Xa peƭit axe 6 - NQAARIIT NE ROOG

Wootoox o gadoox o kend of no lad

¹ O ƥees, o gadooxangaa o kend of no lad, regit o rabdan o lakas,

² a soƥangaa yee fa lay of kaa loknong, o don of a xaƴong a malook,

³ boo o yen na xa ƥay no taarawnit oxe, o ƥees, fi’i kene boog ndax o mucil a xoox of: Reti no ñofu, ga’ir fo ten, xeɗooxin,

⁴ boo o helko fo sagaa a ngid of mbaat o xaƴ kuñam of da nim.

⁵ Sutooxi teen nen mbat ƥostoortu no ɓay no qaaxawlax, nen ndiiƭ ndaɗtu no ɓay no poofog.

Wootoox o ref feeñaak

⁶ Wo feeñaak fee, reti maa no qorondom kaa, horoox a pesoorooƭ den too xan o xotit teen o jeg-yiif.

⁷ Njegee o yeeyetax mbaat kelfa mbaat o yaal mbind.

⁸ Yaqanee koy, kaa mbokataa ñaamel den na seek fee, a ngeeraa kaa da ñaamna yaa fo a saxad ale.

⁹ Wo feeñaak fee, kaa o wondooxkaa boo a mban? Mban o yokooxkaa no ƭaan of?

¹⁰ Ɗaani bo ta felong, ñootnoox o ndik, letnoox, kongom xa ƥay of.

¹¹ Kaa koy, xan ndool a betong nen o kuuɗ, o ñak a song o log of nen o koor o saqu ƥonax.

Ne o kiin o naanax a nandna

¹² O kiin o caree tus, a jofaƭar refu oxe na maaɓaa retaa.

¹³ Kaa waraa a ngid, a laytaa a caf soo a jiiƭaa.

¹⁴ Naanaxir ƥor a fofu no xeeñ um, a gen no yuuɓaa paaxeer, a oraa qasir.

¹⁵ Xan sabab a sagooxin ndak fo ndak, ta duguñel ndeer ñaf fo ƭeet too jegkee ƈufig.

Ke o Yaal oxe a sibna

¹⁶ A jega tig ɓetuu fa leng boo no ɓetuu ƭik sax kaa o Yaal oxe a sibna:

¹⁷ a kid nga’yaamoo ke, ɗelem naanax le, xa ƥay axe na ƥaxaa fo’oy jaambuur,

¹⁸ xeeñ le na yuuɓaa njofaƭar, a caf ake na ƈufanaa paaxeer,

¹⁹ o seede maamaaɓ oxe na xayandaa tefee ndigil fo xe na oraa qasir ndeer o fog ole.

A maƭax took ceeq ne

²⁰ O ƥees, gayi xa as axe faap of, too ba o deɓ a cangin ya of.

²¹ Ɓeki a den no xeeñ of, hum a den no cok of.

²² Xan a ƭoxang na ñaaƈ of, a saytooxang, yaa o ɗaanaa, a lay fa wo, yaa yokooxoona.

²³ Xa as axe kaa ndef o lampa, a cangin ale a ref a qoolaand, soo xa soqanqol axe a ngeekaa na ƭat ale no ñoow ole.

²⁴ Xan a saytooxong no tew o paaxeer oxe, a guutatirandong fo fa lay fa ƥuuɓu fee no tew o lakas.

²⁵ Ba o yaawin yaam o mosel um, too ba o jaɓ ta naxtong o ɗeet um,

²⁶ yaam a caga cikir ñaamel rek a laacaa, o tew o seeseeq oxe o mat a ref a cikax o ñis.

²⁷ Ndax o kiin a waaga ɓembaanoox fiɗel, too toki um ndamee?

²⁸ Ndax o kiin a waaga ñaaƴ took a kaagaañ fiɗel, too a caf um ndoxee?

²⁹ Neene a nandu no xaa yoonna fo o tew no kiin o lakas. Oxuu duquuna ñakkaand o xaw.

³⁰ Ndax oxe guuɗna ñaamel kaa ta ɗaxitna nqeex um naagee xeefeel?

³¹ A ga’ange, xan a nomit boo a caf ɓetaa ƭaq ke ta jangna, a cooxit fop ke ta jegna no mbind um.

³² Kaa koy, oxe seeqna fo o tew no lakas kaa raƥ yiif. Oxe bugna o saŋkoox doŋ na fesooraa neene.

³³ Xa ƭong rek a xotitkaa teen, a niwaƭarel, soo a gen na gaci,

³⁴ yaam naal kaa fuuxnooraa o kor oxe, too naagee o yirmaa na bes fee na tabdinax ale.

³⁵ Jaɓkee rabdel maal leng, a refangaa sax ee kaa o moƴ o ɓaat nger of.