Yeremi 3 - NQAARIIT NE ROOG

Isra’el a fesoora nen a caga

¹ O Yaal oxe kaa tee: «A soƥangaa yee o koor kaa rax o teem, boo oxeene a sambir fo ten soo a refat o tew no lakas, ndax a waagaan o xotatin nen o teem? Ndax keene xoolaƭarandkee saax leene tigi? Wo Isra’el koy, jaga’aa fo xa pes xa mayu, soo o bug o nomtooxiid me mi! Mi o Yaal oxe layun.

² Deɓi a kid of farna fo xa coong axe naangna halit too ɗeet, ndax a jega teen maa wondoortaandee’oona. Kaa o moofoogu na ƭat ake, cungaa a den, nen o molaan kam a koƥ-a-ƥor, na cungaa kaa ta damna. Xoolaƭarandtaa saax le njaga of fo a pesoorooƭ of a paaxeer.

³ Maaga, xañtaaxoong a teƥ ale, too jegatee puyaam seeseek, ndaa kaa o xox no jaga’aa too sediro teen dara.

⁴ Ndiiki koy, saɗaxamo o falaloox ee: ‹Faap es, wo refu xaariit es no ndeƥandoong es.

⁵ Ndax xan o dam fuux of boo kili? Ndax xan o geekin boo faw?› Keene o layaa too gen no fi’aa paaxeer, doon teen fakoortan.»

Ngore’aƭar ne no maat ne Isra’el fo ne Yudaa

⁶ Na jamaane faa no maad Yosiya, o Yaal oxe a layaxam ee: «Ndax ɗeetlooxaa ke maat ne Isra’el fa ngore’aƭaru fee a fi’na? Kaa retoogu took o joong o jiig oluu refna fo yoora ndaxar saqtu nuu refna soo a jaga’taa maaga.

⁷ Kaam layoogu yee: ‹A fi’angaa keene fop boo a deyƭoox, xan a nomtooxiid me mi.› Kaa koy, nomtooxiidee, too o pog um o tew, maat ne Yudaa fa ngoohod fee a ga’aan.

⁸ Ke raxuuma rax a Isra’el fa ngore’aƭaru fee fop oo yaam ceeq ke ten soo cooxin a kayit a pinde laa lalitna yee waasaanum, ga’aam ee o pog um o tew Yudaa fa ngoohod fee saɗaree keene too a jaga’ka ten itam.

⁹ Na pexey a pi a qoƈu ke ten Isra’el a xoolaƭaranda saax le, a faɗooxaa roog a ƥil ke fo ke na teex ake, a gore’aƭar na mi.

¹⁰ Cinj kaaga fop sax, o pog um o tew Yudaa fa ngore’aƭaru fee nomtooxiidee me mi fo xeeñ um fop, ndaa no cat ɗelem soom.» O Yaal oxe layun.

¹¹ Cinj kaaga, o Yaal oxe a layaxam ee: «Isra’el fa ngore’aƭaru fee moƴu o jof ee Yudaa fa ngoohod fee.

¹² Reti falaloox farna fo ɓemb-roog o janoon ee: ‹Nomtooxiidi, wo Isra’el fa ngore’aƭaru fee! Fuuxankiroong, yaam kaam may yirmande. Naagiim o geekaa fuux es boo cay. Mi o Yaal oxe layun.

¹³ Anddilooxi tooñ of rek, jaɓ ee siiknooraa fo o Yaal oxe Roog of. Kaa o siipanoogu muu refna, me no roog can ke, yoora ndaxar nquƥu nuu refna, too nan-gilooxiraamo.› » O Yaal oxe layun.

A nomtooxiid ale no Yuuyudaa we

¹⁴ O Yaal oxe kaa tee: «Nomtooxiidyo me mi, nuun xa ƥiy xa kore’aƭaru xe, yaam mi refu o Yaal nuun! Xam xot o leng na nuun mene, na teeru nangam, ɗik lakas maana, no ƥasil nangam, soo nomtiid a nuun Siyoŋ.

¹⁵ Xam coox a nuun ɗooɗox waa njagooxaxama, too xan a ƭoxit a nuun o jeg-yiif fo o woor.»

¹⁶ O Yaal oxe a layahina yee: «Yaa nu ndimatirkaa, mayat bo kam saax le, a koom arka ne no ngiɓoor ne no Yaal oxe layitkataand. Yiif gomkatiran, wetandooxkataand, xalatooxkataand, too lakas fi’atinkaand.

¹⁷ Maaga, Yeerusaleem xan a xoyateel ‹uum-maamaad le no Yaal oxe›. Qeet ke fop xan a mbokatoor Yeerusaleem, ndax da mbaɗoox o Yaal oxe, too xan a mbaas o nqox no saƭik xoox ole den.

¹⁸ A koom, we Yudaa xan a soƥik we Isra’el, soo den fop da yoonandoortiid no saax le no ɓemb-roog o janoon, a njagin no saax le ci’uuma daan nuun nen lamatir.»

A nomtooxiid ale na xeet fa ngore’aƭaru fee me Roog

¹⁹ O Yaal oxe kaa tee: «Cey, ndaw ne bugit’uuma o fi’ong nen o leng na xa ƥees, soo ci’ong saax laa felna bo, lam ne moƴna faax na adna fee fop! Kaam foog’u yee: xan o xoyaam ‹Faap es›, feskatiraamo a cinj muk.

²⁰ Kaa koy, ne o tew oxe a hodtaa o kor um, neene nu ngodtaxam, nuun mbind Isra’el. Mi o Yaal oxe layun.

²¹ O ñuxur ole nannooxaa took xa coong axe naangna halit: Ii-isra’el we yoo, na loolaa soo a ƈufginooxaa, yaam kaa ƭap a ƭat den, a mbeecit o Yaal oxe Roog den.

²² Nomtooxiidyo me mi, nuun xa ƥiy xa kore’aƭaru xe, too xam wodand a nuun no ngore’aƭar nuun.» Xeet fee a doona yee: «In wey ngaraa me wo, yaam wo refu o Yaal oxe Roog in.

²³ No ndigil, ke na hatiidaa na ñaang ake xa maaƥ xa ƥor oo, combol ɓor na fi’eel took xa coong axe. No ndigil, no Yaal oxe Roog in a muc ale Isra’el a refu.

²⁴ No ke xotitna no ndeƥandoong in, a paɗax a sednooxu le Baal a ruudna ke daan in a onj’ina: cegel teɓ ke fo maak ke den, xa ƥiy xa koor axe fo xa tew axe den.

²⁵ Fat i mbondoor gaci in, o niwaƭarel a hul a in, yaam kaa i tooñ o Yaal oxe Roog in, in fo daan in, no kaa xotitna no ndeƥandoong in boo no ñaal nene. I nan-giloox’ee o ñuxur no Yaal oxe Roog in!»