Yeremi 16 - NQAARIIT NE ROOG

O woot ole Yeremi

¹ O Yaal oxe a daawnaxam fa lay um ee:

² «Ba o gilig o tew too ba o jeg xa ƥiy xa koor mbaat xa tew no saax lene.

³ Yaam keeke layum, mi o Yaal oxe, na xa ƥiy xa koor axe fo xa tew axe na ndimkeel no mbiñ onqene, no yaay ke na ndimkaa a den fo no paap ke na axkaa a den kam saax lene:

⁴ Xan a nqonit no jir waawar. Nqaaraandkaand too ngaskaand. Xan a ndefik tosir lanq ke. Xan a pattel laƥ fo biim, soo xa tal den a ndef ñaamel a tud ake fo ƥaaɓaan ke.»

⁵ O Yaal oxe a layahinaxam ee: «Ba o rok no mbind naa na nqaaraandaa, ba o maad a mboy, ba o jaap o leng, yaam suqtaam na xeet fene nqaariit es, o paaxel es fa yirmande es. Mi o Yaal oxe layun.

⁶ Kam saax lene, yaal kalal oo rool oo xan a nqon. Ngaskaand, mboykaand, too o leng ñaasooxkee mbaat ta xanqoox, ndax ta lalit naqad um yaam den.

⁷ We na ñaawooxaa ndoxkaand, too we ñakna a faap den mbaat ya den ci’kaand a yer. O leng yaalkee a den.

⁸ Ba o rok no mbind ne jegna mbumbaay, ndax o moof fa den, ñaam soo yer.

⁹ Yaam keeke layum, mi o Yaal oxe Roog fee Isra’el Hupna fop: Na kid nuun fo na jamaane nuun, xam ñuf no mbiñ onqene xa ƈeel axe fo xa soroxole xe, o ñuxur no kor no kuloox oxe fo ole no kulook oxe.

¹⁰ O yegnangaa xeet fene keene fop, xeƈa xan a laamtong ee: ‹Xar taxu o Yaal oxe a maƭoox a in taamaala fa maak feene fop? Xar refu tooñ in fa bakaad in boog i mbakaaditna no Yaal oxe Roog in?›

¹¹ Maaga, fat o doon a den ee: ‹O Yaal oxe kaa tee: Ke taxuuna refu yee daan nuun kaa mbaasaam, a ngiɓoor fo roog lakas, a mbaɗooxaa a den soo a ngungaa mbaambir den. Mi o mat a mbaasaxam, too ngayee a cangin es.

¹² Nuun koy, nuun moƴu o mbi paaxeer daan nuun. Oxuu refna na nuun oxey a xoxa no saƭik xoox um, a fañ o nan-gilooxaam.

¹³ Ten taxu xam deɓ a nuun maa goƭna saax lene, no saax lakas laa nu andeerna, nuun fo daan nuun. Xan nu mbaɗooxaa maaga roog lakas, ñaal fo o yeng, yaam yirimkiim a nuun.› »

A nomtax a maak ale no we pasaroox’ina

¹⁴ O Yaal oxe kaa tee: «Yaaga koy, ñaal key a ngaraa kaa o leng a daaɓooritkateerna yee: ‹Ne ta wooritna yee o Yaal oxe xe ñoowaa, ten oxe sutitna Ii-isra’el we no saax laa Misira!›

¹⁵ Kaa koy, xan a daaɓoorteel ee: ‹Ne ta wooritna yee o Yaal oxe xe ñoowaa, ten oxe sutitna Ii-isra’el we no saax laa no ɓemb-roog o janoon fo na saax ake fop ta pasar’ina a den.› Xam nomtiid a den no lanq ke den ci’uuma daan den.»

We mbi’na cageer fop xan a ndamel

¹⁶ O Yaal oxe a laya yee: «Mexey luliidaa faafaal fagkatar, too xan a mbaal we pasarooxna. Cinj kaaga, xam luliid xaaxaƴlax fagkatar, too xan a nqawloox a den took xa coong axe fop, took a ñaang ake fop fo na semb ake na ƥil ake.

¹⁷ Yaam a kid es kaa naang jak na pesoorooƭ den, laqooxiraam, too tooñ den kunpa’iraam.

¹⁸ Xam eet o rabid a den boo a caf a ƭak tooñ den fo pakaad den, yaam kaa maasandit saax le mi nitaal cakalaaru qonu ke den soo a mayƭandit mbaaxaan ne mi roog tefee ndigil cednooxu ke den.»

Fop a njaɓata a Roog fa ndigil fee.

¹⁹ O Yaal oxe, wo refu doole es, o saasaytax es fo njaɓnooxand es yaa fa naqad. Me wo qeet ke no cat adna a ngarkaa too xan a lay ee: «Daan we in caaxaan a lamu, xa koɓong axaa ƭaxeerna dara.

²⁰ Ndax o kiin a waaga fi’an a xoox um roog? Ke na mbi’eel ndefee roog.»

²¹ O Yaal oxe kaa tee: «Ten taxu xam andnoor a den, kaam ee, no jaf leeke xam andnoor a den o ɓay es fa katil es, too xan a and ee mi refu o Yaal oxe.»