Yeremi 34 - NQAARIIT NE ROOG

Ke yegneena a Sedekiya

¹ O Yaal oxe a daawna a Yeremi fa lay um na xa ƭelem axene ye Nebukadnesaar fee o maad oxe Babilon fo a yaj no xiixire um fop, maat ke no lanq ke fo qeet ke ta hame’na fop a nqire’aa fa Yeerusaleem fo teeru ke ta waxooxna fop:

² «Mi o Yaal oxe Roog fee Isra’el mexe heblang o ret lay a Sedekiya fee o maad Yudaa yee: Keeke o Yaal oxe a layu: Ga’angi, xam ɓoxot teeru fene na xa ƥay no maad oxe Babilon, too xan a doxin riw.

³ Wo o mat, ɓostooxkino, ndaa xan o naagel nuus, ɓoxotel na xa ƥay um, a kid of a njasnoor fo a kid no maad oxe Babilon, ta lay fa wo jaxrañ, soo o ret Babilon.

⁴ Kaa rek, wo Sedekiya fee o maad Yudaa, nan-gilooxi fa lay es, mi o Yaal oxe! Keeke layum na wo: Laƥ ñaamkirang.

⁵ Fa nqon of xan a ɓuuɓ, too ne daan of we ndefna maad we yaaga adooxoonga a ndoxanit’eena fo ndaxar qeeñe-xeeñe, neene o doxanitkeel a den, foygooxeel ee: ‹Ndaw sabab, o yaal in!› Mi o Yaal oxe woornong o ten!»

⁶ O tuleer Yeremi a daawna a Sedekiya fee o maad Yudaa fa lay feene fop kam Yeerusaleem.

⁷ Kaa jopir’u xiixire we no maad oxe Babilon a ñoxoraa fa Yeerusaleem fo teeru lakas cegu saŋe ke Yudaa maad’ina o nqoxaa, ndefna Lakiis fa Aseka doŋ.

Faɗ we mbateena soo a njaɓatinel

⁸ O Yaal oxe a daawna a Yeremi fa lay um, a cinj ye o maad Sedekiya a hiɓoorna fa xeet fee Yeerusaleem fop, ndax ta yegnit a bat ale no faɗ we.

⁹ Oxuu refna a war’a o xaƴ faɗ Hebre um, goor fo rew, da njeg a qoox den, too o leng a fañat o geek o Yuuyudaa pog um no mbaƭ.

¹⁰ Kelfa ke fop fa xeet fee fop mbog’ina no ngiɓoor ne a njaɓ’a o nqaƴ, oxuu refna faɗ um, goor fo rew, da njeg a qoox den, a mbañat o ngeek a den no mbaƭ. A njaɓ’aan soo a nqaƴ a den da njeg a qoox den.

¹¹ Kaa koy, cinj kaaga, a sutoox’a no ke da lay’ina. A njaɓatin’a faɗ goor fo rew we da nqaƴ’ina da njeg a qoox den, a ser a den da ndakooxatin no mbaƭ.

¹² Maaga, o Yaal oxe a daawna a Yeremi fa lay um na xa ƭelem axene:

¹³ «Keeke layum, mi o Yaal oxe Roog fee Isra’el: Dalnaam fo daan nuun ngiɓoor a koom alaa suttuuma a den no saax laa Misira, maa da ndeeƭna faɗ soo lay a den ee:

¹⁴ ‹No hiid ɓetuu ɗikandeer oluu refna, fat oxuu refna na nuun a xaƴ o pog um o Hebre xe jikoox’uuna a xoox um, a faɗooxan boo xa kiid ɓetaa fo leng. Fat a sutin mbind um, a xaƴin ta jeg a xoox um.› Kaa koy, daan nuun nan-gilooxiraam, ndungee nof den no ke layuuma a den.

¹⁵ Nuun o mat, kaa nu eet o supit a pesoorooƭ, mbi kaa xotna a ƭat na kid es, ye oxuu refna na nuun a yegnitna a bat ale no kend um. Nu ngiɓoora teen sax fa mi kam Mbind ne kesaneema.

¹⁶ Kaa koy, cinj kaaga nu sutooxa teen, maasand gon es. Oxuu refna na nuun a nomtiida faɗ um goor fo rew, nu nqaƴ’ina da njeg a qoox den. Nu sera a den da ndefatin faɗ nuun.

¹⁷ Ten taxu, mi o Yaal oxe um lay a nuun ee: Nu nan-gilooxiraam, ndax oxuu refna na nuun a yegnit a bat ale no pog um fo no kend um. Yaaga koy, mi o Yaal oxe, mexe yegnitaa yee xam waas xire fee, piste fee fo biim le, da yen took nuun, ndax maat ke na adna fee fop a ndiid, yaa da nga’kaa a nuun.

^18-19 Kelfa ke Yudaa fo ke Yeerusaleem, cawdiin ke, saasadax we fa xeet fee no saax le fop a ndalin’a fa mi ngiɓoor neene, a ƭeg o xeel a ndeer soo a ndeef ndeer xa ƭeg axe ten. Kaa koy, cinj kaaga, a ƭapa ngiɓoor ne too mbadnee ke dalneena teen.

²⁰ Ten taxu, xam ɓoxot a den na xa ƥay no fañ den, na xa ƥay no we mbugna njang o ñis den, too xa tal den xan a ndefik ñaamel a tud ake fo ƥaaɓaan ke no lanq ke.

²¹ Xam ɓoxot itam a Sedekiya fee o maad Yudaa fo kelfa ke ten na xa ƥay no fañ den, na xa ƥay no we mbugna njang o ñis den, na xa ƥay no xiixire we no maad oxe Babilon. Ke da ndiisooxna boo a ngoƭ a nuun fop oo,

²² mi o Yaal oxe, xam hebil a den da nomtooxaniid teeru fene, a songin, a njaɓin soo a ndoxin riw. Teeru ke Yudaa o mat, xam fi da ndefat a koƥ-a-ƥor maa o leng a genateerna.»