Yeremi 31 - NQAARIIT NE ROOG

¹ O Yaal oxe kaa tee: «No camaane kaaga, xam refat Roog fee no ƥasil ke Isra’el fop, too xan a ndefat xeet es.»

A nomtooxiid ale no we yoqna na Isra’el

² Keeke o Yaal oxe a layu: «Xeet fee ndaɗitna na bar ale a ndaawa yirmande kam a koƥ-a-ƥor alaa. Isra’el xan a waagat o ñoow no yaadax.»

³ O Yaal oxe a feeñoortaxam koƭu, a lay ee: «Naa moofum kaam fexong, ten taxu um geekanong o mbeq es.

⁴ Xam maxatinong, too xan o maxatinel, wo Isra’el o njaaƈ o ndoog o andee adna nqe. Xan o mosandooritahin a ñal ake wo, yoon fo feefec we na ƈeelaa.

⁵ Xan o jimbahin a ƭing taxar biiñ took xa coong axe Samari. We na njimbkaa a den xan a ƥoor xa tim axe.

⁶ Xan a jeg bes faa yeeyetax we a mbalalooxkaa took xa coong axe Efrayim ee: ‹Inooxyo, i ŋaay Siyoŋ, maa no Yaal oxe Roog in!› »

⁷ Yaam keeke o Yaal oxe a layu: «Soroxole’anyo a Yakoob, ƈeelan oxe adooxanna qeet ke. Njibinyo xa ñuxur nuun, simat too lay ee: ‹O Yaal oxe a mucla xeet um, we yoqna na Isra’el!›

⁸ Nga’yo, xam nomtitiid a den no saax laa no ɓemb-roog o janoon, fokatit a den no cat ke no lanq ke. A ndeer den xan a jeg fuul fo ɓoof, rew waa mbudna fo waa na ngaajooxaa. Den fop, xan a nomtooxiid mene, a mbi faan maak.

⁹ Xan da nomtooxiidaa a loolaa, a nqeɗaa, too xam ɗoxaa a den, ɓakand a den farna fo a ƈufnand foofi ke, da nqot a ƭat a cagu laa da tolofitkeerna, yaam kaam ref faap Isra’el, soo Efrayim a ref taaw es.»

¹⁰ Nuun qeet ke, nan-gilooxyo fa lay fee no Yaal oxe, lambnin na pimb a koƭu ke! Layyo yee: «Oxe pasarna a Isra’el xan a fokatin, a gayin ne o kaynaak a gaytaa o siir um.»

¹¹ Yaam o Yaal oxe a wata xa taan axe Yakoob, a mucil a den na xa ƥay no fañ we ngupna a den doole.

¹² Xan a mbadtiid xa soroxole took o joong ole Siyoŋ. Xan a ƥaxooxiid farna fo paax ke o Yaal oxe a jagandanna a den: bele fee, biiñ fa nqas fee, diwliin fee, a ked ake fo xa siir axe. Den fa qoox den xan a nand nen a ƭing alaa sooreena, ŋeesooxkatee.

¹³ Maaga, roog we xan a mbecoox fo o ɗaay, mbes ke fo a koorgi ke a mbelakinooxandoor. «Xam supit naqad den o ɗaay, yaal a den, felakin a den a cinj ɗom den.

¹⁴ Xam giñnoorit saasadax we cegel neeru, soo xeet es a ndeyƭoox no paax ke mi. Mi o Yaal oxe layun.»

¹⁵ Keeke o Yaal oxe a layu: «O wuuq a nane na saate faa Rama, ƭomatax fo xa lool xa ƭomu, Rakel na loolaa xa ƥeem too bugee o yaalel yaam maadatee.»

¹⁶ Keeke o Yaal oxe a layu: «Waasi xa lool axe, forit xa kooniit a kid of, yaam xan o rabdel calel of. Xa ƥeef xan a nomtoortiid no saax le no pañ oxe. Mi o Yaal oxe layun.

¹⁷ Jegaa yaakaar na adna of. Xa ƥeef xan a nomtooxiid no saax den.» O Yaal oxe layun.

¹⁸ Nanaam a paax we Efrayim da ƭomatooxaa yee: «Yaraa a in, too i yarte nen o xeel o sufaru. Nomtiidi a in me wo, too xan i nomtooxiid me wo, yaam wo refu o Yaal oxe Roog in.

¹⁹ A cinj ye i mbesoonga a cinj, i ndicooxa, a cinj ye i anddilooxna tooñ in, i ndiqooxa no kang. Kaa i sed, seeƈaar yaam ke i mbi’na no ndeƥandoong in.»

²⁰ O Yaal oxe kaa tee: «Ndax Efrayim kaa refee o ƥees onqe fexuuma fex, o njaaƈ onqe na ɗaaynooraxam? Nuu um maaltan, kupun moƴanum o wetandooxaa. Ten taxu kam es a dala no ten, um yirmin tigi.»

