Yeremi 19 - NQAARIIT NE ROOG

O jalag o duguñe le

¹ O Yaal oxe a hebla a Yeremi yee: «Reti, o jikit o jalag ƭok maa no maamax xa calag. Cinj kaaga, yooni fo leng-leng no maak we na xeet fee fo maak we no saasadax we.

² Sutoorti no ndokand ne no maxand ole, jagin na yulanq alaa Ben-Hinom. Fat o yegnit maaga fa lay fee um daawinkang.

³ Xan o lay ee: Nuun maad we Yudaa fo we ngenna Yeerusaleem, nan-gilooxyo fa lay fee no Yaal oxe! Keeke o Yaal oxe Roog fee Isra’el Hupna fop a layu: Xam atiid no mbiñ onqene taamaala faa na foɗaxinkaa nof no we na nankan.

⁴ Yaam we Yudaa a mbaasaxam. A maasanda o mbiñ onqene, a ƥoxot teen cuuraay roog can kaa andoona yee den fa qoox den, daan den fo maad we Yudaa and’ee a den, too a mayƭandta o mbiñ onqene fo’oy no caambuur.

⁵ A maxana a Baal a ñaang a sadaxand, ndax da ndoxanin teen xa ƥiy den xa koor nen sadax toxel, ta ref kaa heblit’eeruuma, layit’inum too mos’inum o xalaat sax.

⁶ Ten taxu, mi o Yaal oxe um lay ee: Ñaal key a ngaraa kaa o mbiñ onqene a xoykataandeena Tofet mbaat a yulanq ale Ben-Hinom, ndaa a yulanq ale na bar ale.

⁷ No mbiñ onqene, xam kasaara’in yuuƥ ke no we ngenna Yudaa fa Yeerusaleem. Xam maafit a den laƥ no fañ den fo o ɓay no we mbugna njang o ñis den soo ɓoxot xa tal den da ndefik ñaamel a tud ake fo ƥaaɓaan ke.

⁸ Xam ɓek teeru fene no tas fo no calat. Oxuu joonna paam um xan a diid soo a wuuƴ, yaa ta ga’kaa yaq fee ten fop.

⁹ Xam ñaamnoor we ngenna na teeru fee cer na xa ƥiy xa koor axe fo na xa tew axe den, too xan a ƈaxraa a ndeer den, kam naqad fee fo o ñaat ole fañ den fo we mbugna njang o ñis den a ƥekkaa a den.

¹⁰ Cinj kaaga, xan o duguñ o jalag ole na kid no goor we na yoonkaa fa wo,

¹¹ soo lay a den ee: Keeke o Yaal oxe Hupna fop a layu: Neene um duguñitkaa xeet fene fa teeru fene ne o jalag ole no maamax xa calag a duguñteel boo waagkataand o xendand. Xon we xan a ngasateel Tofet took o ñakat maa da ngaseena.

¹² Neene um fi’kaa o mbiñ onqene fo we ngenna teen. Ke dalna a Tofet xan a dal teeru fene. Mi o Yaal oxe layun.

¹³ Pind ke Yeerusaleem fo ke no maad we Yudaa xan a nqoolaƭar nen a Tofet, pind ke fop andoona yee xa qoor axe na asamaan a ƥoxotane cuuraay na xa tung-took axe den, soo roog lakas ke a njuuranel teen biiñ nen sadax.»

¹⁴ Yaa Yeremi a nomtoortiidna Tofet, maa o Yaal oxe a lul’uuna, ndax ta yegnitanin fa lay um, a gara a geenoox no maax ole no Mbind ne no Yaal oxe, a lay fop waa ndeeƭna maaga yee:

¹⁵ «Keeke o Yaal oxe Roog fee Isra’el Hupna fop a layu: ‹Xam atiid took teeru fene fo took teeru ke ta waxooxna fop taamaala ke regdinooxanuuma fop, yaam we ngenna teen kaa saƭik a qoox, a mbañ o nan-giloox fa lay es.› »