Yeremi 32 - NQAARIIT NE ROOG

Yeremi a jika o qol

¹ O Yaal oxe a daawna a Yeremi fa lay um no hiid xarɓaxayandeer olaa no maat Sedekiya fee o maad Yudaa. Kaa jopir’u fo hiid xarɓaxay fo hiid o ɓetuu dadkandeer olaa no maat Nebukadnesaar.

² Kaa soƥ’u xiixire we no maad oxe Babilon a mbid a Yeerusaleem o kurul-keƥ. O tuleer Yeremi mat kaa weg’el no maax ole no yeeyetax we no mbind ne no maad oxe Yudaa.

³ Sedekiya kaa wegin’u o tuleer oxe, a xasanan ke taxna ta yegnit fa lay feeke no Yaal oxe: «Nga’yo, xam ɓoxot teeru fene na xa ƥay no maad oxe Babilon, too xan a jangin.

⁴ Sedekiya fee o maad Yudaa ɓostooxkee Kaakalde we, ndaa xan a ɓoxotel a paax a paax na xa ƥay no maad oxe Babilon, a naag fo ten jak soo a lay fo ten.

⁵ Cinj kaaga, xan Sedekiya a ɓisel Babilon, maa ta yoqkaa boo yaa um topatooxkan. Mi o Yaal oxe layun. Nu nqire’angaa fo Kaakalde we sax, nu njegkee ne nu mbugna.»

⁶ Yeremi a laya yee: «O Yaal oxe a daawnaxam fa lay um na xa ƭelem axene:

⁷ ‹Hanamel fee o ƥiy faap o ndeb of Saalum xan a gar me wo, a liiƥaa, ndax o jik o qol um olaa refna Anatot, yaam jegaa sañ-sañ o watin, jegkin.›

⁸ Maaga, ne o Yaal oxe a layit’uuna, Hanamel fee o ƥiy faap o ndeɓ es a gara me mi no maax ole no yeeyetax we, a layaam ee: ‹Jiki o qol es olaa refna Anatot no saax laa Bensame, yaam jegaa sañ-sañ o jegin soo watin, jikaneen a xoox of.› Maaga, andataam ee fa lay no Yaal oxe a reeƭu.

⁹ Jiktaam na Hanamel fee o ƥiy faap o ndeɓ es o qol ole reeƭna Anatot soo peese’anin xaaliis fee no ndabid ne: Xa monjong xarɓaxay fo xa monjong ɓetaa ƭaq xaaliis fa nqoolu.

¹⁰ Bindaam a kayit a cikir, wegtin o ñaasir es, waaƭ seede soo peese’it xaaliis fee a poox.

¹¹ Cinj kaaga, xotaam a kayit a cikir ale wegit’eena o ñaasir, a saq bargal ke fo ke jofooreena fo a yiƥadax ale ten wegit’aandeena o ñaasir.

¹² Ɓoxotaam a kayit a cikir ale a Baruk fee o ƥiy Neriya too a ref o ndaan Mahseya, na kid Hanamel fee o ƥiy faap o ndeɓ es fo na kid no seede we ñaas’ina a kayit a cikir ale fo na kid no goor Yuuyudaa we fop ndeeƭna no maax ole no yeeyetax we.

¹³ Maaga, heblaam a Baruk mbaambir den ee:

¹⁴ Keeke o Yaal oxe Roog fee Isra’el Hupna fop a layu: ‹Jangi a kayit akeene, a kayit a cikir alene wegteena o ñaasir fo a yiƥadax ale ten wegaandeena, ɓek a den no nqaw maxte ƭok, ndax da ngeekel boo a pe a miñu.

¹⁵ Yaam keeke o Yaal oxe Roog fee Isra’el Hupna fop a layu: Xan pind, xa qol fo a ƭing taxar biiñ a njikahineel no saax lene.› »

A qeƭ ale Yeremi

¹⁶ «A cinj ye ɓoxotuuma a Baruk fee o ƥiy Neriya a kayit a cikir ale, xeɗaam o Yaal oxe yee:

¹⁷ ‹Ey, o Yaal oxe na refkaa boo faw, wo saktu asamaan fo lanq katil magnu of fo o ɓay o jegu doole le wo. Dara xoxirang.

¹⁸ Kaa o yirmaa wiin cuni-cuni, ndaa kaa o rabdinooxaa njofaƭar ne no paap ke took xa ƥiy den. Wo refu Roog fa magnu fee, o Yaal katil oxe, gon um a refna o Yaal oxe Hupna fop.

¹⁹ Yuuƥ ke wo kaa magin, a pi of a njeg katil. A kid of kaa ngaan na ƭat no wiin we fop, ndax o dakin oxuu refna a pesoorooƭ um, reefandin no ke a pi um a njagitna.

²⁰ Kaa o fi’oogu xa anddiloor fo comlaand, ye daan in a ndefaa kam saax le Misira soo maad o fi’aa a den boo xaye kam Isra’el fo no pindeef ke fop. Fi’anaa a xoox of gon jegu o ndam le refna boo xaye.

²¹ Suttaa a Isra’el fee xeet of no saax laa Misira na pexey xa anddiloor fo comlaand, o ɓay o jegu katil fo a naax a cegu doole boo fop a saɗarong.

