Yeremi 47 - NQAARIIT NE ROOG

Ke layeena no Fiifilista we

¹ Keeke refu fa lay fee o Yaal oxe a daawinna o tuleer Yeremi, ta jagin no Fiifilista we, yaaga Firawon fee xawafulee a Gaasa.

² O Yaal oxe kaa tee: «Poofi key a maynitiidaa no ɓemb-roog o janoon, a ndefat a ƈufnand alaa balna, a mbi o jaɓ no saax le fo ke refna teen fop, teeru ke fo we ngenna teen. Wiin we we mbuuqaa, we ngenna no saax le fop a iinaa.

³ Ɗuuɗ le na xa poxos axe no pis ke ten fo fangax le na saang ake na sareet-xire ke owe naneel. Paap ke talatee xa ƥiy den, yaam xa ƥay den kaa leeƈoox.

⁴ Ñaal ne Fiifilista we fop a saŋikkeel a fadiida. Yoqkatee o leng oxaa dimle’na a Tiir fa Sidoŋ, yaam o Yaal oxe xe gefaa Fiifilista we, yoqatin weene no fimb le Kaftoor.

⁵ We Gaasa a nduusooxa a ƥula, a ndef no ñaawax, Askalon a naag yereŋ. Nuun yoqatin we na yulanq ale den, kaa nu mbugko ñaasooxaa boo a mban, ndax nu lalit naqad nuun?

⁶ Kaa nu layaa yee: ‹Cey, laƥ ne no Yaal oxe, ndi a mban o ñootnooxkaa? Nomtooxi no xool of, dam njaambuur of soo naag tek!›

⁷ Kaa koy, nam a ñootnoorkaa, too o Yaal oxe a heblin? Laƥ ne a wara o sag Askalon fo na ƥeeraamb ale no maag ole.»