Yeremi 23 - NQAARIIT NE ROOG

Ɗooɗox faaxeer we fo o maad o muumuucil oxe

¹ O Yaal oxe kaa tee: «Sabab took no ɗooɗox we na xeet fee mi. Gaynaak faaxeer waa na mo’andaa, a pasaraa paal ke no siir ole mi a ndefu.»

² Ten taxu keeke o Yaal oxe Roog fee Isra’el a layu no gaynaak we na ngayaa xeet es: «Kaa nu pasar paal ke mi, ndax a den too nu topatooxee a den. Mi koy, xam ɓek a nuun o ɓay yaam a pi a paaxeer ake nuun. Mi o Yaal oxe layun.

³ Mi fa xoox es xam fokatit onqe yoqna no paal ke mi na saax ake fop rax’uuma a den, nomtiid a den na xa suufand den, maa da ndimatiritkaa soo a may gañ.

⁴ Xam sutan a den gaynaak waa na ngaykaa a den. Saɗarkatee, ndiidkatee muk. O leng na den yoqandkatee. Mi o Yaal oxe layun.»

⁵ O Yaal oxe kaa tee: «Nga’yo, ñaal key a ngaraa, kaa um sutitkaa no kurcala le Dawid dugatin jofu. Xan a maadoox fo o xool yiif, a ñaaƴnaa a ƭat fo o cofel kam saax le.

⁶ Na jamaane um, xan Yudaa a muclel, Isra’el a gen no woor. Kene refu gon le ta ne’keel: ‹O Yaal oxe refu o cofel in.› »

⁷ O Yaal oxe kaa tee: «Ten taxu ñaal key a ngaraa kaa o leng a laykateerna yee: ‹O Yaal oxe xe ñoowaa, ten oxe sutitna Ii-isra’el we no saax laa Misira.›

⁸ Kaa koy, kaa laykateel ee: ‹O Yaal oxe xe ñoowaa, ten oxe nomtitiidna xa taan axe Isra’el no saax le no ɓemb-roog o janoon fo na saax a lakas ake ta rax’ina a den.› Maaga, xan a ngenatin no saax den.»

Ke layeena no duleer maamaaɓ we

⁹ Ke layeena no duleer we. Xeeñ es kaa gooy taa kam es, um sendaa ne fodeema fop. Kaam nandtaa o kiin o bayu, nen oxaa biiñ a adinna yaam o Yaal oxe fo fa lay fa tedu fee ten.

¹⁰ Yaam saax le kaa naag gañ fo waa na seeqaa. Saax le kaa ngooy yaam a salax, xa suufand axe na koƥ-a-ƥor ale a mbeer koroŋ. Wiin we paaxeer doŋ a ƈufanaa, njambaar den a feeñtaa no njofaƭar.

¹¹ O Yaal oxe kaa tee: «Duleer we fo saasadax we sax kaa laawoox. Kam Mbind es sax soƥaam teen kañaan den.

¹² Ten taxu xan a ƭat den a ɓodax ruy, soo a niɓaan tit. Xan a mbaɓir teen, a yen, yaa um garitkaa took den taamaala, no hiid ole da ngadooxkaa a pi den. Mi o Yaal oxe layun.»

Duleer waa moƴna o mbaaxaƭar we Samari

¹³ «Ke ga’uuma no duleer we Samari o fanxoy oo. Kaa njo’tanoogu a Baal soo a mo’andoogu a Isra’el fee xeet es.

¹⁴ Ke ga’uuma no duleer we Yeerusaleem koy moƴu o sednoox. Kaa seeqaa, a ngen na xa maaƥ, a saƭakinaa we na mbi’aa paaxeer, ndax o leng feskee kañaan um a cinj. Den fop kaa nandaam nen wiin we Sodoom, we ngenna Yeerusaleem a nandaam nen we Gomoor.»

¹⁵ Ten taxu keeke o Yaal oxe Hupna fop a layu no duleer we: «Xam ñaamnoor a den qaaɗu soo yernoor a den foofi laa jegna ndoxar, yaam duleer we Yeerusaleem ngaru fo o yaqax ole naagna gañ kam saax le fop.»

Duleer maamaaɓ

¹⁶ Keeke o Yaal oxe Hupna fop a layu: «Ba nu nan-giloox ke duleer weene a yegnaa a nuun. No yaakaar mbooreer a ƥekaa a nuun, a layaa peeñil ke no xeeñ den doŋ, ngateerna no don es.

¹⁷ Kaa ngen no layaa we nqeefaxama yee: ‹O Yaal oxe kaa tee: Xan nu njeg jam.› Kaa layaa fop we na ndeefaa o saƭik xoox ole den ee: ‹Paaxeer leng dalkee a nuun.›

¹⁸ Kaa koy, an maadu mbokatax ne mi, mi o Yaal oxe, ndax ta ga, a nan-giloox fa lay es? An rungu nof um na fa lay es, an nanun?»

