Xa peƭit axe 8 - NQAARIIT NE ROOG

Jeg-yiif a xoytahina

¹ Nan-gilooxyo, Jeg-yiif oxe xoytaa, o ƴiƴ ole a falalooxaa!

² Kaa fod na xa cul axe took-ee-took, paam a ƭat ake fo no ƭat-sal ke.

³ Kaa jibnaa o ñuxur um paam xa ton-maax axe, no tokand ke na teeru fee yee:

⁴ «Nuun wiin we um falalooxaa, o ñuxur es a jagin na xa ƥiy Aadama.

⁵ Nuun we ndaƥna a yiif, aqatooxyo a kortax, nuun panxoy ke, njangyo o ƴiƴ.

⁶ Nan-gilooxyo, yaam jegaam tig maak kaa layuuma, o don es a yaƥat, ndax um jangnit ke jofna.

⁷ O don es ndigil soom a yegnitaa, ɗelem es a sib o maaɓ.

⁸ Ke um layaa fop kaa jof. Jegee teen dara kaa refeerna ndigil mbaat ta ref naanaxir.

⁹ Fop kaa xool qac no xe ƴiƴna, nukee no we njegna o and.

¹⁰ Mbexyo aqatin es kupu xaaliis, o and ole a moƴan a nuun wurus fa sooraand,

¹¹ yaam o jeg-yiif ole moƴu jar xa peme, too halal fa leng fodee fo ten o njiriiñ.»

Jeg-yiif a andnooxa

¹² «Mi Jeg-yiif, a kortax refu o yoon es, o and fo a bootax a ndef qaariit es.

¹³ O saɗar o Yaal oxe refu o fañ paaxeer. Ke sibuuma refu o nga’atinax fo a magnandax, a pi a paaxeer fo fa lay fa naanaxir.

¹⁴ Mi jegu o as ole fo o ƴiƴ ole, mi refu o and ole, doole fee a refanaam.

¹⁵ Na pexey es maad we a maadooraa, gelwaar we a ndalnaa kebil cofu.

¹⁶ Na pexey es kelfa ke a maadooraa, wiin maak we fo aa-adax we no lanq ke fop.

¹⁷ Kaam fex we mbexaxama, too we na mbaaƭaxam kaa nga’axam.

¹⁸ Halal fo o ndam owey fa mi, o jeg o fagkeer fo o neq.

¹⁹ Ke um ci’taa moƴu wurus, boo na wurus fa sooraand, ke um cooxtaa a moƴ xaaliis fa nqoolu.

²⁰ Kaam ñaaƴaa na ƭat ale no ndigil ne, reefaa ndeer ee ndeer a qal ale no cofel ole,

²¹ ci’aa we mbexaxama halal, mayƭandaa a kamba den.

²² O Yaal oxe mi a eetu o rim no ke ta fi’na fop, yaaga sake le ten moƴna o miñ jegafulee.

²³ Kaam dalnel yaa leng a andeerna, no mberaandoong naa, yaaga lanq ke mberafulaand.

²⁴ Kaam rimel yaaga juwaam jegafulee, a cur alaa na balnaa foofi ne’aand.

²⁵ Yaaga xa coong axe sipafulaand, yaaga a ñaang ake ngeennafulaand, rimeem.

²⁶ O Yaal oxe fi’’afulee lanq ke mbaat a koƥ ale mbaat ke ta fi’itna mbep lanq.

²⁷ Meen reeƭum, ye ta dalnaa asamaan fee, a fiisaa a keeriit took juwaam fee,

²⁸ ye ta doonaa a eel ake took, a cur ake na juwaam fee a palpalnaa fa doole,

²⁹ ye ta fiisanaa o maag ole me ta warna o day, ndax poofi ke ten njolkee a ƥeeraamb ale, a doonaa a per ake no lanq ke.

³⁰ No keene fop kaam reeƭu nen a waane paam um, ñaal nuu refna um ɗaayandan, ŋaslooxaa kili mbaambir um,

³¹ lanq ke ta sakna a ndef o ŋasand es, o ɗaay es um jegtin na xa ƥiy Aadama.»

O kiin oxe na nan-gilooxaa a Jeg-yiif a ɗaaya

³² «Ndiiki koy, xa ƥees, nan-gilooxaamoo! We na ndeefaa xa as es a ƭaaya!

³³ Nan-gilooxyo a cangin es, ndax nu njeg yiif, too ba nu yapatilin.

³⁴ O kiin oxe na nan-gilooxaxam, a geenooxaa no don-maax es ñaal oo ñaal, a cungaxam no begax es, a ɗaaya,

³⁵ yaam oxe ga’axama a ga’a o ñoow ole, too xan a fel o Yaal oxe.

³⁶ Kaa koy, oxe bugeeraxama ga, xoox um a loraa, we mbañaxama fop a ƈufanaa fa nqon.»