Yeremi 12 - NQAARIIT NE ROOG

¹ O Yaal oxe, kaa o jof bo ta hup, ndax um ñimatir fa wo. Yaqanee koy, bugaam o lay fa wo kaa jofna no kate of: Xar taxu a ƭat ale no soxodu we a xenaa, hoohod we fop a ñoowaa na jam?

² Jimbaa a den, da sax a paƴ sax, a maakaa soo a ndimaa. Gon of oxey na xa ton den kili, ndaa a qeeñ den a ngoƭaang lool.

³ Wo o Yaal oxe, andaxamo, kaa o ga’axam soo horooxaa xeeñ es paam of. Sayi soxodu we nen paal kaa na ƥiseel no warand, kesan a den bes fee na saŋik ale.

⁴ Saax le kaa refkaa neeke na naqad boo a mban, soo daaƭ le na koƥ ale fop ee ŋayam? Ƥaaɓaan ke fo tiiƭ ke no saax le a sooƴa, yaam kañaan ne no we ngenna teen. Kaa da layaa yee: «Roog ga’ee ke na dalkaa a in.»

⁵ O Yaal oxe kaa tee: «Wo Yeremi, a soƥangaa yee kaa o ƴufaa fo yaal a caf, soo da nqijlandong, nam o daƭatiritkaa fo pis? A soƥangaa yee no saax jam doŋ o yaadooraa, xar o fi’kaa, yaa rokoona kam suungaan le Yordaan?

⁶ Fog of sax fo ƥasil of fa qoox den xan a ngodong. Den itam xan a njax xa buuq a cinj of. Ba o hooloox a den, yaa da layaa fa wo a ƭelem a pelu.»

Roog a waasa mbind um fa xeet um

⁷ O Yaal oxe kaa tee: «Waasaam mbind es, pilid xeet fee jeg’uuma. Ɓoxotaam oxe fex’uuma fex na xa ƥay no fañ um.

⁸ We jeg’uuma a ndefata na mi nen cogoy kam suungaan, a ŋuuranaxam. Ten taxu um sib a den.

⁹ Ndax we jeg’uuma ndefee na mi nen ndiiƭ njeel ndaadam naa tiiƭ taadam lakas ke a songna o saax oo saax? ‹Ndetyo mbokat ƥaaɓaan ke na koƥ ale fop! Ƥisiidyo a den da ñaam!›

¹⁰ Gaynaak mayu a nduudna a ƭing taxar biiñ ale mi, a nduut o qol ole mi, o qol o yaawnooxu le mi da mbi’in nen a koƥ-a-ƥor.

¹¹ A ruudne, a ref na naqad, a ruud mbaambir es. Saax le fop a raada, too haalee o leng.

¹² Yaayaq a mbadiida took xa coong axe fop naangna halit kam a koƥ-a-ƥor ale. Laƥ ne mi xe saŋkaa saax le, a xotit no cat boo no cat, too waasee o leng.

¹³ Bele a nduuf’u, ndaa takar-ñiig a saxadaa. A paanga doole den na xa koɓong. Njegyo gaci boog no ke nu saxadna, yaam fuux ɗomu le mi.»

O Yaal oxe fo gentand we Isra’el

¹⁴ Keeke o Yaal oxe a layu no gentand faaxeer we na xeet es: «A nduqa ke jeg’uuma, o fiisel ole lasrand’uuma a Isra’el fee xeet es. Xam fuurit a den no lanq den, fuur a ndeer den itam wiin we Yudaa.

¹⁵ Kaa koy, a cinj yaa um fuurkaa a den, xam yirmatin a den soo nomtiid a den, oxuu refna no lanq um, oxuu refna no saax um.

¹⁶ Maaga, a aqatooxangaa a ƭat ake na xeet es, a ndaaɓoorit gon es ee: ‹Ne ta wooritna yee o Yaal oxe xe ñoowaa›, ne da njangnitna xeet es da ndaaɓooraa a Baal, xan a ndalnel a ndeer xeet es.

¹⁷ Kaa koy, fa leng no qeet keene a nan-gilooxangiraam, xam fuurin ɗiqit soo saŋkin.» O Yaal oxe layun.