Xa peƭit axe 4 - NQAARIIT NE ROOGO njiriiñ no daaw o jeg-yiif 1 Xa ƥees, nan-gilooxyo aqatin faap, ndung nof nuun, ndax nu ndaaw o jeg-yiif ole. 2 O and o faax um cooxiidaa a nuun. Ba nu yapatil a cangin es! 3 Mi itam kaam reeƭu o ndeɓandoong no mbind faap es, ya es a fexaam bo, nen mi doŋ a jegu. 4 Faap es kaa aqatoogaam ee: «Dami fa lay es, gay xa as es, too yaaga xan o ñoow. 5 Waaƭi o jeg-yiif, waaƭ o ƴiƴ! Ba o weecit fa lay es too ba o ɗap ɗelem es! 6 Ba o deɓin, too xan a yetooxong. Fexeen, too xan a saytooxong. 7 Keeke refu mberaandoong ne no jeg-yiif ole: waaƭi o jeg-yiif, o ƴiƴ ole a jaranong fop ke jegoona. 8 Fi’een cegu njiriiñ, too xan a yoɗong, farakooxin, ta ci’ong o ndam. 9 Xan a rokanong no xoox a ƈang a mosu, a mosandtong o ndip o nqenu.» A pesoorooƭ no soxodu we a jare o wootoox 10 O ƥees, nan-gilooxaam, jaɓ fa lay es, too yaaga xan o xuuɗ. 11 Kaam lalang a ƭat ale no jeg-yiif ole, ɗoxang na ƭat a cofu le. 12 O ñaaƴangaa teen, o jaf of fiiqilkaand, too o ƴufangaa sax oo, tolofkiro. 13 Dami a cangin ale, fañ o waas, geekin, yaam ten refu o ñoow of. 14 Ba o xot a ƭat ale no soxodu we, ba o ñaaƴ na qal no wiin faaxeer we. 15 Wootooxeen, fañ o reef teen, laqtooxin, reef o mbiñ o lakas! 16 Wiin weene ƭaankee muk, a refangee kaa mbi paaxeer. Sagkee a ngid, too maafee o kiin. 17 Kañaan a ñoowtaa, a yeraa ngiin fo’oy. 18 A ƭat ale no jofu we kaa nand nen a qoolaand mbeet, meleƈ um a ɓaatooxaa boo njoloor o mbuc. 19 A ƭat ale no soxodu we koy kaa nand nen o niɓaan. Andee ke na tolofnoorkaa a den. Saq a pesoorooƭ a paax 20 O ƥees, nan-gilooxi fa lay es, rung nof of na ƭelem es. 21 Baa ngoƭong, o geek a den kam ee kam xeeñ of, 22 yaam o ñoow a ndefu no xuu jaɓna a den, a ndef o wod-fo-ɓaal no cer um fop. 23 Gaynaaki xeeñ of kupu tig lakas kuu refna, yaam no ten a cur ale no ñoow ole a refu. 24 Ba o maaɓ a sutoor no don of, naanaxir a fañ o hat no ɗelem of. 25 Fat a kid of a ƭeet ke jasnooroona, a cooƴ of a ngaan mbaambir of. 26 Horooxi a ƭat ale o xotkaa, ndax a qal ake wo fop a mboor. 27 Ba o ɗap na ñamaak mbaat na janoon, o jaf of a ñak o dak no paaxeer. |
Copyright © 2015-2023 by Eglise luthérienne du Sénégal
Eglise luthérienne du Sénégal