²¹ Sipi xa anddiloor axe wo, lup a teex ake wo, ndax o and me o jofaa. Ɗeeti a paax a ƭat ale, na qal ale o ñaaƴaa. Nomtooxiidi, wo Isra’el o njaaƈ o ndoog o andee adna nqe, nomtooxiidi no teeru kene jegoona.

²² Kaa o gapko wirlooxaa boo a mban, o ndoog o nanaƭaru nqe? Yaam o Yaal oxe xe sakaa qas took lanq ke: O tew oxe na waaƭataa o koor oxe.

Maqatin ne fo ngiɓoor nqas ne

²³ Keeke o Yaal oxe Roog fee Isra’el Hupna fop a layu: «Keeke na laykahineel kam saax le Yudaa fo kam teeru ke ten, yaa um nomtiidkaa we ƥiseena gilaa saax took o hup doole na den: ‹Yaasam o Yaal oxe a barke’ong, wo o joong o tedu le Siyoŋ, ngenand o cofel ne.›

²⁴ Wiin we Yudaa fo we no teeru ke ten fop xan a ngenandoor no saax leene, xooxoox we fo we na molaa fo xa siir den itam.

²⁵ Yaam xam xeƴnoor we ngoɗomeena, giñnoor fop we nqeexeena.»

²⁶ Took kaaga, yokooxaam, too ga’aam ee o ƭaan es a fel’axam.

²⁷ O Yaal oxe kaa tee: «Ñaal key a ngaraa kaa um mayƭandkaa kam maat ne Isra’el fo ne Yudaa wiin fo cegel, ne o qol a mayƭandteel fo ax.

²⁸ Ne fexeyantuuma a den, ndax um fuur, jiƭit, yaq, saŋik soo fi paaxeer, neene um fexeyanitkaa a den, ndax um max soo jimb.» O Yaal oxe layun.

²⁹ No ñaal kaaga, o feƭit olene laykataand: «Paap ke a ñaama a koƥ xa biiñ, ndaa xa ƥiy axe a ñiiñ ake a suumu.»

³⁰ Kaa koy, oxuu refna xan a xon yaam tooñ xoox um, too oxuu ñaamna a koƥ xa biiñ, a ñiiñ um na suumkaa.

³¹ O Yaal oxe kaa tee: «Ñaal key a ngaraa, kaa um dalnatinkaa ngiɓoor nqas fa xeet fee Isra’el, dalnatinin fa fee Yudaa.

³² Nandkee koy fo ngiɓoor ne dalin’uuma fo daan den, ye pokuuma a den no ɓay, sut a den no saax laa Misira, ngiɓoor es ne da ƭegna, ke refuuma o Yaal den fop oo. Mi o Yaal oxe layun.

³³ Kaa koy, keeke refu ngiɓoor ne um dalnatinkaa fa xeet fee Isra’el cinj ñaal keene: Xam ɓek kebil es kam a yiif den, bind a den kam a qeeñ den. Maaga, xam ref Roog den, da ndefat xeet es. Mi o Yaal oxe layun.

³⁴ O leng na den soxla’katee o jangnaa gend um mbaat ta layaa fog um ee: ‹Andyo o Yaal oxe!›, yaam fop xan a andaam, no ke xotitna no xe moƴna o neew boo no xe moƴna o maak, yaam xam waasanit tooñ den too wetandooxkatiim pakaad den. Mi o Yaal oxe layun.»

³⁵ Keeke o Yaal oxe a layu, ten oxe na ci’taa njeeƈ ne, ndax ta xoolandaa ñaal ne, a heblaa o nqool onqe fo xa qoor axe, ndax da nqoolandaa o yeng ole, a jumbandaa o maag ole boo a yag-ee-yag ake a ndititaa, ten oxe gon um a refna o Yaal oxe Hupna fop:

³⁶ «A leem akeene a ñuf’angaa mbaambir es, xa taan axe Isra’el itam ndefkoogatee xeet mbaambir es boo kili.» O Yaal oxe layun.

³⁷ Keeke o Yaal oxe a layu: «Asamaan fee a waag’ange o liiƥ mbaat a per ake no lanq ke a mbaagel o ƥaal, yaaga deɓkoogaam xa taan axe Isra’el fop yaam ke da mbi’ina fop.» O Yaal oxe layun.

³⁸ O Yaal oxe kaa tee: «Ñaal key a ngaraa kaa um maxatinankeel a Yeerusaleem, a xotit no Taax-took ne Hananel boo no Ndokand naa no kooñ ne.

³⁹ O ƥaak o liiƥir ole xan a letnahinel, a jof pec, boo no ñaang laa Gareb, cinj kaaga, ta puloox, a sag Gowa.

⁴⁰ Cinj kaaga, a yulanq ale xon we a ngaseel, ndaw ke a ƥaxeel teen fo xa qol axe fop boo na ƈufnand alaa Kederon, boo no kooñ naa no Ndokand naa no pis ke farna fo batand, xan a kesanel o Yaal oxe. Teeru feene jiƭitkataand too yaqkataand boo muk.»