¹⁹ A und ale no Yaal oxe xey! Fuux le a biltooxa, too a qeñ a maak alaa na wirlooxaa a dala took no soxodu we!

²⁰ Fuux le no Yaal oxe ɓooskee, boo yaa ta fi’kaa, a fadin yuuƥ ke no xeeñ um. Xan nu andin taa mbaambir.

²¹ O Yaal oxe kaa tee: «Luliim duleer weene, ndaa yaqanee da ƈufaa. Layiim fa den dara, ndaa yaqanee da njo’tanaxam.

²² A maad’angaa mbokatax es, a ndaawinkooga xeet es ke layuuma, a sut a den na ƭat a paaxeer ale den fo na pi a paaxeer ake den.»

O Yaal oxe xey muu refna

²³ O Yaal oxe kaa tee: «Ndax yaa ta matna rek um refaa Roog, ndax kaa refiim Roog itam yaa ta goƭna?

²⁴ Ndax o kiin a waaga o ɗas maa laqooxna boo ga’kinum? Ndax mayiim asamaan fee fo lanq ke?» O Yaal oxe layun.

Baa ñaax le a hamatirandel fo pep ke

²⁵ «Mi o Yaal oxe, nanaam ke duleer we na yegnitaa xa maaƥ no gon es a layna. Kaa ndamtin ee: ‹Ɗaaɗaam, ɗaaɗaam!›

²⁶ Neene boo a mban? Xar refu na yiif no duleer weene yaa da yegnitaa xa maaƥ fo naanaxir ke na qeeñ den?

²⁷ Kaa nqalaataa o mbeecnoorit xeet es a mi xa ƭaaɗ axe den da mbetandooraa a ndeer den, ne daan we den a mbeectit’axama yaam Baal.

²⁸ Fat o tuleer oxe jegna o ƭaaɗ a wetandooxin, oxe daawna fa lay es o mat a yegnititin ne ta helitna. Xar ñaax le a daawru fo pep ke? Mi o Yaal oxe layun.

²⁹ Ndax fa lay es nandee nen fiɗel, nen o leede jegu doole laa na duguñaa ɓil le?»

³⁰ O Yaal oxe kaa tee: «Ten taxu yooniim fo duleer we na nguuɗraa fa lay es.

³¹ Yooniim fo duleer we na njangaa fa lay den, a mbi’in fa lay es.

³² Yooniim fo we na yegnitaa xa ƭaaɗ-a-qaamiit, a mbetandooxaa a den soo a mo’andtaa xeet es xa maaƥ den fo a magnandax den. Mi koy, luliim a den, hebliim a den dara, too njeganee xeet fene o njiriiñ o leng. Mi o Yaal oxe layun.»

Ndax fa lay fee no Yaal oxe a toq oo?

³³ O Yaal oxe a laya a Yeremi yee: «Boo xeet fene mbaat o tuleer mbaat o saasadax a laamtoonga yee: ‹Fa lay fum o Yaal oxe a gadnu a in ndiiki nen a toq?› fat o doon a den ee: ‹Nuun ndefu a toq ale kañ. Ten taxu xam waas a nuun pelek.›

³⁴ Boo o tuleer mbaat o saasadax mbaat oxuu ta waagna waag o ref na xeet fee a xoyna fa lay es ‹a toq no Yaal oxe›, xam dal took um, ten fo ƥasil um.

³⁵ Fat nu laamtiraa a ndeer nuun, ndeer o kiin fo o pog um ee: ‹Xar o Yaal oxe a doonu? Xar o Yaal oxe a layu?›

³⁶ Kaa koy, nu laamitkatee yee: ‹Xar refu a toq ale no Yaal oxe?› yaam oxuu refna fa lay um na refkaa a toq um. Kaa nu sufaalaa fa lay fee na Roog fa ñoow jok fee, no Yaal oxe Roog in Hupna fop.

³⁷ Fat o laamit o tuleer ee: ‹Xar o Yaal oxe a doonong? Xar o Yaal oxe a layu?›

³⁸ Nu maadangaa o laytaa ‹a toq ale no Yaal oxe›, ke xañtanuuma a nuun fop oo, maaga mexe layaa a nuun ee

³⁹ xam waas a nuun pelek, deɓ a nuun maa goƭna mukit es, nuun fa teeru fee coox’uuma a nuun fo daan we nuun.

⁴⁰ Xam doon a nuun gaci fa ñufkeer fo o niwaƭarel olaa weecitkataandeena muk.»