Yeremi 46 - NQAARIIT NE ROOG

¹ Keeke refu fa lay fee o Yaal oxe daawinna o tuleer Yeremi, ta jagin no qeet can ke.

Njom ne no Miimisira we kam Karkemis

² Ke layeena na Misira fo no xiixire we Neko fee Firawon fee, o maad Misira, ye Nebukadnesaar fee o maad oxe Babilon a xawtuuna Karkemis, no xuluɓ olaa Ofrat, a jopir o hiid o nahkandeer olaa no maat Yoyakim fee o ƥiy Yosiya, too a ref o maad Yudaa:

³ «Nuun Miimisira we, ndeepatirandyo pegoor neewu fo maak, ƥeran a ñoq ale!

⁴ Nguminyo pis ke, ŋaayyo, nuun ŋaaŋaay pis we! Ngeenooxyo fo xa maxanda xire, lak a salma ke, ndokoox toki celem ke!

⁵ Ndi xar um ga’aa? Owe ndiida boo a sendaa, a ndakooxaa o jiijiŋ. A Salma-koor ake den a nduguñe, a ngod o joor, too nomtooxiidatee, diid le xey muu refna. Mi o Yaal oxe a layun.

⁶ Oxe moƴna fel o faaɗ sax deyee god o joor, too oxe moƴna jambaar daɗkee! No ɓemb-roog o janoon, na ƥeeraamb alaa no xuluɓ olaa Ofrat, owey tolofaa, a yenaa.

⁷ Xar refu ke na maynaa nen o xuluɓ ole Niil, fee poofi ke a mbalaa nen xa quluɓ axe?

⁸ Misira o mat na maynaa nen o xuluɓ ole Niil, fee poofi ke a mbalaa nen xa quluɓ axe. Kaa layaa yee: ‹Xam mayin, muur lanq ke, sooƴin teeru ke fo we ngenna teen.›

⁹ Pis ke, ƭuuɗyo, a sareet-xire ke, mbi’yo ƥooy! Fat a salma-koor ake a sutoox, ake Kuus fo ake Puut na saqaa pegoor fo ake Luud na saqaa, a nqaƴaa a qali!

¹⁰ Ñaal neeke, bes no Yaal oxe na refkaa boo faw Hupna fop oo, faa ta rabdinooxkaa took no Miimisira we. Laƥ ne ten oxe fandaa boo a deyƭoox, a yeraa na fo’oy no fañ we. Sadax no Yaal oxe na refkaa boo faw Hupna fop oo, no saax le no ɓemb-roog o janoon, farna fo xuluɓ ole Ofrat.

¹¹ Ŋaayi boo Galaad, waaƭ teex ƭuumooxel, wo Misira, o ndoog o toroxu nqe. Kaa koy, jaree o mayƭandaa teex, ngaañax ne wo wodkee.

¹² Qeet ke a yega gaci of, too xa buuq axe wo a nannooxa muu refna. O qiixire a kamasa o kend um, da yenandoor den ɗik fop.»

Misira a songe

¹³ Keeke refu fa lay fee no Yaal oxe o tuleer Yeremi a yegnitna, ye Nebukadnesaar fee o maad oxe Babilon a fadiidna, ndax ta song a Misira:

¹⁴ «Yegniteenoo Misira, nannooreenoo Migdol, nannooreenoo Memfiis fa Tapanes! Layyo yee: ‹Ngeenooxyo, njagandoox!› Yaam laƥ ne a raadna gentand nuun boo a ƴut.

¹⁵ Xar taxu nqoox ne fi’oona roog of a luƈtel? Waagee o xox, yaam o Yaal oxe maafun.

¹⁶ O Yaal oxe a tolofnoora jaaku, o koor oo koor a yen took no kend um. A layra yee: ‹Fat i inoox, nomtoox na xeet in, no saax laa i ndimeena, ngoƭ laƥ mbaawar ne.›

¹⁷ A mbalalooxa maaga yee: ‹Firawon fee o maad Misira, o laalay nqeñ oo, o wooƥ ole ta jeg’ina a daɗaan!›

¹⁸ Ne ta wooritna yee mexe ñoowaa, mi o Maad oxe, gon es a refna o Yaal oxe Hupna fop, kaam ee: o pañ oxe xan a gar, ne ta wooritna yee Taboor o joong oo, ne o joong ole Karmel a gartitna o maag ole took.

¹⁹ Nuun we ngenna Misira, mbofyo xa koroŋ nuun, xan nu ƥisel took o hup doole! Teeru fee Memfiis xan a wootat, a raaɓel, too o leng genkatee teen.

²⁰ Misira o fi o mosu tigi a refu, ndaa o baxal olaa inoortiidna no ɓemb-roog o janoon oxe ŋatan.

²¹ Xiixire saadlaand we ta waaƭanna a xoox um kaa nand nen xa qeel axaa ngudeena. Kaa koy, den itam a nqurulooxa, a ƈuf den fop. Mbaagee o nqox, yaam ñaal ne na saŋik ale a fada na den, waxtu fee da nqaweena.

²² Misira kaa ɓiicaa nen fangool faa na xuyaa, yaa fañ we a nqiiraniiduuna, a ƥonoox a ƥaax, a nandtaa waa na mbuuɓaa taxar.

²³ Owe ngodaa suungaan le ten, ke ta waagaandeena o rok fop oo. Den moƴu o may soƈ ke, mbaagaand o lim. Mi o Yaal oxe layun.

²⁴ Misira, o ndoog onqe, a seda ɓot, a ɓoxote na xa ƥay na xeet fee no ɓemb-roog o janoon.»

²⁵ O Yaal oxe Roog fee Isra’el Hupna fop kaa tee: «Mexey garaa, ndax um dal took Amon, roog fee Teeb, took Misira, took roog ke fo maad we ten, took Firawon fee fo we ngoolooxuuna fop.

²⁶ Xam ɓoxot a den na xa ƥay no we mbugna njang o ñis den, na xa ƥay Nebukadnesaar fee o maad oxe Babilon fo na xa ƥay na yaj um. Cinj kaaga, Misira xan a genatinel nen yaaga. Mi o Yaal oxe layun.»

Isra’el a mucle

²⁷ «Wo Yakoob fee o tag es, ba o saɗar, ba o foof, wo Isra’el fee xeet es, yaam mexey muclitang no lanq koƭu, muclit xa taan of no saax le da ƥiseena took o hup doole. Xan Yakoob a nomtooxiid, a ñoowaa na jam fo o yaadax, too o leng jom’andkatiran.

²⁸ Wo Yakoob fee o tag es, ba o saɗar, yaam mexey fa wo. Xam moocand qeet ke pasar’oonga fop, ndaa wo o mat, moocandkiroong. Xam xawtong o cofel, waagiroong o ɗeet nen a jaambuur. Mi o Yaal oxe layun.»