Xa peƭit axe 9 - NQAARIIT NE ROOG

Jeg-yiif kaa xuraa

¹ Jeg-yiif a maxa mbind um, a sexanin a toodook ɓetaa ƭaq.

² A xirsa cegel, a jagand biiñ fee, a diƈ xa toon axe.

³ A lula jeefeer we ten, da mbalalooxanan no fo mbiñ fo ngoƭu took ne na teeru fee yee:

⁴ «Fat oxe raƥna yiif a ɗapiid mene!», a layanin we ñakna a qoox ee:

⁵ «Ngaryo ñaam na xa tox axe mi, yer na biiñ fee jaganduuma.

⁶ Mbaasyo o ƥodaxel, too yaaga xan nu ñoow. Nqotyo a ƭat ale no jeg-yiif ole!»

O cegu yiif oxe fo o magnandooxu xe

⁷ Oxe na yaraa o qaaxaadnax, o xeefel doŋ a xottaa teen, oxe na soqaa o soxodu xe, a jegtaa teen o wenel soom.

⁸ Ba o soq o qaaxaadnax oxe, yaam ndik ta sibong, ndaa soqi o cegu yiif oxe, too yaaga xan a fexong.

⁹ Cooxi oxe jegna yiif xa as, too xan a moƴ o jeg yiif, aqat o cofu xe, too xan a ɓaat o and um.

¹⁰ O jeg-yiif no saɗar o Yaal oxe a eettaa, o and o Tedu xe a ref o ƴiƴ.

¹¹ Na pexey es, xa yeng of a ƥaatoorkaa, xa kiid axe no ñoow of a moƴ o may.

¹² O jegangaa yiif, wo a jiriiñkaa, o ref o qaaxaadnax koy, wo doŋ a maƭarkaa.

Fanxoy kaa xuraa

¹³ Fanxoy kaa ref nen o tew o podaƭaru o mbid, a raƥ yiif too andee tus.

¹⁴ Kaa moofaa na carind mbind um took duɗand, mbaat no fo mbiñ fo ngoƭu took ne na teeru fee,

¹⁵ a falalooxaa we na njoonaa too a nqot a nqot a ƭat den cow ee:

¹⁶ «Fat oxe raƥna yiif a ɗapiid mene!» A layaa oxe ñakna xoox ee:

¹⁷ «Foofi le guuɗeena kaa fel bo, ñaamel ke nquutooxeena a mbel tigi.»

¹⁸ We ta xuraa koy andee yee mbind um o mbiñ o nqaƥu yoo, o xoy um a ref o xoy jaaniif.