Yeremi 35 - NQAARIIT NE ROOG

Yeremi fo Reerekab we

¹ Na jamaane Yoyakim fee o ƥiy Yosiya, too a ref o maad Yudaa, o Yaal oxe a daawna a Yeremi fa lay um na xa ƭelem axene:

² «Reti maa no Reerekab we, lay fa den soo ɓis a den na leng no tok ke no Mbind ne no Yaal oxe. Maaga, xan o yernoor a den biiñ.»

³ Neene, xotaam a Yaasaniya fee o ƥiy Yeremi, too a ref o ndaan Habasiniya, ten fo fog faap um ŋaƈit fo xa ƥiy xa koor um fop fo Reerekab lakas we fop.

⁴ Ɓisaam a den no Mbind ne no Yaal oxe, ɓek a den na ndok alaa daalbe we Hanan fee o ƥiy Yigdaliya, too a ref o kiin Roog, a mer’ina o mbokatooraa. A ndok aleene kaa reeƭu paam ale no kelfa ke soo a garit took ale Maseya fee o ƥiy Saalum, too a ref o saasadax oxaa saq’ina a yetax ale no ndokand ne no Mbind Roog ne.

⁵ Cinj kaaga, diƈaam mbaambir Reerekab we xa pal xa mayu muut fa biiñ fo xa tumb, lay a den ee: «Yeryo biiñ!»

⁶ Kaa koy, a ndoona yee: «I yerkee biiñ, yaam o taan in Yoonadab fee o ƥiy Rekab kaa hebil a in ee: ‹Nu yerkee biiñ muk, nuun mbaat xa taan nuun.

⁷ Nu maxkee pind, nu nduufkee ax leng, nu njimbkee taxar biiñ too nu njegkee dara no keene fop. Xan nu ngenaa kam ƭiif no ñoow o ñis nuun fop, ndax nu nquuɗ no saax le nu molkaa.›

⁸ Kaa i nananaa fop ke o taan in Yoonadab fee o ƥiy Rekab a hebilna a in. I naangee o yeraa biiñ, in oo rew in oo, xa ƥiy xa koor in fo xa tew in oo.

⁹ I naangee o maxaa pind, ndax i ngen teen, i njegee a ƭing taxar biiñ mbaat xa qol too i naangee o nduufaa.

¹⁰ Kam ƭiif i ngenaa, nananaa fop ke Yoonadab fee o taan in a hebilna a in.

¹¹ Kaa koy, ye Nebukadnesaar fee o maad oxe Babilon a songna saax le, i mbosooxa o ndet Yeerusaleem, ndax i ƈuf xiixire we no Kaakalde we fo we no Aa-araam we. Ten taxu, i ngenat Yeerusaleem.»

¹² Maaga, o Yaal oxe a daawna a Yeremi fa lay um na xa ƭelem axene:

¹³ «Keeke o Yaal oxe Roog fee Isra’el Hupna fop a layu: Reti o lay wiin we Yudaa fo we ngenna Yeerusaleem ee: Ndax kaa nu nan-gilooxkee fa lay es, njaɓ o maƭooxel? O Yaal oxe layun.

¹⁴ Yoonadab fee o ƥiy Rekab a xañta xa taan um da yer biiñ, too a ngayaan. Boo xaye sax yeree biiñ, yaam a nananaa ke o taan den a heblitna. Mi o mat, layaam fa nuun roog fuu feedna, ndaa nu nan-gilooxiraam.

¹⁵ Lultiidaam a nuun duleer we dag es fop, roog fuu feedna um luliid a den, ndax da lay a nuun ee: ‹Mbesyo a cinj a ƭat a paaxeer ale nuun, supit a pesoorooƭ nuun too ba nu ndeef roog lakas ke, ndax nu mbaɗoox a den.› Yaaga, xan nu ngen no saax le ci’uuma a nuun, nuun fo daan nuun. Kaa koy, nu ndungee nof nuun, nu nan-gilooxiraam.

¹⁶ Xa taan axe Yoonadab fee o ƥiy Rekab a mbadna kebil ne o taan den a cooxna a den, soo xeet fene o mat a mbañaam o nan-giloox.

¹⁷ Ten taxu, keeke layum, mi o Yaal oxe Roog fee Hupna fop, Roog fee Isra’el: Xam hebliid took xeet fee Yudaa fo took we ngenna Yeerusaleem fop taamaala fee regdinooxuuma a den fop, yaam kaam lay fa den, too nan-gilooxiraam, um xoy a den, da mbañaam o njaaɓ.»

¹⁸ Cinj kaaga, Yeremi a laya Reerekab we yee: «Keeke o Yaal oxe Roog fee Isra’el Hupna fop a layu: ‹Nu nan-gilooxa kebil ne Yoonadab fee o taan nuun, ngay fop ke ta hebilna, soo mbi fop ke ta simna a nuun.

¹⁹ Ten taxu, keeke layum, mi o Yaal oxe Roog fee Isra’el Hupna fop: Yoonadab fee o ƥiy Rekab ñakkatee muk xa taan axaa na ndagooxaxam.› »