Yeremi 1 - NQAARIIT NE ROOG

¹ Safe lene kaa fof ke Yeremi fee o ƥiy Hilkiya a layna fo ke ta fi’na. Yeremi kaa fog’u no ƥasil no saasadax waa ngenoogna Anatot, no fiisel ole na carind ale Bensame.

² O Yaal oxe a daawnaan fa lay um na jamaane faa Yosiya fee o ƥiy Amon a refaa o maad Yudaa, no hiid xarɓaxay fo o hiid o dadkandeer ole no maat um.

³ O Yaal oxe a layoogahina fo ten na jamaane faa Yoyakim fee o leng na xa ƥiy axe Yosiya a refaa o maad Yudaa, boo no muukandoong naa no maat Sedekiya fee o ƥiy Yosiya, refna ref o hiid xarɓaxay fo o hiid o lengandeer ole no maat um, no nqool o ƥetkandeer onqe, ye waa Yeerusaleem a ƥiseena gilaa saax took o hup doole.

Roog a xoya a Yeremi ta refat o coojo’it um

⁴ O Yaal oxe a daawnaxam fa lay um ee:

⁵ «Yaaga moolafuliroong sax no fud ya of, and’aaxoong, too yaaga rimafulaandee, kesan’oong a xoox es, dalnong o tuleer qeet ke.»

⁶ Um doonin ee: «Ey, o Yaal oxe na refkaa boo faw, waagiim fa lay, yaam o njaaƈ refum.»

⁷ Kaa koy, o Yaal oxe a layaxam ee: «Ba o lay ee o njaaƈ refo, yaam xan o ret paam no fop we um lulkang, lay fop ke um hebilkang.

⁸ Ba o saɗar a den, yaam mexey fa wo, ndax um watong.» O Yaal oxe layun.

⁹ Cinj kaaga, o Yaal oxe a letna o ɓay um, a duq o don es soo a layaam ee: «Mexey ɓekaa fa lay es no don of.

¹⁰ Ɗeeti, mexe dalnang xaye took qeet ke fo maat ke, ndax o fuuraa soo maafaa, yaqaa soo baytaa, maxaa soo jimbaa.»

A naaq ndaxar amaand ale fo a kaleera le na waƴaa

¹¹ Maaga, o Yaal oxe a laamtaxam ee: «Yeremi, xar ga’o?» Um doonin ee: «A naaq ndaxar amaand ga’um.»

¹² Maaga, o Yaal oxe a layaxam ee: «Ga’aa a paax koy, yaam kaam yetooxaa, ndax um fadin fa lay es.»

¹³ O Yaal oxe a laamtahinaxam jaf ɗikandeer ee: «Xar ga’o?» Um doonin ee: «A kaleera laa na waƴaa ga’um no ɓemb-roog o janoon.»

¹⁴ Maaga, o Yaal oxe a layaxam ee: «No ɓemb-roog o janoon o mat taamaala fee a biltoorkaa took no we ngenna no saax lene fop.

¹⁵ Yaam mexe layan ee xam xoy qeet ke no maat ke no ɓemb-roog o janoon fop. Maaga, xan a ngar, a sip a kamb no maad ake den mbaambir tokand ke Yeerusaleem. Xan a mbid saŋe ke ten o kurul-keƥ, fo ke no teeru ke Yudaa fop.

¹⁶ Neene, xam fadin kate es took no we ngenna no saax le yaam paaxeer ke da mbi’na fop: kaa mbaasaam pelek, a ƥoxot cuuraay roog lakas, a ngungaa mbaambir ke xa ƥay den a njalna.

¹⁷ Wo Yeremi koy, humnooxi. Inooxi, ret daawin a den fop ke um hebilkang. Ba o send mbaambir den, yaam ndik um sendnoorong mbaambir den.

¹⁸ Xaye, saƭkandaaxoong nen teeru fa njegu saŋe, nen a toodook njelem fo tabax nqanjar mbaambir saax le fop, ta ref maad we Yudaa, kelfa ke ten, saasadax we ten fa xeet fee no saax le.

¹⁹ Xan a ñoxor fa wo, ndaa mbaagankirang o sep, yaam mexey fa wo, ndax um watong.» O Yaal oxe layun.