²² Ci’aa a den saax lene, daaɓoox’oona fo daan in ee xan o ci’in a den, saax laa fo sis fo suum a ndaxritaa.

²³ A ndoka teen, a njangin, ndaa nan-gilooxee o ñuxur of, ndeefee kebil of, mbi’ee dara no ke hebil’oona a den da mbi. Ten taxu, o sag a den taamaala feeke fop.

²⁴ Ga’angi, a uum lanq a songir a ndaawa teeru fee boo a ƈut. Kaakalde we xan a songin, a njaɓin ndiiki. Teeru fee xan a ɓoxotel na xa ƥay den na pexey xire fo biim fa piste. Ke yegnit’oona a fadnooxa, too ga’aano a paax.

²⁵ Yaqanee toox de, wo o Yaal oxe na refkaa boo faw, o layaam um jikit o qol oleene xaaliis mbaambir no seede, ke teeru fee a ɓoxoteel na xa ƥay no Kaakalde we fop oo.› »

O Yaal oxe a doona a Yeremi

²⁶ Maaga, o Yaal oxe a daawna a Yeremi fa lay um na xa ƭelem axene:

²⁷ «Andaa yee mi refu o Yaal oxe, Roog fee no pindeef ke fop. Ndax a jega kaa xoxaxama?

²⁸ Ten taxu, mi o Yaal oxe, mexe layang ee: Xam ɓoxot teeru fene na xa ƥay no Kaakalde we fo na xa ƥay Nebukadnesaar fee o maad oxe Babilon, too xan a jaɓin.

²⁹ Kaakalde we na songaa teeru fene xan a ndok teen, a ngeƥandin. Xan a ndoxin riw, ten fo pind ke Baal a doxantoogeena cuuraay na xa tung-took axe den, soo roog lakas ke a njuuranteel teen, ndax um fuuxnoorel.

³⁰ Yaam Ii-isra’el we fo Yuuyudaa we paaxeer doŋ a mbi’u na kid es no kaa xotitna no mberaandoong naa na cosaan den. Ii-isra’el we mbi’ee dara a refangeerna a mbuuxnoortaam jale den. Mi o Yaal oxe layun.

³¹ Naa teeru fene a maxe boo xaye kaa fuuxnooraxam, a saynooraxam. Bugatinum o doon a ngid

³² yaam paaxeer ke Ii-isra’el we fo Yuuyudaa we a mbi’na fop, ndax da paang kam es, den fo maad den, kelfa den, saasadax den, duleer den, goor we Yudaa fo we ngenna Yeerusaleem.

³³ Kaa mbesaam ndiiñ, a mbañ o ƭeetaam. Ke aqatinuuma a den roog fuu feedna fop oo, nan-gilooxee, ndax da njaɓ a maƭax es.

³⁴ A ƥeka nitaal roog cakalaaru ke den kam Mbind ne kesaneema, ndax da nqoolaƭarandin.

³⁵ A maxana a Baal a ñaang a sadaxand na yulanq alaa Ben-Hinom, ndax da ndoxan a Molok xa ƥiy xa koor axe fo xa tew axe den. Hebliim a den keene too mosinum o xalaat sax. Ye da mbi’na cednooxu nandu neene, a mbakaadnoora xeet fee Yudaa.

³⁶ Ndiiki koy, ten taxu mi o Yaal oxe Roog fee Isra’el keeke layum na teeru fene nu layaa yee xan a ɓoxotel na xa ƥay no maad oxe Babilon na pexey xire fo biim fa piste:

³⁷ ‹Mi koy, xam fokatit a den na saax ake fop pasar’uuma a den kam fuux es, kam o say es fo no ngañak es. Xam nomtiid a den no mbiñ onqene, gennoor a den teen fo o woor.

³⁸ Maaga, xan a ndef xeet es, soo um ref Roog den.

³⁹ Xam coox a den yiif leng kut fo a ƭat a leng, ndax da saɗaraam kili, a njeg o ɗaay, den fo xa taan den.

⁴⁰ Xam dalin fa den ngiɓoor naa na refkaa boo faw, neene feskatiim a den a cinj, ndaa xam fi’an a den paax, ɓek na qeeñ den o saɗaraam, ndax saytoorkatee fa mi.

⁴¹ Xam felakinoox no fi’an a den paax. Xam jimb a den da saƭik koŋ no saax lene, fi’in fo xeeñ es fop fo o laaw es fop.› »

⁴² Yaam keeke o Yaal oxe a layu: «Ne ɓistiiduuma taamaala fa maak fene took xeet fene, neene um cooxitkaa a den paax ke reguuma a den.

⁴³ Xan xa qol a njikeel no saax lene nu layaa yee: ‹A raadne boo jegatee wiin mbaat muumeen, a ɓoxotel na xa ƥay no Kaakalde we.›

⁴⁴ Xan xa qol a njikteel xaaliis, a kayit a cikir a mbindel, a mbegtel o ñaasir, seede a mbaaƭel kam saax le Bensame, me widna a Yeerusaleem, kam teeru ke Yudaa, kam teeru ke no jegel ole na xa coong axe, kam teeru ke no jegel ole na yulanq ake fo kam teeru ke no jegel ole no ɓemb-roog o ñamaak. Yaam xam nomtiid we ƥiseena gilaa saax took o hup doole.» O Yaal oxe layun.