Yeremi 33 - NQAARIIT NE ROOG

A tegit a qas ake njaginna na Yeerusaleem

¹ Ye Yeremi a maadna o wegeel no maax ole no yeeyetax we, o Yaal oxe a daawnaan fa lay um jaf ɗikandeer ee:

² «Keeke o Yaal oxe a layu, ten oxe sakna lanq ke, a mool a den soo a sip a den, ten oxe gon um a refna o Yaal oxe:

³ Ƴufginooxaam, too xam jaaɓong, yegnong tig maak fo kaa ɗasna, andeeroona.

⁴ Yaam keeke layum, mi o Yaal oxe Roog fee Isra’el: Pind ke na teeru fene fo pind no maad ke Yudaa xan a yaqtel a uum lanq a songir fo laƥ.

⁵ We ngenna na teeru fee xan a ñoxorik fo Kaakalde we, ndaa ɗaxkee dara. Kefatin ke no pind ke xan a may muut fo xa tal no wiin. Kam fuux es fo kam o say es, xam xaw we ngenna Yeerusaleem. Xam xuun teeru fene yaam kañaan den.

⁶ Ga’angi, xam dakin a Yeerusaleem no wod-fo-ɓaal um, ci’in cer ƥutu um, kaam ee xam wodand we ngenna teen ceŋ. Xam feeñil a den jam fo o woor boo ta dey sik.

⁷ Xam nomtiid we ƥiseena gilaa saax took o hup doole na Yudaa fo we na Isra’el, dalnatin a den nen yaaga.

⁸ Xam ɓogid a den no tooñ ke den fop da mbakaaditna na mi, waasan a den tooñ ke den fop da mbakaaditna na mi, a siiknoorit a den fa mi.

⁹ Gon siwu le Yeerusaleem xan a ref na mi o ɗaay, a ci’aam a simat fo o niwel a ndeer qeet ke no lanq ke fop na yegkaa paax ke um fi’ankan. Qeet ke xan a ndiid soo a send, yaa da nga’kaa baneex fee fa jam fee fop um ci’kaa a Yeerusaleem.»

^10-11 Keeke o Yaal oxe a layu: «Kaa nu layaa yee saax lene a raadne boo jegatee wiin mbaat muumeen. A woora kañ ee teeru ke Yudaa fo ped ke Yeerusaleem a mbootata, ngenataand, njegatee wiin mbaat muumeen. Kaa koy, xan xa soroxole fo xa ƈeel, o ñuxur no kor-no-kulook oxe fo ole no kulook oxe a nantahinel teen. A kim ale no we na ƥisiidaa no Mbind Roog ne sadax kidmir xan a nanahinel ee: ‹Simatyo o Yaal oxe Hupna fop, yaam a faaxa, too o mbeq um xan a maadaa boo faw!› Yaam xam nomtiid we no saax le ƥiseena gilaa saax took o hup doole, dalnatin a den nen yaaga. Mi o Yaal oxe layun.»

¹² Keeke o Yaal oxe Hupna fop a layu: «Xan a jegahin no saax lene fesna a pec boo jegatee wiin mbaat muumeen sax fo kam teeru ke ten fop xa suufand axaa gaynaak we a koornaa xa siir den.

¹³ Kam teeru ke no jegel ole na xa coong axe, kam teeru ke no jegel ole na yulanq ake, kam teeru ke no ɓemb-roog o ñamaak, no saax le Bensame, me widna a Yeerusaleem fo kam teeru ke Yudaa xan a ked ake a ndeefahin teen no ɓay no kaynaak oxe na limaa a den.» O Yaal oxe layun.

Roog ñakkee o fadin ke ta regitna

¹⁴ O Yaal oxe kaa tee: «Ñaal key a ngaraa kaa um fadinkaa a tegit ake fi’anuuma xeet fee Isra’el fa fee Yudaa.

¹⁵ No ñaal kaaga fo no camaane kaaga, xam looƴin no kurcala le Dawid dugatin jofu laa na ñaaƴinkaa a ƭat fo o cofel kam saax le.

¹⁶ No ñaal kaaga, xan Yudaa a muclel, Yeerusaleem a gen no woor. Kene refu gon le teeru fee a ne’keel: ‹O Yaal oxe refu o cofel in.› »

¹⁷ Yaam keeke o Yaal oxe a layu: «O maad Dawid ñakkee muk o ndaan onqaa moofna no uum-maamaad le Isra’el.

¹⁸ Saasadax we ndefna Leelewi we itam ñakkee muk xa taan axaa na ngeenooxaa mbaambir es, ndax da ƥoxotaa sadax toxel, a ndoxaa cuuraay a yoonandtin sadax ke soo a ƥoxotaa sadax camsa’oor ñaal oo ñaal.»

¹⁹ O Yaal oxe a daawna a Yeremi fa lay um na xa ƭelem axene:

²⁰ «Keeke layum, mi o Yaal oxe: A soƥangaa yee nu mbaaga o ñuf bargal es ke dalnanuuma ñaal ne fo ke dalnanuuma o yeng ole, boo ndefkatee ñaal fo o yeng na waxtu fee da ngapeena,

²¹ yaaga ngiɓoor es fa Dawid fee o tag es a ɗegel itam boo jegkee o ndaan onqaa maadooxna took uum-maamaad le ten. Neene a refitkaa itam no ngiɓoor es fo Leelewi we ndefna saasadax we na ndagooxaxam.

²² Ne xa qoor axe na asamaan a mbaagaandeena o limit mbaat ne lanq ke no maag ole a mbaagaandeena o eedit, neene um mayƭanditkaa xa taan Dawid fee o tag es fo Leelewi we na ndagooxaxam.»

²³ O Yaal oxe a daawnahina a Yeremi fa lay um na xa ƭelem axene:

²⁴ «Ndax kaa ɗeetlooxiro ke xeet fene a layaa? Kaa ndamtin ee: ‹Ƥasil ƭik ke o Yaal oxe a jil’ina, a deɓa a den.› Neene, kaa nqeefat xeet es, na den, refatee xeet.

²⁵ Kaa koy, keeke layum, mi o Yaal oxe: Um dalin’angee bargal es fo ñaal ne fo o yeng ole, dalin a leem ake na asamaan fo no lanq ke,

²⁶ yaaga waagkoogaam o deɓ xa taan axe Yakoob fo axe Dawid fee o tag es, fañat o xotit na xa taan um waa na maadooxkaa took xa taan axe Abraham, Isaak fa Yakoob. Kaa koy, xam nomtiid we ƥiseena gilaa saax took o hup doole na den soo yirim a den.»