Xa peƭit axe 7 - NQAARIIT NE ROOG

O tew o seeseeq kaa roknaa o fes

¹ O ƥees, dami a ƭelem es, geek xa as es.

² Gayi xa as es, too xan o ñoow, gay a cangin es nen jooƴ a ngid of.

³ Humi a den no qol of, bind a den no xeeñ of.

⁴ Layi o jeg-yiif ole yee: «Wo refu o cigeen es», o ƴiƴ ole, o xoyin xaariit.

⁵ Neene, xan o xox pog ke no tew o seeseeq oxe, na jeemang o naxit xa ƭelem xa ƥuuɓu.

⁶ Kaam fod’u no falangteer a ndok es, ɗeettaa no tagar ne.

⁷ Ƴookaam xa pes xa yokooxeer, ga a ndeer den o fes o ñaku xoox.

⁸ Kaa waanoogu no mbed ne, a ɓol kooñ, a jagin maa o leng no rew weene a genna, a ɓeedaa o ndang.

⁹ Kaa reeƭu na kid-a-caɓru ke, ye ta yengiidaa, o niɓaan ole a garaa.

¹⁰ O tew oxe a xetiida fo ten, a rokoor nen a caga, nqooƭ nof doŋ a ref no yiif um.

¹¹ Kaa fodaƭar o mbid, a yuxum a adnin, ta ɓodax o jaf.

¹² No ped ke mbaat no paayo ke mbaat no kooñ ke a xawloortaa goor we.

¹³ A dama o fes olaa, a foonin, a ɗeetin kam a kid soo a layin ee:

¹⁴ «Kaam war’u o ɓoxot sadax fa njamsa’oor, too fadnaam a tegit es xaye.

¹⁵ Ten taxu um xetooxiidong, wo soom waaƭoogum too ga’aaxoong.

¹⁶ Ɗaaptaam njong es ƭaap naa rooxteena xa ƥaak xa katu Misira.

¹⁷ Kaam sul njong es miir fa alowes fa sinamom.

¹⁸ Gari i ŋasaa fo o ɗaay boo o feet nqes, njimboox na baneex mbugir,

¹⁹ yaam o kor es refee no mbind naa, kaa ñaaƴik koƭu.

²⁰ A ɓislooxa xaaliis fa mayu, too yaa o nqool onqe a gomna rek a gatkaa.»

²¹ O tew oxe a hupaan doole fo fa lay um, a ɗooqlooxin fo xa ƭelem xa ƥuuɓu xe ten.

²² Ndak fo ndak, o koor oxaa a dalfooxaan o reefan, nen nqoox naa na retaa no warand, nen o ƭof oxaa na humeel ndax ta xawel,

²³ nen ndiiƭ naa na ñofandooxanaa mbog, too andee yee o ñis um oley no xoƥ nquƭ, boo yaa a kas a dibkan no xeeñ.

²⁴ Ndiiki koy, xa ƥees, nan-gilooxaamoo, ndung nof nuun no ke um layaa.

²⁵ Ba nu mbaas o tew o nandu neene ta hup a nuun doole. Ba nu ngulum boo nqot fo ten a ƭat,

²⁶ yaam a maafnoora jaaku, a warnoor mayu.

²⁷ Mbind um kaa ref a ƭat alaa na ɓisaa jaaniif, a sag farna fo ngenand ne no xon we.