Yeremi 42 - NQAARIIT NE ROOG

Yoqatin we owe nga’raa fa Yeremi.

¹ Aa-adax we no xiixire we fop, moƴtaa sax Yohanan fee o ƥiy Kare’a fa Asariya fee o ƥiy Hosaya, fo wiin we ndeeƭna maaga fop, a xotit no xe moƴna o neew boo no xe moƴna o maak, a ngara

² me no tuleer Yeremi, a layin ee: «Ngela jaɓi ke i nqeɗang! Xeɗooxani a in, in yoqatin wene fop, o Yaal oxe Roog of, yaam kaa i may’u bo, ndaa o ndik o ndutuuñ i yoqatu, ne ga’tanoona.

³ Fat o Yaal oxe Roog of a lal a in me i mbarna o nqot fo ke i mbarna o mbi.»

⁴ O tuleer Yeremi a laya a den ee: «Nanaanum. Xam xeɗ o Yaal oxe Roog nuun, ne nu laamtituuna. Fa lay fuu o Yaal oxe a doonna a nuun, xam feednin a nuun, fañ o ɗasin teen dara.»

⁵ A ndoona a Yeremi yee: «Fat o Yaal oxe a ref na in o seede ndigil fo o kore’u, a soƥangaa yee i ndeefee fa lay fuu o Yaal oxe Roog of a simkang o daawnin a in.

⁶ Ta ref paax mbaat paaxeer, xan i nanan o ñuxur no Yaal oxe Roog in, me no xe i luloonga in fa qoox in. Neene, xan i sawar, yaam ne i nananna o ñuxur no Yaal oxe Roog in.»

⁷ A cinj ñaal xarɓaxay, fa lay fee no Yaal oxe a daawne a Yeremi.

⁸ Maaga, Yeremi a xoya a Yohanan fee o ƥiy Kare’a fo aa-adax we no xiixire we fop yoonna fo ten fo wiin we ndeeƭna maaga fop, a xotit no xe moƴna o neew boo no xe moƴna o maak.

⁹ A laya a den ee: «Kaa nu sim’aam um daawnan a nuun o Yaal oxe Roog fee Isra’el a qeƭ nuun. Keeke a doonu:

¹⁰ ‹Nu saxangaa tigi no saax lene, xam maxatin a nuun nu ndefat xeet too yaqkatiim a nuun, xam jimb a nuun too fuurkatiim a nuun. Maaga, xam ricoox paaxeer ke fi’uuma a nuun.

¹¹ Ba nu saɗarat o maad oxe Babilon, mi o Yaal oxe mexe dakooxan o lay a nuun ee ba nu saɗarin, yaam mexey fa nuun, ndax um mucil a nuun, wat a nuun no ɓay um.

¹² Xam yirim a nuun, fi boo ten oo xan a yirim a nuun, a nomtiid a nuun no saax nuun.›

¹³ Nu mbaaga ñak o nanan koy kebil no Yaal oxe Roog nuun, lay ee: ‹I ngenkee no saax lene,

¹⁴ ndaa kañ xan i ndet no saax laa Misira, maa i nga’itkateerna xire, i nankatee fangax a luuƥ, i ñakkee ñaamel. Maaga i mbugu o ngen!›

¹⁵ Maaga boog, nuun yoqatin we Yudaa, nan-gilooxyo fa lay fee no Yaal oxe. Keeke o Yaal oxe Roog fee Isra’el Hupna fop a layu: ‹Nu mbosooxangaa o ndet Misira, nu laqookangaa maaga,

¹⁶ xire fee nu saɗaraa xan a daawit a nuun maaga sax, biim le jaaxɗandna a nuun a reef a nuun boo Misira, soo nu nqonit maaga.

¹⁷ Fop we na mbosooxkaa o ndet Misira, ndax da laqook maaga, xan laƥ mbaat biim mbaat piste a saŋik a den. O leng na den muckee mbaat ta ɓostoox na taamaala fee um ɓisiidkaa took den.›

¹⁸ Yaam keeke o Yaal oxe Roog fee Isra’el Hupna fop a layu: ‹Ne fuux es fo o say es a njuumoorna took no we ngenna Yeerusaleem, neene a yenitkaa took nuun, nu ndetangaa Misira. Xan nu ndef saloor fo o njaq, qeefel fo cednooxu, too nu nga’katee saax lene muk.›

¹⁹ Nuun yoqatin we Yudaa, o Yaal oxe layu a nuun ee ba nu ndet Misira! Andeenoo a paax, mexe woornan a nuun xaye!

²⁰ A qoox nuun nu naxaa, ye nu lulaxama maa no Yaal oxe Roog nuun, lay ee: ‹Xeɗooxani a in o Yaal oxe Roog in, too fop ke o Yaal oxe Roog in a laykaa, feeñleen a in, too xan i mbi’in.›

²¹ Feeñlaanum a nuun xaye, ndaa nu nananee o ñuxur no Yaal oxe Roog in na dara no ke ta simaxama um lay a nuun.

²² Andeenoo a paax ndiiki: Xan laƥ mbaat biim mbaat piste a saŋkit a nuun me nu mbugna o ndet, ndax nu laqook maaga.»