Yeremi 48 - NQAARIIT NE ROOG

Mowaab

¹ Ke yegniteena na Mowaab. Keeke o Yaal oxe Roog fee Isra’el Hupna fop a layu: «Sabab took Nebo, yaam a gefe! Kiryatayim a seda ɓot, a jaɓel. Teeru fa njegu saŋe ne took o joong ole a seda, a diid ƭomu.

² Mowaab simatataand, a fexeyanteel taamaala kam Hesebon ee: ‹Acayo i ndet moocandin a ndeer qeet ke.› Wo Madmen itam, xan o naag yereŋ, laƥ ne xey a yelang.

³ O wuuq a nannoorta Horonayim, yaq fo boom na xewaa maaga.

⁴ Mowaab a gefe tuƈ! O wuuq no mboƥ ne ten a nannooxa koƭu.

⁵ We yoqna we ŋaayaa na teeru faa Luhit, a loolaa, soo na pudnand ale Horonayim fañ we a nanaa xa paɗax:

⁶ ‹Ƈufyo, mucil o ñis nuun, nand fo o faam-a-koƥ kam a koƥ-a-ƥor!›

⁷ Wo Mowaab, feek kaa o hooloox a pi of fa halal of, wo itam, xan o naagel nuus. Kemos fee roog of xan a ɓisel gilaa saax took o hup doole, ten fo saasadax um fo gelwaar um.

⁸ O ƥañ oxe xan a yaqiid teeru ke fop, too fa leng daɗkee. A yulanq ale xan a sooƴ, o saawit ole a yaqel. Keene o Yaal oxe a layu.

⁹ Njagandanafulyo a Mowaab a mboy, yaam a woora yee xan a gefel. Teeru ke ten xan a mbootat, jegkatee waa ngenna a den.»

¹⁰ Yaasam oxe na yapatilaa calel ke o Yaal oxe a doxnuuna a salooxel! Yaasam oxe na xañtaa laƥ ne ten a siid fo fo’oy a salooxel!

¹¹ O Yaal oxe kaa tee: «Mowaab kaa ñoowoogu na jam no kaa xotitna no ndeƥandoong um, mosaand o ɓis gilaa saax took o hup doole. Kaa yaadoox’u nen biiñ faa wendna boo a diƈoox no nqiim um. Mosaand o yiƥadoox ndeer o ƥaxañ fo o gend um, a maada fo a safaan um, too a qeeñaan um suptooxee.

¹² Kaa koy, ñaal key a ngaraa kaa um luliidkaa me Mowaab waa na yiƥadooxkan. Mi o Yaal oxe layun. Xan da caar xa ƥaxañ axe ta yipeena, a nduguñ xa calag axe ten.

¹³ Maaga, Mowaab xan a sed na Kemos fee roog um ne Isra’el a sedit’ina na Betel fee da ngooloox’ina.

¹⁴ Nam nu mbaagu o layit ee: ‹A salma-koor i ndefu fo xir say tigi?›

¹⁵ Mowaab a yaqe pic, teeru ke ten a songel, ñaƭiŋka ke ten a ƥakandel no warand olaa.» Mi o Maad oxe, gon es a refna o Yaal oxe Hupna fop layun.

¹⁶ Ndiik o njakad onqe Mowaab a fadiid, taamaala um oxe garaa no ñofu.

¹⁷ Njaapeenoo, nuun qeet ke mbiduuna fop, nuun fop we anduuna! Layyo yee: «Ndi nam o samb o jegu doole lene a duguñte, o loq o mosaan oleeke?»

¹⁸ Nuun we ngenna Diibon, mbudoorityo no ndam onqe, moof no lanq beeru ke, yaam fañ we Mowaab owe songiidaa a nuun, a yaq saŋe ke nuun fop.

¹⁹ Nuun we ngenna Aroweer, ngeenooxyo na ƭat ale, ƥeng. Laamityo we na ƈufaa fo we ƥostooxna ke xewna.

²⁰ Mowaab a seda ɓot, yaam a maafe. Iinyo soo mbuuq! Yegnityo took o xuluɓ ole Arnon ee: «Mowaab a bayte!»

²¹ Hate fee a yena took saax le na xa saawit axe, took Holon, Yahas fa Mefaat,

²² took Diibon, Nebo fa Bet-Diblatayim,

²³ took Kiryatayim, Bet-Gamul fa Bet-Me’on,

²⁴ took Keriyot, Bosra fo teeru lakas ke no saax le Mowaab fop, koƭu ke fo matu ke.

²⁵ Doole fee Mowaab a fagɗe tak, a naax um a feñexel.» O Yaal oxe layun.

