Yeremi 11 - NQAARIIT NE ROOG

Xeet faa hodna ndegoor um

¹ Yeremi a daawta no Yaal oxe fa lay fene:

² «Nannoori we ngenna Yudaa fa Yeerusaleem ndegoor ne no ngiɓoor ne mi.

³ Fat o lay a den ee: O Yaal oxe Roog fee Isra’el kaa tee: O kiin oxe gaykeerna bargal ke no ngiɓoor ne mi a salooxe!

⁴ Dalnanaam a den daan nuun a koom alaa suttuuma a den no saax laa Misira, a kaleera cawir celem ale, lay ee: Nan-gilooxyo o ñuxur es too mbi fop ke dalnanuuma a nuun, yaaga xan nu ndef xeet es, soo um ref Roog nuun.

⁵ Neene, xam dam ke daaɓooxuuma fo daan nuun ee xam ci a den saax laa fo sis fo suum a ndaxritaa, ne ta refitna xaye.» Maaga, doonaam ee: «Ndigil oo, o Yaal oxe!»

⁶ O Yaal oxe a layaxam ee: «Lambni fa lay fene fop kam teeru ke Yudaa fo no ped ke Yeerusaleem ee: Nan-gilooxyo ndegoor ne no ngiɓoor nene too ndeefin!

⁷ Yaam kaam maƭooxoogu daan nuun no kaa xotitna a koom alaa suttuuma a den no saax laa Misira, a gar fa xaye. Kaam maƭooxoogu a den roog fuu feedna yee: Nan-gilooxyo o ñuxur es!

⁸ Kaa koy, nan-gilooxee, ndungee nof den. Kaa nqox no saƭik xoox o faaxeer ole den. Maaga, fadnaam took den a maƭax es fop, yaam ndeefee bargal ke no ngiɓoor neene hebil’uuma a den.»

⁹ Cinj kaaga, o Yaal oxe a layaxam ee: «Wiin we Yudaa fo we ngenna Yeerusaleem a ngiɓa o ngir.

¹⁰ A nomtooxa no tooñ ke no daan feraand we den mbañ’ina o nan-giloox fa lay es. Kaa ngiɓoor fo roog lakas, ndax da mbaɗoox a den. Wiin we Isra’el fo we Yudaa a ƭega ngiɓoor ne mi dalin’uuma fo daan den.»

¹¹ Ten taxu keeke o Yaal oxe a layu: «Mexey ɓisiidaa took den taamaala faa da mbaagkeerna o ndaɗ. Xan a ƈufginooxaam, ndaa nan-gilooxkiim a den.

¹² We ngenna no teeru ke Yudaa fo we Yeerusaleem xan a ƈufginook roog ke da ndoxanaa cuuraay, ndaa mbaagkee o mucil a den yaa fa taamaala fee den.

¹³ Yaam wo Yudaa, jegaa roog kaa mayitna nen teeru ke wo. Wo Yeerusaleem, xa sadaxand gaci xe sipoona kaa mayit nen ped ke wo, xa sadaxand axaa Baal a doxanteel cuuraay.

¹⁴ Wo Yeremi koy, ba o xeɗan xeet fene. Ba o loolooxan mbaat o xeɗooxan a den, nan-gilooxkiim a den, yaa da ƈufginooxaxam yaa fa taamaala fee den.»

Isra’el, ndaxar oliiw ne no Yaal oxe

¹⁵ O Yaal oxe kaa tee: «Xar xeet fee fexuuma fex a mbaaƭiidu no Mbind es? Paaxeer ƥor a yuuɓu teen sax. Ndax kaa mboog ee ke da ndegaxama fo sadax cegel ke da ƥoxotaxam xan a mbinqan a den taamaala fee, soo da sutoox teen?»

¹⁶ O Yaal oxe kaa xoyoogong «Ndaxar oliiw neepu ne, xa tim axe a mbelna lool». Te paam koy, kam fangax maak, xan a heƥand teen fiɗel, soo a naaq ake ten a ƥolel.

¹⁷ O Yaal oxe Hupna fop jimb’oonga, a fosooxanaang taamaala yaam paaxeer ke wiin we Isra’el fo we Yudaa a mbi’na a qoox den. A mbuuxnooraan, ye da ndoxanna a Baal cuuraay.

Yeremi a hiɓane o ngir

¹⁸ O Yaal oxe, andnooraxamo a pesoorooƭ ake no fañ es, too andaam a den ndiiki.

¹⁹ Mi, kaam nand’u nen o mbaal o yooɓu nqaa na ɓiseel no warand. And’iim muk ee mi a ngiɓanu o ngir, a layraa a ndeer den ee: «Fat i maaf ndaxar nquƥu sap ne, mbatnin no lanq ke no ñoow we, ndax gon um wetandooxkataand muk!»

²⁰ Kaa koy, wo o Yaal oxe Hupna fop, kaa o hate’taa o cofel, horooxaa a pug fo a qalaat a ƭasu ke no wiin we. Xam ga ndabdinax of took den, yaam wo doxnum nqeloor es.

²¹ Ten taxu keeke o Yaal oxe a layu: «Wiin we Anatot kaa mbug o njang o ñis of too a layaa yee: ‹Ba o jo’tan o Yaal oxe, mbaat xan i mbartong xa ƥay in.›

²² Kaa koy keeke layum, mi o Yaal oxe Hupna fop: Nga’angyo, xam dal took den! Xan laƥ a ñaam mbes ke den, biim a war xa ƥiy xa koor axe fo xa tew axe den.

²³ Yoqkee o leng no wiin we Anatot, yaa um ɓisiidkaa taamaala fee took den, no hiid ole um ɓekkaa a den o ɓay.»