Yeremi 22 - NQAARIIT NE ROOG

¹ O Yaal oxe a hebla a Yeremi yee: «Reti no mbind ne no maad oxe Yudaa too yegnit maaga fa lay fene,

² lay ee: Nan-gilooxi fa lay fee no Yaal oxe, wo o maad oxe Yudaa fee moofna no uum-maamaad le Dawid, wo fo dag of fa xeet of, na ndoktaa no tokand kene!

³ Keeke o Yaal oxe a layu: Ñaaƴinyo a ƭat fo o cofel, suqit oxe na toroxandeel na xa ƥay no ñaañagadil oxe! Ba nu toroxand o gataakoon ole mbaat o waan ole mbaat o ñaaw oxe, ba nu ñagadil a den too ba nu ƥax no mbiñ onqene fo’oy jaambuur.

⁴ Yaam boo nu mbi’na keene no ndigil, yaaga xan a jegahin maad waa na moofkaa no uum-maamaad le Dawid, a ŋaay na sareet-xire fo pis. Xan a mbaag o ndeefaa no tokand ke no mbind nene, den fo dag den fa xeet fee.

⁵ Kaa koy, nu nan-gilooxangee fa lay feene, mexe daaɓoortan a xoox es o mat ee xan mbind nene a fes a pec.» O Yaal oxe layun.

⁶ Keeke o Yaal oxe a layu no kaa jofna no mbind no maad ne Yudaa: «Kaa o nandaam nen xa coc axe Galaad, nen o jul ole Libaŋ! Kaa koy, ndax fi’kiroong a koƥ-a-ƥor, teeru faa o leng a geneerna?

⁷ Inanaaxoong yaayaq, oxuu refna na den a pokoox ƥonax um. Xan a mbuuɓ a toodook taxar seedar ake wo moƴna o mbaax, soo a njoor a den na fiɗel.

⁸ Wiin a saax a mayu xan a ndeef paam teeru feene, a laamtiraa yee: ‹Xar taxu o Yaal oxe a fesoor neeke fa teeru fa maak fene?›

⁹ Maaga, xan a ndoonel ee: ‹Yaam kaa da mbaas ngiɓoor ne no Yaal oxe Roog den, a ngungaa mbaambir roog lakas, a mbaɗooxaa a den.› »

Ke layeena na Saalum fee rondandna o maad Yosiya

¹⁰ «Ba nu lool o maad Yosiya xe xonna, ba nu ƭomatooxin! Loolyo kañ o maad Saalum oxe ɓiseena, yaam nomtooxiidkatee muk, ga’katee saax o rimel um.»

¹¹ Keeke o Yaal oxe a layu na Saalum fee o maad Yudaa rondandna a faap um Yosiya too a suttel no saax lene: «Nomtooxiidkatee teen muk,

¹² yaam maa ta ɓiseena took o hup doole a xonitkaa too ga’katee saax lene.»

Yoyakim a xasane

¹³ Sabab took no xe na maxtaa mbind um njofaƭar, a yoɗaa teen taax-took na ƭat a qeleer, a jalnooraa o kend um too rabidkiran!

¹⁴ Kaa layaa yee: ‹Xam maxan a xoox es mbind yaaju fo taax-took kaa yaadooxna.› Kaa sexaa teen xa palangteer, a singit tabax ne a patax ndaxar seedar soo a ɗuumin yaxgu.

¹⁵ Ndax kaa o bug o lalit ee o maad tigi refo yaam ne o yuxmaa a patax ndaxar seedar? Ndax faap of ñaamoogee, a yeraa nen a wo? Yaag oo toox de a ƭat fo o cofel a ñaaƴnoogu, too fop a faax’a no ten.

¹⁶ Kaa ɓoxotoogu o ndool onqe fo o toroxu xe wargal den, too fop a faax’a. Ndax keene refee o andaam? Mi o Yaal oxe layun.

¹⁷ Kaa koy, a kid of fo xeeñ of o njiriiñ of rek a ƭeetaa fo fo’oy jaambuur, ndax o ɓaxin, ñagadil fo a ƭom-yedar, ndax o fadin a den.

¹⁸ Ten taxu keeke o Yaal oxe a layu na Yoyakim fee o ƥiy Yosiya, too a ref o maad Yudaa: «Foygooxkaand ee: ‹Ndaw sabab, o koor es! Ndaw sabab, o cigeen es!› Foygooxkaand ee: ‹Ndaw sabab, o yaal es! Ndaw sabab, daali maad!›

¹⁹ Xan a gastel nen o faam, a ɗooqel soo a deɓel tafil tokand ke Yeerusaleem.»

Gaci fee fo o niwaƭarel ole Yeerusaleem

²⁰ O Yaal oxe kaa tee: «Ŋaayi took xa coong axe Libaŋ too wuuq, wo Yeerusaleem! Jibni o ñuxur of took ñaang le Basan! Falaloorti took xa coong axe Abarim, yaam fop we mbesanoogoonga a nduguñe!

²¹ Lay’aam fa wo yaaga dara jaaxɗandirang, ndaa o doonaam ee: ‹Nan-gilooxkiim.› Keene refu a pesoorooƭ of no kaa xotitna no ndeƥandoong of, yaam nan-gilooxiro o ñuxur es.

²² Ɗooɗox we wo fop xan nqeñ ne a maƥ a den, we mbesanoogoonga a ndefik faɗ. Maaga, xan o sed, may fa gaci yaam kañaan of fop.

²³ Wo fee ngenand of a nandna fa Libaŋ, ndut of o fi’in kam taxar seedar ke, xan o iin tigi yaa a ƭomaand ake a ndalkang, o lañtooxaa nen o tew oxaa na gaajooxaa.»

Ke layeena na Koniya fee o ƥiy Yoyakim

²⁴ O Yaal oxe a laya a Yoyakin fee o ƥiy Yoyakim too a ref o maad Yudaa yee: «Ne ta wooritna yee mexe ñoowaa, a soƥ’angaa sax ee kaa o ref nen o heɗ o ñaasir no ɓay es o ñamaak, xam paltong no nqol es.

²⁵ Xam ɓoxotong na xa ƥay no we mbugna njang o ñis of, we saɗaroona, na xa ƥay Nebukadnesaar fee o maad oxe Babilon fo a yaj ake ten.

²⁶ Cinj kaaga, xam deɓ a nuun, wo fa ya of fee rimoonga, kam saax lakas laa nu ndimaandeena, too maaga nu nqonitkaa.

²⁷ Kam saax lene nu yuxumna o nomtooxiid nu nomtooxiidkee teen.»

²⁸ Kaa laamteel ee: «Ndax Yoyakin fene kaa ref nqaw ƭok naa jiriiñateerna tus, a gef, o ƥaxañ olaa o leng a bugateerna? Xar taxu da ndeɓel, ten fo xa taan um, a ndaxel no saax laa da andeerna?»

²⁹ Saax le, saax le, saax le! Nan-gilooxyo fa lay fee no Yaal oxe.

³⁰ Keeke o Yaal oxe a layu: «Mbindyo na safe ke no caloori ke no koor oxene nen oxaa jegeerna o ƥiy, nen oxaa o ñoow um a yaqooxna. O leng na xa taan um waagkee o moof took uum-maamaad le Dawid, a maadoox took Yudaa.»