²⁶ Mbayinyo a Mowaab, yaam a niwooxa paam o Yaal oxe! Fat a firkiloox kam basil um, a refat ten itam calat no fop.

²⁷ Wo Mowaab, ndax Isra’el reeƭee calat of? Ndax kaa mosel o soƥ a ndeer no guuɗ we, boo a tax a mbanuu o ne’an o wulaa xoox?

²⁸ Nuun we ngenna Mowaab, sutooxyo teeru ke, ndalik no luf ke na ƥil ake! Laalyo a nuukuur ake na ndaangaa na xa ƥeqees axe no waaƥ ole!

²⁹ I nana a magnandax ale Mowaab, a magnandax alaa o leng a andeerna ne fodna, o felnax um, o nga’atinax um, a niwax um fo o yeg xoox um.

³⁰ O Yaal oxe a laya yee: «Andaam a paax giñ le ten. Ke ta laasooraa naagiran o fi’aa.»

³¹ Ten taxu mexe ɗomatooxaa took Mowaab, faɗooxanan ne ta fodeena fop, iinanaa we Kiir-Heres.

³² Wo a ƭing taxar biiñ ale Sibma, mexe loolang kupu ke we Yaseer a loolang. A naaq ake wo a njol’a o maag ole, a nqay boo Yaseer. O pañ oxe a yena took saxade le wo fo na ƥoor ale na xa biiñ axe wo, a jang a den.

³³ O ɗaay fo o mbelakinax a ñufa na ƭing ake fo no saax le Mowaab. Jegatee biiñ na xa nirir axe, duuduut we nduutatee xa biiñ axe. Xa ƈeel axe den a ndiima.

³⁴ Xa buuq axe no we Hesebon a njiba boo Eleyale. O ñuxur den a nannooxa boo Yahas, a xotit Sowaar boo Horonayim, boo Eglat-Selisiya. Poofi ke Nimrim sax a ŋiisa.

³⁵ O Yaal oxe kaa tee: «Xam moocand kam Mowaab we na ñaaƴaa took a ñaang a sadaxand ake, ndax da ƥoxot a roog den sadax toxel kaa yoonandteena cuuraay.

³⁶ Ten taxu kam es a fangooxaa na Mowaab nen a liit, kam es kaa fangooxaa no wiin we Kiir-Heres nen a liit. Fop ke da mbokatanoox’ina a ñake.

³⁷ A qoox ake fop a nduuse, xa taatam axe fop a mboyel, xa ƥay axe fop a ñaasel, soo tet ke fop a ñirel xa saaku.

³⁸ Na xa tung-took axe Mowaab fo no paayo ke ten ƭomatax soom na naneel, yaam duguñaam a Mowaab nen mbokin naa soxla’ataandeena. O Yaal oxe layun.

³⁹ Nga’yo rek ne ta maafteena! Ƭomatooxyo! Ndaw gaci na Mowaab yaam ne ta fesna ndiiñ! A refata calat fo o ndiidlataand no we mbiduuna fop.»

⁴⁰ Keeke o Yaal oxe a layu: «O pañ oxe xey a yetaa nen a canjiik, a letin a nafir um took Mowaab.

⁴¹ Keriyot a jaɓe, saŋe ke a luƈtel. A koom, xeeñ le na salma-koor ake Mowaab xan a nand fo le no tew oxaa na gaajooxaa.

⁴² Mowaab a gefe, refkatee xeet, yaam a niwooxa paam o Yaal oxe.

⁴³ Diid le fo gamb le fo mbaal ne owey ƥeedang, wo xe genna Mowaab. Mi o Yaal oxe layun.

⁴⁴ Oxe na ƴufaa diid le xan a yen no gamb le, too oxe na sutooraa no gamb le xan a damtel mbaal ne, yaam o hiid ole um xawkaa a Mowaab oxey a garaa. Mi o Yaal oxe layun.

⁴⁵ Ƴuuƴuf we njegateerna o njembe a ngeenooxa no yook ne Hesebon. Kaa koy, fiɗel a biltoora Hesebon, aal a feeñit no mbind no maad ne Siihon. A raaɓa xa lak axe Mowaab fo ƭuf no wiin balu-balu we.

⁴⁶ Ndaw naqad took of, wo Mowaab! Xeet fee Kemos a saŋkooxa. Xa ƥiy xa koor axe wo fo xa tew axe a ƥise gilaa saax took o hup doole.

⁴⁷ Kaa koy, no camaane palakaand ke, xam nomtiid we Mowaab ƥiseena gilaa saax took o hup doole. Mi o Yaal oxe a layun.» Mene ke yegniteena na hate fee Mowaab a fagtu.