Yeremi 18 - NQAARIIT NE ROOG

Yeremi me no maamax qaw oxe

¹ O Yaal oxe a daawnaxam fa lay um na xa ƭelem axene:

² «Inooxi, ret no mbind no maamax qaw oxe. Maaga o nanitkaa ke bugoonga o lay.»

³ Retaam no mbind ne no maamax oxe jaloogna, a wirlaa o maxir qaw ole ten.

⁴ Kaa koy, nqaw ne ta maxoogna xen’ee, ne ta reftaa leek-leek fo ƭok ke ndefna na xa ƥay no maamax qaw oxe. A fi’atina fo ƭok leng kut ke nqaw nqas naa nandna ne ta bugna.

⁵ Maaga, o Yaal oxe a daawnaxam fa lay um na xa ƭelem axene:

⁶ «Nuun xeet fee Isra’el, ndax waag’iim o fesoor fa nuun nen o maamax oxene? O Yaal oxe layun. Nga’angyo, ne ƭok ke a ndefitna no ɓay no maamax qaw oxe, neene nu ndeftu no ɓay es, nuun xeet fee Isra’el.

⁷ Leek-leek kaam fosooxanaa xeet mbaat maat ee xam sooƴnin, maafin soo gefin tuƈ.

⁸ Kaa koy, boo xeet feene a fesna a cinj ke taxna um fuuxanin, xam ricoox paaxeer ke yuuɓan’anuuma.

⁹ Leek-leek itam kaam fosooxanaa xeet mbaat maat ee xam maxin, sinjin.

¹⁰ Kaa koy, boo xeet feene a fi’na paaxeer na kid es, a fañ o nan-giloox o ñuxur es, maaga xam ricoox paax ke yuuɓan’anuuma.

¹¹ Ndiiki koy, layi wiin we Yudaa fo we ngenna Yeerusaleem ee: Keeke o Yaal oxe a layu: Mexe fexeyanaa a nuun taamaala, yuuɓanaa a nuun yuuƥ paaxeer. Fat oxuu refna na nuun a fes a ƭat a paaxeer um a cinj. Njagandatinyo a ƭat nuun fo a pi nuun.

¹² Kaa koy, kaa layaa yee: ‹Ɗaxee dara! Xan i ñoowtaa naa felitna a in! Oxuu refna na in xan a xox no saƭik xoox o faaxeer um.› »

Isra’el a weeca o Yaal oxe

¹³ Keeke o Yaal oxe a layu: «Nqoosyo xeet fuu refna, ndax nandu nene a mose o nan? Isra’el o njaaƈ o ndoog o andee adna nqe a fi’a cednooxu ƭomu.

¹⁴ Ndax nu mosa o nga nees fee a wat na ƥil a koƭu took ake Libaŋ? Ndax nu mosa o nga poofi ke na inoortiidaa koƭu, a ƥuuɓ yem, a nqayaa, da ŋiisaa? Ha’aa.

¹⁵ Yaag oo toox de xeet es a mbeecaxam. Kaa da ndoxanaa cuuraay pangool kaa na tolofnooraa a den na ƭat den, na qal cosaan den, ndax da nqot fo ƭat fo a ƭat akaa mbiisaandeena.

¹⁶ Neene, a ƥeka saax le den no tas fo no calat boo kili. Fop we na ƥeeraa teen a njaaxɗa, a mbulaa a qoox.

¹⁷ Ne nqeñ ne no batand a maƥtaa fo ut ole, neene um pasaritkaa xeet es mbaambir fañ den. A koom alaa fo njakad onqe den, xam fes a den ndiiñ, fañ o lal a den mukit es.»

Yeremi a hiɓane o ngir

¹⁸ Maaga, a jega waa layna yee: «Ngaryo i yuuɓan a Yeremi yuuƥ paaxeer, yaam i ñakee saasadax waa njangnitna kebil ke, yaal-o-and waa cooxna a in xa as fo duleer waa ndaawnitna fa lay fee Roog. Ngaryo i yaq ƭool um, too ba a ƭat in a yong no fop ke ta layaa a in.»

¹⁹ Maaga, xeɗaam ee: «O Yaal oxe, rungi nof of no ke um layaa soo nan-giloox ke fañ es a layaa na mi!

²⁰ Ndax paax a naaga rabditeel paaxeer? Yaam a mbaqanaxam gamb, ndax da njang o ñis es. Wetandooxi yee geenoox’aam mbaambir of, ndax um lay na den paax, ɓoosdand fuux of fa den.

²¹ Ten taxu, ɓoxoti xa ƥiy den biim le, joor a den no weel le no laƥ ne. Yaasam rew we den a nqatat, a ndefat ñaaw. Yaasam piste a ñaam goor we den, laƥ a saŋik mbes ke den na xire fee.

²² Yaasam xa paɗax a njibit no pind ke den, yaa o hebliidkaa took den ndak fo ndak saasaay. Yaam a mbaqanaxam gamb, ndax da naangaam nuus, a ƭaapanaam mbog na caf es.

²³ Wo o Yaal oxe koy, andaa kukir ke den fop, ndax da mbarnooraam. Ba o waasan a den tooñ den too ba o forit bakaad den mbaambir of. Yaasam da maafel na kid of! Ɓeki a den o ɓay yaa fo fuux of!»