Xa peƭit axe 3 - NQAARIIT NE ROOG

O jeg-yiif ole fo o saɗar a Roog

¹ O ƥees, ba o weec a cangin es, fat xeeñ of a geek xa as es,

² yaam xan a ƥaat xa yeng of, xa kiid axe no ñoow of fa jam of.

³ Yaasam ba o sambir fo o paaxel fo ngor! Humi a den no cok of, bind a den no xeeñ of.

⁴ Neene, xan o fel a Roog, fop a mbugong.

⁵ Hoolooxi o Yaal oxe no xeeñ of fop, too ba o geƈnoox no jeg-yiif of.

⁶ Adneen no kuu o fi’aa, too xan a fodrand a ƭat of.

⁷ Ba o fi’oox o cegu yiif. Saɗari o Yaal oxe, wootoox paaxeer.

⁸ Keene xan a ref teex of, a wodand cer of ceŋ.

⁹ Niwti o Yaal oxe ke jegoona fop, ɓoxotin ke eetna o foor no saxade of.

¹⁰ Yaaga, xan tap of a may muut, xa toon of a caarooxaa fa biiñ fa nqas.

¹¹ O ƥees, ba o damit caaxaan ne o Yaal oxe a yartang, too ba o fasnooxin yaa ta soqang,

¹² yaam o Yaal oxe kaa yaraa oxe ta fexna, ne faap a naƭtitaa o ƥeem ŋaƈit.

O jeg-yiif na ɓisiidaa baneex

¹³ O kiin oxe jegna yiif a ɗaaya, ten oxe daawna o ƴiƴ ole,

¹⁴ yaam ke ta ɓisiidaa moƴu xaaliis, ke na xotteel teen a moƴ wurus.

¹⁵ Ten moƴu o jar xa peme, too kuu waagoona o yuxmaa, ten hupun njigand.

¹⁶ O xuuɗ-o-ñis fodun na ñamaak, halal fo o ndam a mbodin na janoon.

¹⁷ A ƭat ake ta xotnooraa kaa ndef a ƭat a pelu, a qal ake ten fop a ndef a qal jam.

¹⁸ Kaa ref ndaxar o ñoow no we ndamuuna, we pokooxuuna a ƭaaya.

¹⁹ O jeg-yiif o Yaal oxe a siptu lanq ke, a saƭkandit asamaan fee o ƴiƴ.

²⁰ Na pexey o and um a xaajtu juwaam fee ƭik, a eel ake a yuurnaa a liim ale.

O Yaal oxe kaa saytooxaa o cegu yiif oxe

²¹ O ƥees, ba o ƴiƴ fo a kortax a ngoƭong.

²² Xan a ci’ong o ñoow, a ndef mosandir o cok of.

²³ Yaaga xan o ñoowaa no woor, too a caf of mbaɓooxkee.

²⁴ O wondooxangaa, jegkiro caƭar leng, too xan o jeg o ƭaan o pelu.

²⁵ Saɗarkiro a qufil akaa mbetna mbaat song laa inoorna no soxodu we.

²⁶ yaam o Yaal oxe na refkaa a ƭing of, a guutatirandaa o jaf of fo mbog nuu refna.

Fex o kend of

²⁷ Dimle’i oxe refna na soxla, yaa waaganoona.

²⁸ Ba o lay o kend of ee: «Cungi boo o feet, um cooxong», yaa jegoona kaa dimle’tanoona xaye.

²⁹ Ba o yuuɓan o kend of paaxeer, too ta gen fa wo fo o yaadax.

³⁰ Ba o layoor fo o kiin no kaa o leng a andeerna, yaa ta fi’eeroonga paaxeer leng.

³¹ Ba o yaaw o kiin fo’oy oxe mbaat o bug o xot fo ten a ƭat.

³² O Yaal oxe kaa sib wiin jofaƭaru we, ndaa kaa ref xaariit no jofu we.

³³ A salax ake no Yaal oxe wey kam mbind ne no soxodu xe, ndaa kaa barke’aa ngenand no jofu we.

³⁴ Kaa xaadnooxaa xaaxaadnax we, ndaa kaa yirmaa neewandooxu we.

³⁵ We njegna yiif xan a niwel, ndaa panxoy ke o mat, gaci refu a las den.