna a den ngef’eena tuƈ, o leng genkatee teen, o mbindeef o leng dalkatee teen. Mi o Yaal oxe layun.

¹⁹ Ga’angi, nen njogoy naa na sutoortiidaa no joc ole Yordaan, a jagin na xa suufand xa quƥu sap axaa, neene, ndeer ñaf fo ƭeet, xam rax Ee-edoom we no saax le den, dalin teen oxe um jilkaa. Ndi an nandu fa mi? An saɗu xeloor fa mi? O aa-adax oxum na xoxkaa mbaambir es?»

²⁰ Ten taxu nan-gilooxyo ke o Yaal oxe a yuuɓanna a Edoom, ƭaap ke ta fofanna we ngenna Temaan: A woora yee xan a ƭooqel nen cegel, boo no we moƴna o neew, xa suufand axe den a mbiitnel mbaambir den.

²¹ Fangax le no njom ne den xan a tax lanq ke a yo’noox, xa buuq den a nannoox boo na Kal alaa no xeet laa.

²² O pañ oxe xey a ŋaayaa, a yetaa nen a canjiik, a letin a nafir um took Bosra. A koom, xeeñ le na salma-koor ake Edoom xan a nand fo le no tew oxaa na gaajooxaa.

Damaas

²³ Ke yegniteena na Damaas: «Hamat fa Arpad a seda ɓot, yaam a yega o nan o faaxeer. Kaa sendaa yaam a njaq, nen o maag o jumbu laa waageerna o riim.

²⁴ Njambaar ne Damaas a ɓuta, a yaj ake ten a mbes ndiiñ, ndax da ngod o joor, a sendaa ne mbodeena fop. Naqad fo xa ƭomel a ndala a den nen o tew oxaa na gaajooxaa.

²⁵ Nam a waasitkaande pelek, teeru fa njegu o ndam, teeru fee refna o ɗaay es?

²⁶ Neene, mbes ke ten xan a yen no paayo ke ten, xiixire we ten fop a saŋkel a koom. Mi o Yaal oxe Hupna fop layun.

²⁷ Xam heƥand saŋe ke Damaas, raaɓ pind no maad ke Ben-Hadad.»

A carind ake Arabi

²⁸ Ke yegniteena no Aa-arabi we Kedaar fo maat ke Hasoor Nebukadnesaar fee o maad oxe Babilon a xaw’ina. Keeke o Yaal oxe a layu: «Inooxyo songik a Kedaar, saŋik we ngenna no batand.

²⁹ Fat ƭiif ke den fo cegel ke den, coor ke den fo tikoorik ke den fop a njaɓel! Fat keeleemb ke den a ƥisel, soo da mbalalooxeel ee: ‹Diid le xey muu refna!›

³⁰ Nuun we ngenna Hasoor, ƈufyo, ngod o joor, laqoox kam ee kam luf ke! Mi o Yaal oxe layun. Nebukadnesaar fee o maad oxe Babilon a yuuɓana a nuun, a ɗaapan a nuun.

³¹ Inooxyo songik xeet fee yaadooxna, a mboog ee no woor a ndefu! Mi o Yaal oxe layun. Njegee begax, a kinglir ne’aand, a ñoowaa no woot.

³² Keeleemb den xan a ngindrel, xa siir xa mayaan axe den a lasrel. Xam feesit a den qeñ ke fop, den we na nduusaa took fee na xa ƭek axe den. Xam ɓisiid taamaala took den, ta inoor o saax oo saax. Mi o Yaal oxe layun.

³³ Hasoor xan a refat ngenand xa ƥox-a-koƥ, a fes a pec boo cay. O leng genkatee teen, o mbindeef o leng dalkatee teen.»

Elam

³⁴ Keeke refu fa lay fee o Yaal oxe a daawinna o tuleer Yeremi, ta jagin no Ee-elam we, no mberaandoong ne no maat Sedekiya fee o maad Yudaa.

³⁵ Keeke o Yaal oxe Hupna fop a layu: «Xam ɓol calit a qali le Elam, xoox le na doole fee ten.

³⁶ Xam ɓisiid took Elam qeñ nahik, da ngatiid no cat nahik ke na asamaan. Xam feesit a den qeñ keene fop. Jegkee xeet fa leng faa ga’keerna we ƈufitna Elam a ndokiidaa me ten.

³⁷ Xam sendnoor Ee-elam we mbaambir fañ den fo mbaambir no we mbugna njang o ñis den. Xam ɓisiid took den taamaala, fuux ɗomu le mi. Mi o Yaal oxe layun. Xam hebil laƥ ne ta daab a den, boo yaa saŋkuuma a den.

³⁸ Xam sip uum-maamaad es kam Elam, moocand teen o maad oxe fo kelfa ke. Mi o Yaal oxe layun.

³⁹ Kaa koy, no camaane ke na ngaraa, xam nomtiid we Elam ƥiseena gilaa saax took o hup doole.» O Yaal oxe layun.